ភ្នំពេញ៖ ក្រសួងកសិកម្មរុក្ខាប្រមាញ់និងនេសាទ បានទទួលជំនួយវ៉ាក់សាំងសាទឹក និងអ៊ុតក្តាម(FMD) ចំនួន២០ម៉ឺនដូស ពីមិត្តចិន ដើម្បីការពារជំងឺរាតត្បាតលើសត្វពាហនៈដែលបាននិងកំពុងកើតមាននៅក្នុងប្រទេសកម្ពុជា។
ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជននៃសាធារណរដ្ឋប្រជាមានិតចិន ជាពិសេស រដ្ឋមន្រ្តី ក្រសួងកសិកម្ម និងកិច្ចការជនបទចិន ដែលបានផ្តល់ជំនួយវ៉ាក់សាំងនេះមកកម្ពុជា។
សូមជម្រាបជូនថា កាលពីថ្ងៃទី១២ ខែមករា ឆ្នាំ ២០២១ ក្រសួងកសិកម្ម រុក្ខាប្រមាញ់ និងនេសាទ បានទទួល វ៉ាក់សាំងជម្ងឺសាទឹក ពីក្រសួងកសិកម្ម និងកិច្ចការជនបទ នៃសាធារណរដ្ឋប្រជាមានិតចិន ចំនួន ១០០ ០០០(មួយសែន) ដូស រួចមកហើយ ដែលជាការផ្តល់ដំណាក់កាលទី១ ហើយកាលពីថ្មីៗកន្លងទៅនេះ ក្រសួងកសិកម្ម ក៍បានទទួលវ៉ាក់សាំងជំងឺអ៊ុតក្តាម FMD ចំនួន ១០០ ០០០ (មួយសែន) ដូស បន្ថែមទៀត ដែលជាការផ្តល់មកឲ្យកម្ពុជាក្នុងដំណាក់កាលទី២ ។
រហូតមកដល់ពេលនេះវ៉ាក់សាំងជម្ងឺសាទឹក ដែលទទួលបានក្នុងដំណាក់កាលទី១ អគ្គនាយកដ្ឋានសុខភាពសត្វ និងផលិតកម្មសត្វ បានបើកផ្តល់និងចាក់ ដល់សត្វគោក្របីរបស់កសិករនៅតាមបណ្តារាជធានី/ខេត្តអស់ចំនួន៤ម៉ឺន៧ពាន់ដូសរួចហើយដែលមកទល់ពេលនេះសត្វគោក្របីដែលបានចាក់វ៉ាក់សាំងហើយនោះមានសុខភាពល្អប្រសើរ។
ឯកឧត្តមរដ្ឋមន្ត្រីបានជម្រាបជូនថាវ៉ាក់សាំងជំងឺសាទឹកនិងអ៊ុតក្តាមនេះមានប្រសិទ្ធភាពនិងគុណភាពល្អណាស់ព្រោះការផលិតស្របតាមលក្ខខណ្ឌអាកាសធាតុនៃប្រទេសកម្ពុជា ៕
