ខេត្តកំពង់ស្ពឺ ៖ ក្រោយពីរដ្ឋាភិបាលប្រកាសបិទព្រំប្រទលខេត្តមួយទៅខេត្តមួយទៀតដើម្បីទប់ស្កាត់ការរីករាលដាលនៃជំងឺកូវិដ-១៩ រយះពេល១៤ថ្ងៃនោះ កម្លាំងគណៈបញ្ជារការឯកភាពរដ្ឋបាលស្រុកគងពិសី ដឹកនាំដោយ លោក ញ៉េន មុន្នីរតនៈ អភិបាលរងស្រុកតំណាងដ៏ខ្ពង់ខ្ពស់របស់លោកអភិបាលស្រុក បានចុះបិទទាំងយប់ទាំងថ្ងៃ ហើយនឹងកំពុងបន្តការអនុវត្តវិធានការបិទព្រំប្រទលលើកំណាត់ផ្លូវជាតិលេខ ៤១ ត្រង់ចំណុចឃុំរកាកោះ ស្រុកគងពិសី ខេត្តកំពង់ស្ពឺ និង ឃុំរលាំងកែន ស្រុកកណ្តាលស្ទឹង ខេត្តកណ្តាល
នៅយប់ថ្ងៃទី២១ ខែមេសា ឆ្នាំ២០២១ នេះ និងធ្វើបន្តរហូតដល់មានសេចក្តីសម្រេចថ្មី។
រដ្ឋបាលស្រុកគងពិសីបានសម្រេចវិធានការដ្ឋបាលបន្ថែមទៀត ដើម្បីទប់ស្កាត់ការរីករាលដាលនៃជំងឺកូវីដ-១៩ ដូចជាផ្អាកការលក់ដូរគ្រឿងស្រវឹង និងហាមឃាត់ការជួបជុំនានាផងដែរ លើកលែងតែការជួបជុំ នៅក្នុងគ្រួសារ ដែលមានសមាជិកគ្រួសារនៅក្នុងផ្ទះតែមួយ ។ ហើយវិធានការ និងបម្រាមទាំងនេះ ធ្វើឡើងក្នុងគោលបំណងចូលរួមការទប់ស្កាត់ ការរីករាលដាលនៃជំងឺកូវីដ-១៩ ក្នុងភូមិសាស្រ្តស្រុកគង់ពិសី នៃខេត្តកំពង់ស្ពឺ។
លោក ញ៉េន មុន្នីរតនៈ អភិបាលរងស្រុកតំណាងលោកអភិបាលស្រុកដឹកនាំកម្លាំងគណបញ្ជាការឯកភាពស្រុកគងពិសីត្រួពិនិត្យនៅគោលដៅនោះ បានបញ្ជាក់ថារដ្ឋបាលស្រុកបានផ្អាកជាបណ្ដោះអាសន្ននូវ ភោជនីយដ្ឋាន អាហារដ្ឋាន តូបអាហារចល័ត នៅចន្លោះម៉ោង ៨យប់ដល់ ម៉ោង ៥ភ្លឺ តែទីតាំងអាជីវកម្មទាំងនោះ អាចលក់ជាលក្ខណៈវេចខ្ចប់បាន។ ភោជនីយដ្ឋាន អាហារដ្ឋាន ទាំងអស់ មិនត្រូវលក់គ្រឿងស្រវឹងជាដាច់ខាត។ គ្រប់ផ្សាររដ្ឋ ផ្សារឯកជន ផ្សារម៉ាត ហាងលក់ភេសជ្ជៈ ត្រូវផ្អាកការលក់គ្រឿងស្រវឹង គ្រប់ប្រភេទ។
ចំពោះបុគ្គលដែលមិនគោរពតាមសេចក្ដីសម្រេចខាងលើ រដ្ឋបាលស្រុកគង់ពិសីនឹងអនុវត្តវិធានការរដ្ឋបាលតាមផ្លូវច្បាប់ ដែលបានកំណត់ក្នុងច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩។
រដ្ឋបាលស្រុកគងពិសី ក៏សូមអំពាវនាវដល់ប្រជាពលរដ្ឋទាំងអស់ សូមបង្កើននូវការប្រុងប្រយ័ត្នឲ្យបានខ្ពស់ ជាពិសេសត្រូវប្រកាន់ភ្ជាប់នូវវិធានការរបស់ប្រមុខរាជរដ្ឋាភិបាល “៣ការពារ ៣កុំ” និងសេចក្តីសម្រេច ឬសេចក្តីណែនាំនានាដែលចេញដោយរដ្ឋបាលខេត្ត ហើយបើគ្មានការចាំបាច់ សូមនៅតែក្នុងផ្ទះ ត្រូវរួមគ្នាកាត់ផ្តាច់ឬសគល់នៃជំងឺកូវីដ-១៩នេះ ដោយផ្តើមចេញពីការចូលរួមសហការពីប្រជាពលរដ្ឋយើងគ្រប់ៗរូប៕
