(ភ្នំពេញ)៖ ទីបំផុត! លោក អេង អូន ជាមន្ត្រីយោធា និងជាប្រធានក្រុមហ៊ុនអភិវឌ្ឍន៍ភ្នំថ្កូវ ទទួលបានសេរីភាពវិញហើយការពីល្ងាចថ្ងៃទី២៦ ខែកក្កដា ឆ្នាំ២០២១ម្សិលមិញ។ នេះបើការបង្ហើបរបស់សមត្ថកិច្ច។
ប្រភពបញ្ជាក់ថា លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចដោះលែងឈ្មោះ លោក អេង អូន ន្ត្រីយោធានៅអង្គភាពកងទ័ពជេីងអាកាសមូលដ្ឋានកេងកង ខេត្តព្រះសីហនុ និងជាប្រធានក្រុមហ៊ុនអភិវឌ្ឍន៍ភ្នំថ្កូវ បន្ទាប់ពីបញ្ជាឲ្យសមត្ថកិច្ចព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ឃាត់ខ្លួនបញ្ជូនទៅតុលាការ។
ជុំវិញការដោះលែង លោក អេង អូន នេះអ្នកសារព័ត៌មាន បានព្យាយាមសាកសួរទៅលោកព្រះរាជអាជ្ញារង ប្លង់ សុផល អ្នកនាំពាក្យនៃអយ្យការអមសាលាដំបូងរាជធានីភ្នំពេញ មិនឆ្លើយតបឡើយ។
ជាការកត់សម្គាល់ លោកព្រះរាជអាជ្ញារង ប្លង់ សុផល ពុំដែលយកចិត្តទុកដាក់ឆ្លើយតបនឹងសំនួររបស់អ្នកសារព័ត៌មានឡើយ ចាប់តាំងពីលោកបានទទួលតំណែងជាអ្នកនាំពាក្យ។
បើយោងតាមការចេញផ្សាយរបស់សារព័ត៌មានក្នុងចេញផ្សាយការពីថ្ងៃម្សិលមិញពីការបែកធ្លាយសម្លេងរបស់លោក អេង អូន គឺជនសង្ស័យរូបនេះបានអះអាងថា លោកបានទាក់ទងទៅតុលាការ (លោក ស៊ិត វណ្ណៈ) រួចរាល់ហើយ និងគ្មានញញើតចំពោះការចាប់ខ្លួនឡើយ ហាក់បីដូចជាជនសង្ស័យរូបនេះដឹងថា លោក សិត វណ្ណៈ នឹងដោះលែងលោកវិញនៅពេលបញ្ជូនទៅដល់តុលាការ។
ទោះជាមានការចុះផ្សាយ អំពីការបែកធ្លាយសម្លេងរបស់ លោក អេង អូន ថាបានទាក់ទងតុលាការបែបនេះក្ដី ក៏មហាជនពុំទាន់ឃើញមានប្រតិកម្ម ពីស្ថាប័នមានសមត្ថកិច្ចគឺអង្គភាពប្រឆាំអំពើពុករលួយ នៅឡើយទេ។
មហាជនកំពុងរងចាំមើលថាតើ អង្គភាពប្រឆាំងអំពើពុករលួយ នឹងបើកការស៊ើបអង្កេតលើករណី សំដីអះអាងរបស់លោក អេង អូន ដែរឬទេ?
គួររម្លឹកថា លោក អេង អូន ត្រូវបាន សមត្ថកិច្ច ឃាត់ខ្លួន ថ្ងៃទី២៦ ខែកក្កដា ឆ្នាំ២០២១ម្សិលមិញ ពាក់ព័ន្ធ បទល្មើសឆបោក និងរំលោភលើទំនុកចិត្ត ទឹកប្រាក់ចំនួន ៩២ម៉ឺនដុល្លារអាមេរិក។
សមត្ថកិច្ច បានឃាត់ខ្លួនលោក អេង អូន នៅមុខផ្សារស៊ីធីម៉ល រាជធានីភ្នំពេញ តាមដីកាបញ្ជាឲ្យចូលខ្លួនរបស់លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ។
សូមជម្រាបជូនថា លោក អេង អូន ក៏ធ្លាប់ត្រូវបានឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ចេញលិខិតផាកពិន័យជាទឹកប្រាក់ជាង ៨០០លានរៀលផងដែរ ដោយសារតែក្រុមហ៊ុន អភិវឌ្ឍភ្នំថ្កូវ លួចកាយយកដីក្រហមនៅភ្នំថ្កូវ ស្ថិតនៅភូមិកោះផ្ដៅ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត មុនទទួលបានអាជ្ញាប័ណ្ណពីក្រសួង ប៉ុន្តែ លោក អេង អូន ពុំព្រមបង់ប្រាក់ផាកពិន័យតាមការសម្រេចរបស់លោករដ្ឋមន្ត្រីក្រសួងរ៉ែនោះទេ និងបានចេញលិខិតបដិសេធថែមទៀតផង៕
