ខេត្តបន្ទាយមានជ័យ ៖ នាយប់ ថ្ងៃអាទិត្យ ៣កើត ខែផល្គុន ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៤ ខែកុម្ភ:ឆ្នាំ២០២១នៅវេលាម៉ោង១៩និង៣០នាទីដោយទទួលព័ត៌មានថាប្រជាពលរដ្ឋដែលលួចឆ្លងដែនខុសច្បាប់បានជាន់មីនភ្លាមៗនោះ
លោក ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នឹងលោក គាត ហ៊ុល អភិបាល នៃគណៈអភិបាល ក្រុងប៉ោយប៉ែតនឹងលោកវរសេនីយ៍ឯក សៅ សារឿន អធិការនគរបាល ក្រុងប៉ោយប៉ែត បានដឹកនាំកម្លាំងចុះផ្ទាល់ដល់ទីតាំងកើតហេតុ និងកងកម្លាំងប៉ុស្តិ៍ព្រៃគប់នៃវរៈលេខ៩១១បានយកជនរងគ្រោះមកកាន់មន្ទីរពេទ្យបង្អែកដីថ្មីដើម្បីសង្គ្រោះបន្ទាន់ ។
ហេតុការណ៍ដែលមានករណីប្រជាពលរដ្ឋម្នាក់ ជាន់មីននោះ ស្ថិតនៅចំណុចព្រំដែនកម្ពុជាថៃចំណុច ច្រកព្រៃគប់ ស្ថិតនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ហើយជនរងគ្រោះមានឈ្មោះ យឿន រ៉ន ភេទប្រុស អាយុ ៣៣ឆ្នាំ ជាប្រជាពលរដ្ឋរស់នៅក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ រងរបួសដាច់ជើង ខាងស្តាំត្រឹមជង្គង់។
លោកឧត្តមសេនីយ៍ទោ សិទ្ធិ ឡោះ ស្នងការនគបាលខេត្តបន្ទាយមានជ័យបានមើលឃើញជនគ្រោះមានស្ថានភាពធន់ធ្ងរក៏បានបញ្ជូនជនរងគ្រោះទៅកាន់មន្ទីរពេទ្យកម្ពុជាជប៉ុនស្រុកមង្គលបូរី បច្ចុប្បន្នកំពុងសម្រាកព្យាបាលនៅមន្ទីរពេទ្យកម្ពុជាជប៉ុន នៅស្រុកមង្គលបូរី ខេត្តបន្ទាយមានជ័យ៕ ដោយ,លោកចាន់ពុធ
