ខេត្ដស្វាយរៀង៖ អធិការដ្ឋាននគរបាលក្រុងស្វាយរៀង មានកិត្តិយសសូមធ្វើការបំភ្លឺជូនសាធារណៈជន ពាក់ព័ន្ធនឹងការចុះផ្សាយព័ត៌មានរបស់អង្គភាពសារព័ត៌មាន ប៊ី ភី អិន ( BPN News ) នៅថ្ងៃទី ១៧ ខែ មករា ឆ្នាំ២០២១ នេះថា: ” ហាង តូ តូ ម្ងូសិក នៅភូមិចុងព្រែក សង្កាត់ស្វាយរៀង បង្កប់នូវល្បែងស៊ីសង ពលរដ្ឋសុំឱ្យអាជ្ញាធរក្រុងស្វាយរៀង មេត្តាចុះពិនិត្យនិងបង្ក្រាបផងទាន ”
បន្ទាប់ពីទទួលបានព័ត៌មាននេះ លោកវរសេនីយ៍ទោ កែន រិទ្ធី អធិការនគរបាលក្រុងស្វាយរៀង បានដាក់បទបញ្ជាឲ្យលោកអនុសេនីយ៍ឯក មុំ រតនា អធិការរងនគរបាលក្រុងស្វាយរៀង ទទួលការងារយុត្តិធម៌ ដឹកនាំកម្លាំងអធិការដ្ឋាន និងប៉ុស្តិ៍រដ្ឋបាលចុះទៅធ្វើការត្រួតពិនិត្យទីតាំងខាងលើភ្លាម ។
ជាលទ្ធផល ពេលសមត្ថកិច្ចចុះពិនិត្យដល់ទីតាំងខាងលើបច្ចុប្បន្នគឺពុំមានការបង្កប់លេងល្បែងស៊ីសងខុសច្បាប់ ដូចតាមការចុះផ្សាយរបស់អង្គភាពសារព័ត៌មាន ប៊ី ភី អិន ( BPN News ) នោះទេ ហើយរូបភាពដែលយកមកចុះផ្សាយនោះ គឺជារូបភាពចាស់ កាលពីមុនសមត្ថកិច្ចធ្វើការអប់រំ និងកិច្ចសន្យាបញ្ឈប់ ។
គួរបញ្ជាក់ផងដែរថា កាលពីថ្ងៃទី ២០ ខែកក្កដា ឆ្នាំ២០២០ កន្លងទៅ សមត្ថកិច្ចនគរបាលក្រុងស្វាយរៀង ធ្លាប់បានធ្វើការអប់រំណែនាំ និងកិច្ចសន្យា ចំពោះម្ចាស់ទីតាំងខាងលើ ឲ្យបញ្ឈប់រាល់ការលេងល្បែងស៊ីសងខុសច្បាប់គ្រប់ប្រភេទ នៅក្នុងទីតាំងរបស់ខ្លួន ម្តងរួចមកហើយ( ដូចមានភ្ជាប់កិច្ចសន្យាស្រាប់ ) ។ ចាប់តាំងពីពេលនោះមកទីតាំងខាងលើពុំមានការបង្កប់លេងល្បែងស៊ីសងខុសច្បាប់នោះទេ ដោយមានការយកចិត្តទុកដាក់តាមដាន និងត្រួតពិនិត្យជាប្រចាំរបស់សមត្ថកិច្ចអាជ្ញាធរមូលដ្ឋាន ។
សេចក្តីដូចបានបំភ្លឺជូនខាងលើ សូមសាធារណជនមេត្តាជូនជ្រាបជាព័ត៌មាន ។
សូមរម្លឹកដែរថា៖កាពីថ្ងៃទី១៧ខែមករាឆ្នាំ២០២១ អង្គភាពសារព័ត៌មាន ប៊ី ភី អិន ( BPN News ) បានធ្វេីការចុះផ្សាយ ក្រោមចំណងជេីងថា “ហាង តូ តូ ម្ញូសុិក នៅភូមិចុងព្រែក សង្កាត់ស្វាយរៀង បង្កប់នូវល្បែងសុីសង ពលរដ្ឋសូមអោយអាជ្ញាធរក្រុងស្វាយរៀងមេត្តាចុះពិនិត្យ និងបង្ក្រាបផងទាន” !ដែលមានខ្លឹមសាដូចខាងក្រោម៖
ខេត្ដស្វាយរៀង ៖ ពលរដ្ឋរស់នៅក្នុងសង្កាត់ស្វាយរៀង ក្រុងស្វាយរៀង សូមអោយអាជ្ញាធរក្រុងស្វាយរៀងមេត្តាចុះពិនិត្យ និងបង្ក្រាបផងទាន នៅហាងមួយដែលមានយីហោឈ្មោះថា តូ តូ ម្ញូសុិក មានបង្កប់នូវល្បែងសុីសងច្រេីនប្រភេទដែលកំពុងនិងដំណេីការលេងជារៀងរាល់ថ្ងៃ ដែលមានអ្នកញៀនល្បែងសុីសងជាច្រើននាក់ចូលទៅលេង និងចាញ់ឈ្នះរាប់សែន រាប់លានផងដែរ។
បើយោងតាមប្រភពច្បាស់ការ ពីអ្នកចេញចូលលេងល្បែង ទីតាំងខាងលើបានឲ្យដឹងថាទីតាំងនេះគឺជាក្ដីសុខសាន្ដសម្រាប់ពួកគេលេងដោយគ្មានក្ដីព្រួយបារម្ភហេីយគ្មានសមត្ថកិច្ចណាមករំខានដែរ។
ហើយអ្វីដែលសំខាន់ទៀតនោះគេសង្កេតឃើញថា បទល្មើសចោរកម្មក៏កើតឡេីងដូចជាចោរឆក់ ចោរលួច ចោរប្លន់ គាស់ផ្ទះយកទ្រព្យសម្បតិរបស់បងប្អូនប្រជាពលរដ្ឋជាដើម គឺអាចកើតចេញពីល្បែងស៊ីសងទាំងនេះឯង។
ពាក់ព័ន្ធនឹងករណីនេះដែរប្រជាពលរដ្ឋបានសុំណូមពរដល់អាជ្ញាធរពាក់ព័ន្ធទាំងអស់ជាពិសេសលោកអធិការនគរបាលក្រុងស្វាយរៀង មេត្តាចុះពិនិត្យ និងបង្ក្រាបទីតាំងដែលបើកបង្កប់នូវល្បែងសុីសងនេះផង ដើម្បីឲ្យស្របតាមគោលនយោបាយភូមិ សង្កាត់ មានសុវត្ថិភាពទាំង៩ ចំណុចរបស់រាជរដ្ឋាភិបាលដែលបានដាក់ចេញ។
សូមរំលឹកថាកន្លងមកសម្តេច ក្រឡាហោម ស ខេង បានបញ្ជាឲ្យអាជ្ញាធរ បង្ក្រាបឲ្យអស់គ្រប់ល្បែងស៊ីសងក្នុងមូលដ្ឋាន ។
កន្លងមកមានទីតាំងមួយចំនួនដែលបង្កប់ល្បែងស៊ីសង ក្នុងមូលដ្ឋានក្រុងស្វាយរៀង គេសង្កេតឃើញអាជ្ញាធរពាក់ព័ន្ធតែងតែចុះបង្ក្រាប ប៉ុន្តែផ្ទុយទៅវិញនៅមានទីតាំង បើកលួចលាក់ល្បែងស៊ីសងខុសច្បាប់មួយចំនួនទៀតនៅក្នុងមូលដ្ឋានសង្កាត់ស្វាយរៀងមិនទាន់បង្ក្រាប។
ជាក់ស្ដែងហាង តូ តូ ម្ញូសុិក បានបង្កប់នូវល្បែងសុីសង ក្នុងទឹកដីភូមិចុងព្រែក សង្កាត់ស្វាយរៀង ក្រុងស្វាយរៀង ខេត្ដស្វាយរៀង មិនទាន់ឃើញមានការបង្ក្រាបនោះទេ។
ពាក់ព័ន្ធនឹងករណីខាងលើនេះដែរ អង្គភាពសារព័ត៌មាន ប៊ី ភី អិន (BPN News)យើងមិនអាចសុំការបញ្ជាក់ពីម្ចាស់ហាងខាងលើនេះបានទេ។ អង្គភាពសារព័ត៌មានយើងរង់ចាំបកស្រាយរៀងរាល់ម៉ោងធ្វើការ៕
