ភ្នំពេញ ៖ ចង់ល្បីម្នាក់ទៀតហើយ! បុរសម្នាក់ អួតអាងខ្លួនជាមន្ត្រីកងរាជអាវុធហត្ថ និងមានតួនាទីជានាយករងមជ្ឈមណ្ឌលហ្វឹកហ្វឺនភ្នំជំរាយ បានដកកាំភ្លើងភ្ជង់គំរាមយុវជនម្នាក់ គ្រាន់តែរឿងគ្រោះថ្នាក់ចរាចរណ៍បន្តិចបន្តួចសោះ។
ប្រជាពលរដ្ឋសម្តែងការហួសចិត្តយ៉ាងខ្លាំងចំពោះឥរិយាបថរបស់សមត្ថកិច្ចរូបនេះ ដែលអាងខ្លួនជាសមត្ថកិច្ច ហ៊ានដកកាំភ្លើងគំរាមប្រជាពលរដ្ឋ ខណៈពេលនេះ ស្គាល់ទាំងមុខ ស្គាល់ទាំងផ្លាកលេខឡាន សង្ឃឹមថា ថ្នាក់លើនឹងមានវិធានការផង។
គ្រោះថ្នាក់ចរាចរណ៍បន្តិចបន្តួចឈានដល់ការដកកាំភ្លើងគំរាមនេះ កើតឡើងកាលពីវេលាម៉ោង៤៖៣០នាទីទៀបភ្លឺ ថ្ងៃទី១០ ខែមករា ឆ្នាំ២០២១ នៅចំណុចម្តុំផ្សារធំថ្មី ក្នុងសង្កាត់ផ្សារថ្មីទី១ ខណ្ឌដូនពេញ។
បើតាមបុរសម្នាក់ សុំមិនបញ្ចេញឈ្មោះ បានប្រាប់ក្រុមអ្នកសារព័ត៌មាននៅកន្លែងកើតហេតុថា មុនដំបូងគាត់ឃើញរថយន្តព្រូសមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AC-9367 បើកបរដោយបុរសម្នាក់ ដែលមានកាំភ្លើង បើកឡានស្របគ្នា តាមបណ្តោយផ្លូវលេខ៧៣កៀនផ្សារធំថ្មី ហើយឃើញរថយន្តនេះ បើកកៀរម៉ូតូបណ្តាលឲ្យដួល រួចក៏ដកកាំភ្លើងពីចង្កេះ ថែមទាំងស្រែកគំរាមថា «ហែងចង់យ៉ាងម៉េច»។ អ្នកឃើញហេតុការណ៍ដដែលបន្តថា ភ្លាមៗនោះ ជនរងគ្រោះបានលើកដៃសុំកុំបាញ់គាត់អី។
ពេលនោះ ប្រជាពលរដ្ឋបានរត់មកជួយជនរងគ្រោះដែលដួលម៉ូតូ ដោយបានបាក់ដងកាំបិត និងត្រូវត្រង់ប្រអប់ជើង បញ្ជូនទៅកាន់មន្ទីរពេទ្យភ្លាមៗផងដែរ។ បន្ទាប់មក ជនបង្កនៅតែបន្តសំញែងកាំភ្លើងនៅមុខសមត្ថកិច្ចដដែលៗ ទើបសមត្ថកិច្ចសុំដកទុកសិន ហើយជនបង្កបានប្រគល់ឲ្យតែសំបកកាំភ្លើងទេ ដោយមិនប្រគល់គ្រាប់ឲ្យនោះទេ រួចបានស្រែកគំហកដាក់សមត្ថកិច្ចថែមទៀតផង។
ជាមួយគ្នានេះ ជនបង្ករូបនេះបានស្រែកប្រកាសខ្លួនថា «ខ្លួនមានមុខងារជាមន្ត្រីកងរាជអាវុធហត្ថ និងមានតួនាទីជានាយករងមជ្ឈមណ្ឌលហ្វឹកហ្វឺនភ្នំជំរាយ» ហើយខ្លួនបានចេញពីផឹកស៊ីមួយកន្លែង មានបំណងបើករថយន្តមកផ្ទះរបស់ខ្លួននៅជិតកន្លែងកើតហេតុ។
ជាចុងក្រោយ គឺជនរងគ្រោះមិនចង់មានរឿងវែងឆ្ងាយទេ ហើយក៏មិនបានដាក់ពាក្យបណ្តឹងនៅប៉ុស្តិ៍ប៉ូលិសដែរ ដោយសុំត្រឹមតែឲ្យជនបង្កសងថ្លៃព្យាបាលនៅមន្ទីរពេទ្យតែប៉ុណ្ណោះ ដើម្បីបញ្ចប់រឿង៕
