(ភ្នំពេញ)៖ ជនជាប់ចោទម្នាក់ទទួលបានសេរីភាពវិញ បន្ទាប់ពីសមត្ថកិច្ចឃាត់ខ្លួនទៅដល់សាលាដំបូងរាជធានីភ្នំពេញ ពាក់ករណីឆបោកប្រាក់។
ជនជាប់ចោទឈ្មោះ ឆុន អំណត់ ភេទប្រុស អាយុ ៤១ឆ្នាំ មានមុខរបរ ជាមន្ត្រីយោធា ត្រូវបានកម្លាំងសមត្ថកិច្ចការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ឃាត់ខ្លួនតាមដីកាបង្គាប់ឱ្យចាប់ខ្លួនលេខ១៥៨៩ ឌ.ដ.ច.ន ចុះថ្ងៃទី២៧ ខែវិច្ឆិកា ឆ្នាំ២០២០។
បន្ទាប់ពីបញ្ជូនខ្លួនដល់តុលាការកាលពីថ្ងៃទី២២ ខែកញ្ញា ឆ្នាំ២០២១ម្សិលមិញ លោក ស៊ិន សុវណ្ណរ័ត្ន ចៅក្រមជំនុំជម្រះនៃសាលាដំបូងរាជធានីភ្នំពេញ ដោយមានលោក លឹម ប៊ុនហេង ជាតំណាងអយ្យការ និងកញ្ញា អ៊ិត ឡងឌី ជាក្រឡាបញ្ជីសវនាការ បានបើកសវនាការ កាត់ទោសជនជាប់ចោទឈ្មោះ ឆុន អំណត់ ពីបទ ឆបោក ប្រព្រឹត្តនៅរាជធានីភ្នំពេញ កាលពីថ្ងៃទី១៨ ខែឧសភា ឆ្នាំ២០១៨ យោងតាមមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។
បន្ទាប់ពីបើកសវនការរួច លោក ស៊ិន សុវណ្ណរ័ត្ន ចៅក្រមជំនុំជម្រះ បានសម្រេចដោះលែងជនជាប់ចោទឈ្មោះ ឆុន អំណត់ ឱ្យមានសេរីភាពវិញ ពោលគឺមិនឃុំខ្លួនជននេះឡើយ បើទោះជាមានការសំណូមពររបស់តំណាងអយ្យការលោក លឹម ប៊ុនហេង ក៏ដោយចុះ។
នៅក្នុងសវនាការ លោក លឹម ប៊ុនហេង ក្នុងនាមជាតំណាងអយ្យការ បានលើកឡើងថា ជនជាប់ចោទឈ្មោះ ឆុន អំណត់ មិនបានបង្ហាញខ្លួន និងឆ្លើយបំភ្លឺនៅចំពោះមុខចៅក្រមស៊ើបសួរចំនួន ២លើកតាមដីកាកោះហៅឡើយ ទើបចៅក្រមស៊ើបសួរសម្រេចចេញដីកាបង្គាប់ឱ្យចាប់ខ្លួនជនជាប់ចោទ។
លោក លឹម ប៊ុនហេង បានបន្ថែមថា ជនជាប់ចោទឈ្មោះ ឆុន អំណត់ មិនព្រមចូលខ្លួននាពេលសវនាការតាមដីកាហៅឡើយ ទាល់តែសមត្ថកិច្ច ចាប់ខ្លួនតាមដីការបស់ចៅក្រមស៊ើបសួរ ទើបតុលាការអាចកាត់ទោសជននេះបាន ដូច្នេះគម្បីតុលាការពិចារណាក្នុងការឃុំខ្លួនជនជាប់ចោទជាបណ្ដោះអាសន្ន។
ប៉ុន្តែការស្នើសុំរបស់របស់តំណាងអយ្យការមិនត្រូវបានលោក ស៊ិន សុវណ្ណរ័ត្ន ចៅក្រមជំនុំជម្រះ លើកមកពិចារណានោះទេ ដោយសម្រេចដោះលែងជនជាប់ចោទឈ្មោះ ឆុន អំណត់ យ៉ាងរំភើយ៕
