ខេត្ដបន្ទាយមានជ័យ៖( ព័ត៌មានបឋម)ករណីផ្ទុះអាវុធនៅក្រុងប៉ោយប៉ែត ដែលបង្កឡេីងដោយ ជនជាតិថៃមួយក្រុម និងក្រុមកាងជនជាតិថៃ បង្ករការអុកឡុក បង្កេីតជាបញ្ហាធ្វេីឱ្យប៉ះពាល់សណ្តាប់ធ្នាប់សាធារណៈ នៅយប់ថ្ងៃទី២០ ខែវិច្ឆិកា ឆ្នាំ២០២១។
យោងតាមរបាយការណ៍បឋមពី លោកឧត្តមសេនីយ៍ បោន ប៊ិន មេបញ្ជាការអាវុធហត្ថខេត្តបន្ទាយមានជ័យ បានបញ្ជាក់ឱ្យដឹងថា ករណីផ្ទុះអាវុធនៅក្រុងប៉ោយប៉ែត ជាការចុះបង្ក្រាបរបស់សមត្ថកិច្ច ចំពោះជនជាតិថៃមួយក្រុម និងក្រុមកាងជនជាតិថៃដែលបង្ករការអុកឡុកបង្ករបញ្ហាធ្វើឱ្យប៉ះពាល់ដល់សណ្តាប់ធ្នាប់សាធារណៈ។
ក្រុមបង្ករទាំងនោះបានប្រើដប គប់ទៅលើកម្លាំងអាវុធហត្ថ ព្រមទាំងបានប្រើអាវុធបាញ់ទៅលើសមត្ថកិច្ច បណ្តាលឱ្យកម្លាំងអាវុធហត្ថរងរបួសចំនួន ៣នាក់ ក្នុងនោះកម្លាំងអាវុធហត្ថម្នាក់ ត្រូវគ្រាប់កាំភ្លើងដែលជនបង្ករបាញ់ធ្លាយថ្ពាល់ និងថ្គាមពីម្ខាងទៅម្ខាងរបួសធ្ងន់ ទើបកម្លាំងសមត្ថកិច្ចសម្រេចចិត្តបាញ់ឡើងលើជាច្រើនគ្រាប់ ដើម្បីទប់ទល់ស្ថានការណ៍។
ក្នុងប្រតិបត្តិការបង្ក្រាបនោះ សមត្ថកិច្ចចាប់ខ្លួនក្រុមបង្កទាំងនោះបានចំនួន ១៥នាក់ និងកំពុងបន្តស្វែងរកចាប់ខ្លួនបក្សពួកក្រុមបង្កបញ្ហាបន្តបន្ទាប់ទៀត។ ចំណែកកម្លាំងសមត្ថកិច្ចដែលរងរបួស ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ៕
