ភ្នំពេញ ៖ នគរបាលខណ្ឌឬស្សីកែវ ឃាត់ខ្លួនជនសង្ស័យ២នាក់ ករណីឆក់ទូរស័ព្ទដៃ កាលម៉ោង១០៖៣០នាទីយប់ ថ្ងៃទី២៤ ខែកុម្ភៈ ឆ្នាំ ២០២១ ត្រង់ចំណុចផ្លូវជាតិលេខ៥ ស្ថិតក្នុងក្រុមទី៤ ភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ លុះមកដល់ថ្ងៃទី២៧ ខែកុម្ភៈ ឆ្នាំ២០២១ ជនសង្ស័យបានចេញមកធ្វើសកម្មភាពឆក់ទៀត ទើបកម្លាំងយើងឃាត់ខ្លួនបានតែម្តង។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានឲ្យដឹងថា ជនសង្ស័យទាំងពីរនាក់ ទី១. ឈ្មោះ រូន អារីហ្វីន អាយុ១៦ឆ្នាំ ជនជាតិឥស្លាម មានទីលំនៅភូមិ១ សង្កាត់ច្រាំងចំរេះ១ ខណ្ឌឫស្សីកែវ មុខរបរមិនពិតប្រាកដ (មានសារធាតុញៀន)។ ទី២.ឈ្មោះ ការីម អារីហ្វីន អាយុ១៧ឆ្នាំ ជនជាតិឥស្លាម មានទីលំនៅភូមិ៣ សង្កាត់ច្រាំរេះ១ ខណ្ឌឬស្សីកែវ មុខរបរមិនពិតប្រាកដ (មានសារធាតុញៀន)។
លោកវរសេនីយ៍ឯក ហ៊ាង ថារ៉េត បានឲ្យដឹងទៀតថា នៅថ្ងៃកើតហេតុ មានករណីឆក់យកទូរស័ព្ទដៃ នៅចំណុចកើតហេតុ ប៉ុន្តែជនរងគ្រោះមិនបានមកដាក់ពាក្យបណ្តឹងទេ។ បន្ទាប់ពីបានទទួលព័ត៌មានមកសមត្ថកិច្ចខណ្ឌប៉ុស្តិ៍បានស្រាវជ្រាវជាបន្តបន្ឌាប់។ លុះមកដល់ថ្ងៃទី២៧ ខែកុម្ភៈ ឆ្នាំ២០២១ ជនសង្ស័យបានចេញមកធ្វើសកម្មភាពឆក់ទៀតលើកំណាតផ្លូវជាតិលេខ៥ លុះដល់ត្រង់ចំណុចក្រុម៤ ភូមិលូ សង្កាត់ស្វាយប៉ាក បានជួបនិងកម្លាំងល្បាតរបស់ប៉ុស្តិ៍ ក៏ធ្វើការឃាត់ខ្លួនតែម្តង។ បន្ទាប់ពីបានឃាត់ខ្លួនយកមកប៉ុស្តិ៍រដ្ឋបាលស្វាយប៉ាកធ្វើសាកសួរជនសង្ស័យទាំង០២នាក់ បានសារភាពថា ខ្លួនគេពិតជាបានធ្វើសកម្មភាពឆក់យកទូរស័ព្ទពិតប្រាកដមែន។
សម្ភារៈបាត់បង់៖ ទូរស័ព្ទម៉ាកអូប៉ូ A3S។ សម្ភារៈដកហូត៖ ម៉ូតូ០១គ្រឿង ម៉ាកស្កុបពី ពណ៌ខ្មៅ ពាក់ស្លាកលេខ ភ្នំពេញ 1AF-5048។
បច្ចុប្បន្ន ជនសង្ស័យទាំងពីរ កំពុងឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕
