ភ្នំពេញ ៖ នារីម្នាក់ បើករថយន្តក្នុងល្បឿនលឿន ដល់ចំណុចផ្លូវបំបែកជាបួន មិនបន្ថយល្បឿន ជ្រុលបុកម៉ូតូស្មាស់មួយគ្រឿង បណ្ដាលឲ្យបុរសម្នាក់ រងរបួស ចំណែករថយន្តមិនទាន់អស់ល្បឿន ក៏បន្តទៅបុកផ្ទះប្រជាពលរដ្ឋរងការខូចខាត កាលពីវេលាម៉ោង១និង៥០នាទីរំលងអធ្រាត្រ ឈានចូលថ្ងៃទី៣ ខែកុម្ភៈ ឆ្នាំ២០២១ នៅចំណុចផ្លូវលេខ១៤៣ កែងផ្លូវ៣១០ ក្នុងសង្កាត់បឹកកេងកងទី៣ ខណ្ឌបឹងកេងកង។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូម៉ាកស្មាស់រេវ៉ូ ពណ៍ខ្មៅលាយក្រហម ពាក់ស្លាកលេខ ភ្នំពេញ 1AM-4205 ធ្វើដំណើរតាមបណ្តោយផ្លូវលេខ៣១០ ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែមានរថយន្តម៉ាកព្រូស ពណ៌ស ពាក់ស្លាកលេខ ភ្នំពេញ 2AV-0108 បើកបរដោយនារីវ័យក្មេងម្នាក់ ធ្វើដំណើរតាមបណ្តោយផ្លូវលេខ១៤៣ ក្នុងទិសដៅពីជើងទៅត្បូង ក្នុងល្បឿនលឿន ក៏ជ្រុលបុកម៉ូតូបណ្តាលឲ្យដួលរងរបួសស្រាល ហើយរថយន្តនៅមិនទាន់អស់ល្បឿន ក៏បន្តទៅបុកចូលផ្ទះប្រជាពលរដ្ឋបណ្តាលឲ្យរងការខូចខាតជញ្ជាំងទ្វារមួយផ្ទាំង។
ក្រោយកើតហេតុ សមត្ថកិច្ចមូលដ្ឋានបានចុះទៅដល់ចំណុចកើតហេតុ និងទំនាក់ទំនងទៅជំនាញមកធ្វើការវាស់វែងយករថយន្តទៅរក្សាទុក រង់ចាំដោះស្រាយតាមច្បាប់៕
