ខេត្តកំពង់ធំ៖ ស្ត្រីម្នាក់តូចចិត្តមានជម្ងឺប្រចាំកាយ សម្រេចចិត្តចងកសម្លាប់ខ្លួន បង្កការភ្ញាក់ផ្អើល។
ហេតុការណ៍ភ្ញាក់ផ្អើលខាងលើនេះកើតឡើងនៅថ្ងៃទី០៤ ខែកុម្ភៈ ឆ្នាំ២០២១ វេលាម៉ោង៨៖១០ នាទី នៅភូមិវាលល្ពាក់ ឃុំសាលាវិស័យ ស្រុកប្របល្ល័ង្ក ខេត្តកំពង់ធំ ។
សមត្ថកិច្ចបានឲ្យដឹងថា សពឈ្មោះ រ៉ុម រិទ្ធ ភេទស្រី អាយុ ៤១ឆ្នាំជនជាតិខ្មែរ* មុខរបរកសិករ នៅភូមិ ឃុំកើតហេតុខាងលើ ។
តាមការរៀបរាប់របស់ ឈ្មោះ ម៉ុន រ៉ា ត្រូវជាកូនបង្កើតសព បានបំភ្លឺថា ខ្លួនរស់ជាមួយម្ដាយកំព្រាឪពុកតាំងពីតូចមកម្លេះ ម្ដាយខ្លួនមានជម្ងឺប្រចាំកាយ ខ្លួនតែងដើរស៊ីឈ្នួលលើកអុសឲ្យគេ យកលុយទិញអង្ករ និងថ្នាំពេទ្យឲ្យម្ដាយ ពេលខ្លះគាត់ស្រួលខ្លួនគាត់លេប ពេលខ្លះមិនស្រួលខ្លួនគាត់យកថ្នាំបោះចោល ហើយម្ដាយខ្លួនធ្លាប់បានយកខ្សែរគោមកចងក ២លើកមកហើយ តែខ្លួនឃើញ និងជួយទាន់ពេល។
នៅថ្ងៃទី០៣ ខែកុម្ភៈ ឆ្នាំ២០២១ ម៉ោងប្រហែល ១៩៖០០ ខ្លួនបានត្រឡប់មកពីលើកអុសដល់ផ្ទះបាត់ម្ដាយ ក៏បើកភ្លើងពិលទូរស័ព្ទដើររកក្នុងផ្ទះ រកមិនឃើញក៏ដើរទៅរកមើលក្បែរៗផ្ទះមីង រ៉ន នៅខាងលិចផ្ទះខ្លួនដែលគាត់ទុកចោលយូរណាស់មកហើយ តែដោយស្ងាត់ពេក ខ្លួនមិនហ៊ានឡើងមើលទេ ណាមួយអស់កម្លាំងផងក៏ត្រឡប់មកដេកលើអង្រឹងលក់រហូតដល់ព្រឹក ដល់ឡើថ្ងៃទី០៤ ខែកុម្ភៈ ឆ្នាំ ២០២១ មិនបានដើររកម្ដាយទេ នឹកថាគាត់ដើរទៅភូមិវាលល្ពាក់ចាស់ ខ្លួនក៏ដើរកាត់មុខផ្ទះមីង រ៉ន បំណងមករកលើកអុសឲ្យគេ ស្រាប់តែឃើញម្ដាយ ចងកនៅនឹងផ្ទោងលើផ្ទះមីង រ៉ន ដោយក្រណាត់អង្រឹងស្លាប់បាត់ទៅហើយ ។
ក្រោយទទួលបានព័ត៌មាន កម្លាំងប៉ុស្តិ៍ រដ្ឋអំណាចភូមិ ឃុំបានចុះមកពិនិត្យដល់ទីកន្លែងកើតហេតុនិងសាកសព មិនមានស្លាកស្នាមអ្វីគួរអោយសង្ស័យករណីឃាតកម្មឡើយ តាមការសន្និដ្ឋានរបស់សមត្ថ កិច្ចជនរងគ្រោះស្លាប់ដោយចងក ដោយមានជម្ងឺប្រចាំកាយ។
បន្ទាប់ពីសមត្ថកិច្ចពិនិត្យចប់បានធ្វើកំណត់ហេតុប្រគល់អោយក្រុមគ្រួសារសពធ្វើបុណ្យតាមប្រពៃណី៕
