ភ្នំពេញ ៖ នៅថ្ងៃ សុក្រ ១១រោច ខែ ពិសាខ ឆ្នាំ ឆ្លូវ ព,ស ២៥៦៥ ត្រូវ និង ថ្ងៃទី ០៧ ខែ ឩសភា ឆ្នាំ ២០២១ នៅតំបន់ទីលានចាក់សំរាម លោក ឌី រ័ត្នខេមរុណ អភិបាលរងខណ្ឌមាន ជ័យ បាននាំយកអំណោយមនុស្សធម៍តាមរយះលោក យន្ត សួន ដែរជាម្ចាស់អំណោយ សប្បុរសជននៅសហរដ្ឋអាមេរិច ចំនួន ៣០០ គ្រួសារ មកប្រគល់ជូនប្រជាពលរដ្ឋក្នុងសង្កាត់ស្ទឹងមានជ័យ ទី ២ ខណ្ឌមានជ័យ រាជធានីភ្នំពេញ ។
ក្នុងឪកាសនោះដែរ លោក ឌី រ័ត្នខេមរុណ អភិបាលរងខណ្ឌ បានថ្លែងអំណរគុណយ៉ាងជ្រាលជ្រៅចំពោះឧបាសក ឆាយ អុីវ ស៊ាង និងឧបាសិកា ហុង គឹមសែ តាមរយៈលោក យន្ត សួន តំណាងម្ចាស់អំណោយ នៅសហរដ្ឋអាមេរិក ដែលបានជួយឧបត្ថម្ភជាស្បៀងអាហារ និងថវិកាទាំងនេះ ដើម្បីដោះស្រាយការលំបាកផ្នែកជីវភាពប្រជាពលរដ្ឋនៅតំបន់ក្រហមនៃសង្កាត់ស្ទឹងមានជ័យនេះ។ តាមរយៈកាយវិការដ៏ល្អប្រពៃ ប្រកបដោយមនុស្សធម៌ និងគុណធម៌ខាងលើ ពិតជាបានរួមចំណែកយ៉ាងសំខាន់ជាមួយអាជ្ញាធរ និងរាជរដ្ឋាភិបាល ស្របតាមការអំពាវនាវរបស់សម្តេចអគ្គមហាសេនាបតីតេជោ ហ៊ុន សែន ក្នុងការចាត់វិធានការទប់ស្កាត់ការរីករាលដាលនៃមេរោគកូវីដ ១៩ (Covid-19) នៅរាជធានីភ្នំពេញ ។
បន្ទាប់មក លោក ឌី រ័ត្នខេមរុណ បានមានប្រសាសន៍លើកឡើងដែរថា ក្នុងខណ្ឌមានជ័យ ត្រូវបានអាជ្ញាធររាជធានីភ្នំពេញ កំណត់សង្កាត់ចំនួន ៤ ថា ជាតំបន់ក្រហមដោយជម្ងឺកូវីដ-១៩ ហើយគិតមកដល់ពេលនេះ ក្នុងមូលដ្ឋានខណ្ឌមានជ័យ នេះមានអ្នកស្លាប់ដោយជម្ងឺកូវីដ-១៩ ចំនួន ១៦នាក់ ហើយ ។ ចំណែកអ្នកមានវិជ្ជមានកូវិដ-១៩វិញ បានកើនឡើងរហូតដល់ ២៩០៧ នាក់ហើយដែរ ។ ដូច្នេះទេសូមបងប្អូនប្រជាពលរដ្ឋទាំងអស់មេត្តា ចូលរួមអនុវត្តឲ្យបានខ្ជាប់ខ្ជួនទៅតាមការណែនាំរបស់ក្រសួងសុខាភិបាល ក៏ដូចជាអនុសាសន៍ដ៏ខ្ពង់ខ្ពស់របស់សម្ដេចតេជោហ៊ុនសែន គឺ ៣កុំ និង ៣ការពារ។ ពិសេសកុំចាកចេញពីផ្ទះ យើងត្រូវតែយកឈ្នះកូវីដ-១៩អោយបាន ។
លោក យន្ត សួន តំណាងម្ចាស់អំណោយបានបញ្ជាក់ថា អំណោយដែលត្រូវផ្តល់ជូនពលរដ្ឋក្នុងតំបន់ក្រហមនៅសង្កាត់ស្ទឹងមានជ័យ២នេះ កើតចេញពីគំនិតផ្តួចផ្តើមកៀងគរថវិកា ពីឧបាសក ឆាយ អុីវ ស៊ាង និងឧបាសិកា ហុង គឹមសែ នៅសហរដ្ឋអាមេរិក ដោយបានបញ្ជូនថវិកានេះមកអោយលោកជាអ្នកចាត់ចែងជូនពលរដ្ឋចំនួន ៣ភូមិ ស្មើ ៣០០គ្រួសារ ក្នុងនោះភូមិព្រែកទាល់ ១០០គ្រួសារ, ភូមិព្រែកទាល់១ ចំនួន ១០០គ្រួសារ និងដំណាក់ធំ៤ ចំនួន ១០០គ្រួសារ ដោយក្នុង១គ្រួសារទទួលបាន អង្ករ ១បាវស្មើ ២៥គីឡូ មី ទឹកត្រី ទឹកស៊ីអ៉ីវ និងត្រីខ ១យួរ ។
ជាចុងក្រោយ លោក ឌី រ័ត្នខេមរុណ បានបញ្ចាក់ថា ក្នុងខណ្ឌមានជ័យ ប្រជាពលរដ្ឋបានទទួលអំណោយសម្តេចតេជោ ហ៊ុន សែន និង សម្តេចកិត្តិព្រឹទ្ឋបណ្ឌិត តាមរយៈឯកឩត្តម ឃួង ស្រេង អភិបាលរាជធានី បានចំនួន ៦៥.៥៤៧គ្រួសារ ។ ដោយឡែកចំពោះអំណោយសប្បុរសជនយកមកចែកបានជាង៥០០០គ្រួសារផងដែរ ។
