ខេត្ដកំពង់ចាម៖ ថ្ងៃចន្ទ ទី១៥ ខែកុម្ភៈ ឆ្នាំ២០២១ឯកឧត្ដមអ៊ុន ចាន់ដា អភិបាលខេត្តកំពង់ចាម និងគណៈកម្មការប្រយុទ្ធ នឹងជំងឺកូវីដ-១៩ បានដឹកនាំមន្ទីរ-អង្គភាព និងសមត្ថកិច្ចពាក់ព័ន្ធជុំវិញខេត្ត អញ្ជេីញចូលរួមក្នុងកិច្ចប្រជុំបន្ទាន់នៃគណៈកម្មការអន្តរក្រសួង ដើម្បីប្រយុទ្ធនឹងជម្ងឺកូវីដ-១៩ ស្តីពីការពង្រឹងការត្រួតពិនិត្យអ្នកឆ្លងកាត់តាមព្រំដែន និងការធ្វើចត្តាឡីស័កតាមរយៈvideo conference ក្រោមអធិបតីភាព ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជម្ងឺកូវីដ-១៩ នៅសាលប្រជុំ សាលាខេត្តកំពង់ចាម។
សូមបញ្ជាក់ផងដែរថា កិច្ចប្រជុំនេះ គឺយោងតាមសេចក្តីថ្លែងសារពិសេសរបស់សម្តេចតេជោ ជូនជនរួមជាតិអំពីវិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូលប្រទេសកម្ពុជា ក្នុងគោលបំណងពង្រឹងសមត្ថភាពគ្រប់គ្រងលើគ្រោះអាសន្នបន្ទាន់ ជាមួយនិងការចាត់វិធានការសុខាភិបាល ជាពិសេស ពង្រឹងកិច្ចសហប្រតិបត្តិការជាមួយស្ថាប័នពាក់ព័ន្ធអោយបានល្អ ដើម្បីកាត់បន្ថយហានិភ័យដល់សុខភាពសាធារណៈ។
ជាថ្មីម្តងទៀត ឯកឧត្តម អភិបាលខេត្តកំពង់ចាម និងប្រជាពលរដ្ឋក្នុងខេត្តកំពង់ចាមទាំងមូល សូមគោរពជូនពរ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជម្ងឺកូវីដ-១៩ សូមមានសុខភាពល្អ បរិបូរណ៍ប្រាជ្ញាឈ្លាសវៃ និងជ័យជំនះគ្រប់ភារកិច្ច ដើម្បីជួយរួមចំណែកដឹកនាំ និងផ្តល់យន្តការដោះស្រាយបញ្ហាជំងឺកូវីដ-១៩ ដ៏កាចសាហាវមួយនេះ៕
