ខេត្ដកំពង់ចាម៖ លោក ទុន ណេត អភិបាលនៃគណៈអភិបាលស្រុកស្ទឹងត្រង់ រួមជាមួយ អាជ្ញាធរមូលដ្ឋាន ព្រះសង្ឃ និងសប្បុរសជននានាទាំងនៅក្នុងស្រុក និងក្រៅស្រុកបានធ្វើការសហការមូលមតិគ្នាទិញជាអំពូលភ្លើងប្រើដោយពន្លឺព្រះអាទិត្យ(សូឡា) ធ្វើការបំពាក់នៅតាមដងផ្លូវនានាក្នុងឃុំពាមកោះស្នា ដែលជាស្រុកកំណើតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងនៅតាមទីប្រជុំជននានាក្នុងទីរួមស្រុកស្ទឹងត្រង់ផងដែរ។
លោកទុន ណេត ឲ្យដឹងថា មកដល់ពេលនេះសម្រាប់ឃុំពាមកោះស្នាគឺយើងធ្វើការបំពាក់អំពូលប្រើដោយពន្លឺព្រះអាទិត្យជិត១០០អំពូលហើយ ដោយបានពីការចូលរួមឧបត្ថម្ភពីសប្បុរសជននានា។ ដោយឡែកនៅក្នុងទីប្រជុំជនស្រុកស្ទឹងត្រង់ អាជ្ញាធរក៏បានធ្វើការបំពាក់អំពូលប្រើដោយពន្លឺព្រះអាទិត្យជាច្រើនកន្លែងផងដែរ និងបានបំពាក់នៅតាមបណ្ដាក្បាលស្ពាននានាក្នុងភូមិសាស្ត្រស្រុកស្ទឹងត្រង់ ដើម្បីបង្ករលក្ខណៈងាយស្រួលដល់ការធ្វើដំណើរទៅមករបស់បងប្អូនប្រជាពលរដ្ឋនាពេលរាត្រី។
លោកទុន ណេត ក្នុងនាមអាជ្ញាធរស្រុកស្ទឹងត្រង់ សូមអំពាវនាវដល់បងប្អូនប្រជាពលរដ្ឋ និងសប្បុរសជនទាំងអស់សូមមេត្តាជួយឧបត្ថម្ភ គាំទ្រក្នុងសកម្មភាពលើ ដើមជាប្រយោជន៍រួម និងភាពស្រស់បំព្រងសម្រាប់សហគមន៍យើង៕ ដោយ៖លោក ចៅ វង្ស
