ខេត្តកណ្តាល ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនសាធារណជន និងគណនីហ្វេសបុកសុំមិនដែលបានរាយការណ៍ក្នុងប្រអប់សារ ផេកហ្វេសបុកស្នងការដ្ឋាននគរបាលខេត្តកណ្ដាល ដែលមានខ្លឹមសារថា ៖ ខ្ញុំសូមមិនបញ្ចេញឈ្មោះ សូមគោរព លោកស្នងការខេត្ត មានអ្នកចែកចាយគ្រឿងញៀន យ៉ាងអនាធិបតេយ្យនៅក្នុងភូមិទ្រាំង ឃុំតាឯក ស្រុកខ្សាច់កណ្តាល ខេត្តកណ្ដាល ១-មានឈ្មោះ តា សក់បាស់ ២-អាឆាង សូមលោកស្នងការជួយមើលផង សូមអគុណ! ។
ក្រោយពីទទួលបានព័ត៌មានខាងលើភ្លាម ដោយមានការចង្អុលបង្ហាញពីក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្ត បានចាត់ឲ្យលោកអធិការនគរបាលស្រុកខ្សាច់កណ្តាល ស្រាវជ្រាវបង្រ្កាបករណីខាងលើ។
ជាលទ្ធផល៖ នៅថ្ងៃចន្ទ ០៦រោច ខែភទ្របទ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី២៧ ខែកញ្ញា ឆ្នាំ២០២១ វេលាម៉ោង១៣:៣០នាទី លោកអធិការ បានចាត់ឲ្យកម្លាំងផ្នែកជំនាញ សហការជាមួយកម្លាំងប៉ុស្តិ៍នគរបាលរដ្ឋបាលតាឯក ចុះស្រាវជ្រាវបង្រ្កាបករណីជួញដូរ និងរក្សាទុកនូវសារធាតុញៀនដោយខុសច្បាប់ ១ករណី នៅចំណុចក្នុងរោងមាត់ទន្លេ ភូមិទ្រាំងលេី ឃុំតាឯក ស្រុកខ្សាច់កណ្តាល ខេត្តកណ្តាល។
ជនសង្ស័យ ឈ្មោះ សេង ឆាន្នី ហៅសក់បាស់ ភេទប្រុស អាយុ២៦ឆ្នាំ មុខរបរកម្មករ បូមខ្សាច់ ជនជាតិខ្មែរ មានទីលំនៅកំណេីតភូមិព្រៃមិច ឃុំវាលពន់ ស្រុកថ្ពង ខេត្តកំពង់ស្ពឺ បច្ចុប្បន្នមកស្នាក់នៅធ្វេីការនៅភូមិទ្រាំងលេី ឃុំតាឯក ស្រុកខ្សាច់កណ្តាល ខេត្តកណ្តាល។
វត្ថុតាងចាប់យក៖
១-ថ្នាំញៀនប្រភេទមេតំហ្វេតាមីន ចំនួន០១កញ្ចប់មធ្យម (ទម្ងន់១,២៨ក្រាម)
២-ឧបករណ៍សម្រាប់ប្រេីប្រាស់ថ្នាំញៀនមួយចំនួន
៣-ទូរស័ព្ទដៃចំនួន០៣គ្រឿង។
បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកខ្សាច់កណ្តាល ដើម្បីអនុវត្តតាមនីតិវិធី។
ចំពោះមុខសញ្ញាដែលនៅសេសសល់ កម្លាំងជំនាញពាក់ព័ន្ធបន្តស្រាវជ្រាវបង្រ្កាបឃាត់ខ្លួនយកមកផ្តន្ទាទោសតាមច្បាប់។
អាស្រ័យហេតុនេះ សូមសាធារណជនដែលប្រើប្រាស់បណ្តាញសង្គមមេត្តាជ្រាប៕
