ខេត្តសៀមរាប៖ សមត្ថកិច្ចចម្រុះបានចុះបិទទីតាំងលក់ផលិតផល «ស្រីនាងសម្រស់ធម្មជាតិ» កាលពីរសៀលថ្ងៃទី២៥ ខែធ្នូ ឆ្នាំ២០២០ ស្ថិតនៅផ្លូវតាមបណ្តោយផ្លូវ លោកតាណឺយ ក្នុងភូមិដកពោធិ៍ សង្កាត់ស្លក្រាម ក្រុងសៀមរាប ដែលបើកអាជីវកម្មដោយគ្មានច្បាប់ និងបានរកឃើញបញ្ហាមិនប្រក្រតីជាច្រើនចំណុច។
លោក វរសេនីយ៍ឯក ជ្រិញ គឹមនី នាយការិយាល័យប្រឆាំងបទល្មើសសេដ្ឋកិច្ច នៃស្នងការនគរបាលខេត្តសៀមរាប បានប្រាប់ឱ្យដឹងថា កម្លាំងចម្រុះរួមមានអាជ្ញាធរមូលដ្ឋាន នគរបាលប្រឆាំងបទល្មើសសេដ្ឋកិច្ច និងមន្ទីរសុខាភិបាលខេត្តសៀមរាប បានចុះទៅផ្អាកទីតាំង«ស្រីនាងសម្រស់ធម្មជាតិ» ប្រឹក្សា និងលក់ផលិតផលសម្រស់ធម្មជាតិ។
លោកបន្តថា សមត្ថកិច្ចរកឃើញមានភាពមិនប្រក្រតីចំនួន៤ចំណុច៖ ទី១.បើកអាជីវកម្ម អត់ច្បាប់។ទី២.អាហារបំប៉ង អត់មានចុះប្រវេទរបស់ក្រសួងសុខាភិបាល។ទី៣. ផាកពិន័យអន្តរកាលតាមច្បាប់ ស្តីពីឱសថ។ទី៤.ផ្អាកអាជីវកម្មបណ្ដោះអាសន្ន រង់ចាំឲ្យសុំច្បាប់រួចរាល់ ទើបឲ្យបើកដំណើរការឡើងវិញ។
ចំណែកលោកស្រីវេជ្ជបណ្ឌិត លី វណ្ណៈ ប្រធានការិយាល័យនិយ័តកម្ម នៃមន្ទីរសុខាភិបាលខេត្តសៀមរាប បានមានប្រសាសន៍ថា ករណីផលិតផលរបស់«ស្រីនាងសម្រស់ធម្មជាតិ» ប្រឹក្សា និងលក់ផលិតផលសម្រស់ធម្មជាតិនេះ មិនទាន់បានចុះប្រវេទ គឺខុសច្បាប់គ្រប់គ្រងឱសថ និង គ្រប់គ្រង គ្រឿងសម្អាង ហើយថែមទាំងបានផ្សព្វផ្សាយថា ព្យាបាលជា តាមពិតផលិតនោះគ្រាន់តែជាប្រភេទអាហារបំប៉នសុខភាពប៉ុណ្ណោះ បែរជាហ៊ានផ្សព្វផ្សាយ ថា ព្យាបាល គីស គឺវាខុសច្បាប់ ទាំងស្រុងតែម្ដង៕
