(ខេត្តកំពត)៖ ប្រជាពលរដ្ឋប្រមាណជា ២០គ្រួសារ កំពុងរស់នៅភូមិអូរតូច (វាលវង់) សង្កាត់អណ្តូងខ្មែរ ក្រុងកំពត ខេត្តកំពត បានកើតទុក្ខមិនសុខចិត្ត លើកគ្នាតវ៉ា នៅពេលបុគ្គលម្នាក់ឈ្មោះ ស៊ូ យី ដែលរស់នៅភូមិជាមួយគ្នា បានលួចឈួសឆាយផ្លូវលំសាធារណៈចាស់ចោលហើយចាក់ដីថ្មីបិទមិនឲ្យប្រជាពលរដ្ឋធ្វើដំណើឆ្លងកាត់ ដើម្បីយកធ្វើជាកម្មសិទ្ធិផ្ទាល់ខ្លួនដោយខុសច្បាប់។
បើតាមប្រជាពលរដ្ឋ បានបញ្ជាក់ថា បុគ្គលឈ្មោះ ស៊ូ យី បានធ្វើសកម្មភាពចាក់ដី និងឆឈូសឆាយរំលោភយកដីផ្លូវសាធារណៈរបស់រដ្ឋនៅចំណុចក្នុងភូមិខាងលើ ដែលប្រជាពលរដ្ឋកំពុងប្រើប្រាស់រាល់ថ្ងៃនោះ កាលពីអំឡុងដើមខែមេសា ឆ្នាំ២០២១ មកម្លេះ។
ដោយមើលឃើញអំពើបំពានច្បាប់របស់បុគ្គលឈ្មោះ ស៊ូ យី ប្រជាពលរដ្ឋ ជាច្រើនគ្រួសារ បាននាំគ្នាផ្តិតមេដៃ ដាក់ពាក្យបណ្តឹងទៅអាជ្ញាធរភូមិ សង្កាត់ ភ្លាមៗដែេ ប៉ុន្តែមកដល់ពេលនេះ។ខាងអាជ្ញាធរសង្កាត់នៅតែមិនទាន់រកដំណោះស្រាយជូនពួកគាត់នោះឡើយ។
ប្រជាពលរដ្ឋ បន្តថា ផ្លូវលំសាធារណៈដ៏ចំណាស់មួយខ្សែនេះគឺពួកគាត់បានធ្វើដំណើរទៅស្រែចំការ និងអ្នកខ្លះត្រូវចូលទៅផ្ទះសម្បែងរៀងរាល់ថ្ងៃ ស្រាប់តែនៅអំឡុងដើមខែមេសា ឆ្នាំ២០២១ កន្លងទៅ មានបុគ្គលឈ្មោះ ស៊ូ យី បានលួចយកគ្រឿងចក្រមកឈូសឆាយផ្លូវលំចាស់នោះចោលអស់ និងដឹកដីយកមកចាក់ថ្មីដើម្បីងាយស្រួលចេញចូលទៅកន្លែងផ្នូសពរបស់សាច់ញាតិរបស់ខ្លួន ដោយបិទមិនឲ្យប្រជាពលរដ្ឋដែលធ្លាប់ធ្វើដំណើរឆ្លងកាត់ទៀតនោះទេ ដោយបុគ្គលឈ្មោះស៊ូ យី នោះសំអាងថាដីស្រែរបស់គាត់នៅជាប់សងខាងផ្លូវលំខាងលើ ដូច្នេះហើយគេចង់ធ្វើអ្វីស្រេចតែចិត្ត។
ប្រជាពលរដ្ឋ អះអាងថា ផ្លូវលំមួយនេះគឺមានប្លង់ត្រឹមត្រូវចេញដោយមន្ត្រីសុរិយោដីខេត្តកំពត ដោយកំណត់នៅក្នុងប្លង់នោះជាផ្លូវសាធារណៈ ប៉ុន្តែបុគ្គលឈ្មោះ ស៊ូ យី បែរជាចោទប្រកាន់ប្រជាពលរដ្ឋថា បាននាំគ្នាគប់គិតជាមួយមន្ត្រីសុរិយោដីខេត្តលួចធ្វើប្លង់យកដីរបស់ខ្លួនដាក់ជាផ្លូវសាធារណៈទៅវិញ។
ប្រជាពលរដ្ឋ លើកឡើងថា នៅពេលដែលមន្ត្រីជំនាញសុរិយោដី ចុះវាស់វែងធ្វើប្លង់រឹង គឺដាច់ខាតត្រូវតែមានម្ចាស់ដី និងភាគីពាក់ព័ន្ធដែលមានព្រំប្រទល់ជាប់គ្នាមកផ្តិតមេដៃត្រឹមត្រូវទើបគេចេញប្លង់រឹងឲ្យ រឿងអ្វីបុគ្គលឈ្មោះ ស៊ូ យី អាចចោទប្រកាន់ប្រជាពលរដ្ឋ និងមន្ត្រីជំនាញទៅកើត?
នៅពេលប្រជាពលរដ្ឋ លើគ្នាតវ៉ា សុំឲ្យបុគ្គលឈ្មោះ ស៊ូ យី បើកផ្លូវសាធារណៈនោះវិញ ស្រាប់តែឈ្មោះ ស៊ូ យី បានទៅចាក់ដីធ្វើផ្លូវថ្មីនៅកន្លែងផ្សេងដើម្បីឲ្យប្រជាពលរដ្ឋធ្វើដំណើរ ប៉ុន្តែប្រជាពលរដ្ឋមិនយល់ព្រមនោះទេ ព្រោះផ្លូវថ្មីដែលបុគ្គលឈ្មោះ ស៊ូ យី ចាក់ដីឲ្យប្រជាពលរដ្ឋ ធ្វើដំណើរ គឺស្ថិតនៅក្នុងប្លង់កម្មសិទ្ធរបស់ឈ្មោះ ស៊ូ យី ហើយបើថ្ងៃក្រោយមានបញ្ហាអ្វីទៅគេបិទផ្លូវនោះទៀត តើពួកគាត់បានផ្លូវណាដើម្បីចេញចូលធ្វើស្រែចំការបានដូចសព្វដងទៅ? ព្រោះវាជាកម្មសិទ្ធរបស់គេៗចង់បិទពេលណាក៏បានដែរ។
ក្នុងករណីនេះ លោក គង់ បូ មេភូមិអូរតូច (វាលវង់) បានអ្នកសារព័ត៌មាននៅរសៀលថ្ងៃទី០៦ ខែឧសភា ឆ្នាំ២០២១ នេះថា៖ បុគ្គលឆឈ្មោះ ស៊ូ យី ពិតជាបានឈូសឆាយដីផ្លូវសាធារណៈរបស់រដ្ឋប្រាកដមែន។
លោកមេភូមិបញ្ជាក់ថា ផ្លូវលំខាងលើនោះ។គឺប្រជាពលរដ្ឋ បានប្រើប្រាស់អស់ពេលប្រមាណ ៣០ ទៅ ៤០ឆ្នាំហើយ។ ឈ្មោះ ស៊ូ យី ទើបមកនៅក្នុងភូមិក្រោយគេផង ហើយយកសពម្តាយខ្លួនមកបញ្ចុះនៅទីនោះលើដីរបស់ខ្លួន ប៉ុន្តែផ្លូវលំវិញ មានទាំងប្លង់រឹងចេញពីសុរិយោដីខេត្តរួចរាល់ហើយ គឺជាផ្លូវសាធារណៈ។
លោកមេភូមិ បានថ្លែងថា រឿងនេះលោកបានរាយការណ៍ជូនចៅសង្កាត់ឲ្យជួយដោះស្រាយរួចហើយ មិនដឹងថា ការដោះស្រាយនេះដល់ណាទេ?
ជុំវិញបញ្ហានេះដែរ ចៅសង្កាត់អណ្តូងខ្មែរ លោក យ៉យ ស៊ីថង បានឲ្យដឹងថា បន្ទាប់ពីបានទទួលពាក្យបណ្ដឹងរបស់បងប្អូនប្រជាពលរដ្ឋ លោកបានហៅភាគីទាំងសងខាងមកសម្របសម្រួលចំនួន ២លើករួចមកហើយ ប៉ុន្តែមិនទាន់ចប់នៅឡើយ ព្រោះភាគីទាំងសងខាងមិនទាន់យល់ព្រមរៀងៗខ្លួន។
ដោយឡែកអភិបាលក្រុងកំពត លោក លាង រឿនសុធី បានបញ្ជាក់ជូនអ្នកសារព័ត៌មាននៅរសៀលថ្ងៃនេះថា លោកមិនទាន់មិនទាន់ បានដំណឹងនេះនៅឡើយ អាចខាងសង្កាត់គេកំពុងធ្វើការដោះស្រាយសិន ហើយមិនទាន់ធ្វើរបាយការណ៍មកក្រុង។ លោកអភិបាលក្រុង បន្ថែមថា បើមានហេតុផលច្បាស់លោកត្រូវតែមាដំណោះស្រាយជូនប្រជាពលរដ្ឋ៕
