កំពង់ឆ្នាំង ៖ លោក ប៉ុល វុទ្ធីស្នងការរងបានបញ្ជាក់ថា យោងតាមចម្លើយសារភាពរបស់ជនសង្ស័យជាឃាតក ដែលជាឪពុក និង ប្តី នៅមុនពេលកើតហេតុ ជនសង្ស័យនឹងជនរងគ្រោះដែលជាប្រពន្ធបានឈ្លោះគ្នា ហើយជនរងគ្រោះដែលជាប្រពន្ធបានជេស្តីថាឲ្យ ដោយខឹងនិងប្រពន្ធរករឿង ជនសង្ស័យបានយកកន្រ្តៃ ស្ទុះចាក់ប្រពន្ធ និងកូនតូច បណ្តាលឲ្យស្លាប់មួយរំពេច ។ ក្រោយពីសម្លាប់ប្រពន្ធ និងកូនតូចអស់ពីរនាក់មក រួចកូនមួយទៀតយំស្លន់ស្លោរ ជនសង្ស័យក៏ច្របាច់កសម្លាប់បន្ថែមទៀត ក្រោយពីសម្លាប់ហើយ ឪពុកជាជនសង្ស័យក៏យកពូកទៅគរ បិទផ្លូវឡៅតឿរួចដុតសម្លាប់ទាំងរស់តែម្តង ។
ឃាតកដែលសម្លាប់ប្រពន្ធ និងកូនអស់មួយផ្ទះនៅស្រុកបរិបូរណ៍នាពេលកន្លងមកនេះ សមត្ថកិច្ចបានឃាត់ខ្លួនជនសង្ស័យជាឃាតកដែលជាប្តី និងឪពុករបស់ជនរងគ្រោះ បញ្ជូនទៅតុលាកាហើយ ក្រោយពីសមត្ថកិច្ចនគរបាលខេត្ត ក្រសួង សហការជាមួយអង្គការ CPU ស្រាវជ្រាវរកករណីអគ្គិភ័យឆេះផ្ទះស្លាប់មួយគ្រួសារនេះ ។
លោកស្នងការរងបានបញ្ជាក់ថា យោងតាមការស្រាវជ្រាវ របស់សមត្ថកិច្ច និង អង្គការCPU និង ក្រសួងមហាផ្ទៃ បានប្រមូលវត្ថុតាងបានបង្ហាញថា ឈ្មោះ នន់ សារ៉េត គឺជាជនសង្ស័យដែលបានសម្លាប់ប្រពន្ធ និងកូនរបស់ខ្លួន យ៉ាងសាហាវព្រៃផ្សៃបំផុត ។ ព្រោះថា នៅពេលធ្វើកោសល្យវិច្ច័យ គឺខាងជំនាញយើងបានយកសពស្លាប់ក្នុងភ្នក់ភ្លើង បានរកឃើញមានសព២ ស្លាប់មុនពេលពេលភ្លើងឆេះ ដោយឃាតកបានចាក់សម្លាប់ប្រពន្ធ និងកូនតូចដោយប្រើកន្រ្តៃ។ ចំណែកូនតូចមួយទៀត ក៏ច្របាច់កស្លាប់រួចយកពូកមកដុតរាំងផ្លូវឲ្យឆេះតែម្តង ។
ការធ្វើកោសលវិច្ច័យ សមត្ថកិច្ចនគរបាលបានពិនិត្យឃើញថា ម្ដាយនិងកូនតូចអាយុ២ឆ្នាំពុំមានផ្សែងភ្លើងស្រូបចូលក្នុងផ្លូវដង្ហើមទេ។មានន័យថាមនុស្ស២នាក់នេះ បានស្លាប់មុនពេលភ្លើងឆេះផ្ទះ។ដោយផ្អែកលើ សាក្សីវត្ថុតាងជាច្រើនដាក់បន្ទុក ជនដៃដល់មិនព្រមសារ ភាពនោះទេ រហូតដល់ល្ងាចថ្ងៃទី១១ ខែឧសភា បុរសជាជនដៃដល់ នៅមិនព្រមសារភាព ប្រាប់សមត្ថកិច្ចទៀត តែបានប្រាប់ថា សុំកុំបន្តសួរទៀតអី ចាំយប់នេះ រូបគេដុតធូប សុំគ្រូសិន ចាំថ្ងៃស្អែកគេនិងប្រាប់នូវអ្វីគ្រប់យ៉ាង ហើយសមត្ថកិច្ចក៏ព្រមធ្វើតាម។
គួរបញ្ជាក់ថា កាលពីវេលាម៉ោង៨និង៤០នាទីថ្ងៃទី៩ ខែឧសភា ឆ្នាំ ២០២១នេះ មានករណីអគ្គីភ័យឆាបឆេះផ្ទះមួយខ្នងនៅត្រង់ចំណុចអ្នកតារាជ ស្ថិតក្នុងភូមិដើមជ្រែ ឃុំខុនរ៉ង់ ស្រុកបរិបូណ៌ ខេត្តកំពង់ឆ្នាំង បណ្ដាលឲ្យផ្ទះ១ខ្នង មានទំហំ ៧ម៉ែត្រគុណនឹង១២ម៉្រែត្រ សង់ពីដែកបាំងនិងប្រក់ស័ង្កសីឆេះខ្ទេចទាំងស្រុង ក្នុងហេតុការណ៍ឆេះផ្ទះនេះគឺមាន តែបុរសម្នាក់ឈ្មោះ នន់ សារ៉េត ដែលត្រូវជាប្តីដែលបានរួចខ្លួន ចំណែក ប្រពន្ធនិងកូនចំនួន៦នាក់រួមទាំងកូនក្នុងផ្ទៃ បានស្លាប់ក្នុងភ្នក់ភ្លើងទាំងអស់៕
