ខេត្តបន្ទាយមានជ័យ៖គណ:បញ្ជាការកងឯកភាពរដ្ឋបាលខេត្តបន្ទាយមានជ័យនៅថ្ងៃអាទិត្យទី១២ខែធ្នូឆ្នាំ២០២១ បានដឹកនាំក្រុមការងារចម្រុះពិនិត្យនិងស្រាវជ្រាវការទន្ទ្រានដីព្រៃលិចទឹកត្រួតការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដីព្រៃលិចទឹកតំបន់៣បឹងទន្លេសាប ភូមិសាស្ត្រ២ឃុំនៃ២ស្រុក នៅខេត្តបន្ទាយមានជ័យ។
លោក អ៊ុំ រាត្រី អភិបាល នៃគណ:អភិបាលខេត្តបន្ទាយមានជ័យនិងជាប្រធានគណ:បញ្ជាការកងឯកភាពរដ្ឋបាលខេត្ត រួមដំណើរដោយលោកឧត្ដមសេនីយ៍ទោ សិទ្ធ ឡោះ ស្នងការដ្ឋាននគរបាលខេត្ត លោកកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងក្រុមការងារជំនាញថ្នាក់ខេត្ត បានអញ្ជើញចុះត្រួតពិនិត្យការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដីតំបន់៣ ព្រៃលិចទឹក នៃបឹងទន្លេសាប ស្ថិតក្នុងភូមិសាស្រ្តខេត្តបន្ទាយមានជ័យ ចំនួន០២គោលដៅ :
១-នៅចំណុចវាលអន្លក់ ស្ថិតក្នុងភូមិស្រណាល ឃុំសំបួរ ស្រុកមង្គលបូរី ខេត្តបន្ទាយមានជ័យ ។
២-នៅចំណុចអាងលីសំអាង ស្ថិតក្នុងភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
ដំណើរចុះបំពេញការងារទាំងថ្ងៃឈប់សម្រាកការងាររដ្ឋបែបនេះ គឺជាការអនុវត្តនូវបទបញ្ជាររបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលថ្លែងកាលពីថ្ងៃទី២៨ ខែវិច្ឆិកា ឆ្នាំ២០២១ ។
សម្តេចតេជោបានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តទាំង៦ ជាប់តំបន់ទំនាបព្រៃលិចទឹកនិងបឹងទន្លេសាប ត្រូវធ្វើការទប់ស្កាត់ និងបង្រ្កាបជាបន្ទាន់ ចំពោះការលួចកាប់ព្រៃលិចទឹក និងវាទទីយកដីនៅតាមបឹងទន្លេសាប។
ក្នុងនោះរដ្ឋបាលខេត្តកាលពីថ្ងៃទី៣០ខែវិច្ឆិកាឆ្នាំ២០២១ បានបង្កើតក្រុមការងារចម្រុះពិនិត្យនិងស្រាវជ្រាវការទន្ទ្រានដីព្រៃលិចទឹកនោះ៤ក្រុម ជំនួយការ។
ហើយក៏បានចេញលិខិតសជណស្តីពីការចុះទប់ស្កាត់ និងបង្ក្រាបការរុករានទន្ទ្រាន កាន់កាប់អាស្រ័យផលនៅភូមិសាស្ត្រទាំង៣ឃុំនៃ២ស្រុក។
ហើយមុននេះ ក្រុមការងារចម្រុះដឹកនាំដោយលោកអ៊ុំ រាត្រី និងលោកលាង មុន្នីរឹទ្ធ រដ្ឋលេខាធីការក្រសួងរៀបចំដែនដី កាលពីថ្ងៃទី២៩ខែសីហាឆ្នាំ២០២១ បានចុះពិនិត្យទីតាំងជាក់ស្តែង ជាមួយក្រុមការងារបច្ចេកទេសដើម្បីស្វែងរកនិងផ្ទៀងផ្ទាត់បង្គោលតំបន់៣ ភូមិសាស្ត្រខេត្តចំនួន២៦បង្គោល គឺត្រឹមត្រូវតាមនិយាយក្នុងអនុក្រឹត្យលេខ១៩៧អនក្រ.បកចុះថ្ងៃទី២៩ខែសីហាឆ្នាំ២០១១ ស្តីពីការកំណត់ដែនព្រៃលិចទឹកក្នុងតំបន់៣បឹងទន្លេសាបមានចំនួន៦៤៧.៤០៦ហិចតា ស្ថិតនៅក្នុងខេត្តទាំង៦ជុំវិញបឹងទន្លេសាប (កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាបនិងកំពង់ធំ ) ។
ដោយឡែក នៅភូមិសាស្ត្រខេត្តបន្ទាយមានជ័យ មានទំហំ១២.២៩៧ហិចតានិងមាន៤៨ ចំណុចនិយាយការ ស្ថិតនៅក្នុងឃុំប្រាសាទនិងភ្នំលៀបស្រុកព្រះនេត្រព្រះនិងឃុំសំបួរស្រុកមង្គលបូរី ។ឆ្នាំ២០១០-២០១១ ត្រូវបានបោះបង្គោលកំណត់ព្រំដីតំបន់ ថ្នាក់ជាតិបាន១១បង្គោលនិងថ្នាក់ខេត្តបាន១៥បង្គោល ។
ក្នុងនោះ ជាលទ្ធផលចុះត្រួតពិនិត្យរបស់ក្រុមចម្រុះ បានរកឃើញថា : បង្គោលខ្លះរក្សាទ្រង់ទ្រាយដើម ខ្លះដួល ទ្រេត រលំ ខ្លះខុសទីតាំង ខ្លះបាត់និងខ្លះចូលមិនដល់ ។
ការស្រាវជ្រាវបឋមរបស់មន្ទូីរកសិកម្មខេត្ត រកឃើញការទន្ទ្រានចាស់លើដីព្រៃលិចទឹក តំបន់៣ ចំនួន១១ទីតាំង ស្មើទំហំ៥.៣៥០ហិចតា ។
គឺនៅឃុំប្រាសាទ ៣ទីតាំងស្មើ៦៥០ហិចតា ។នៅឃុំភ្នំលៀប ៨ទីតាំង ស្មើ៤.៧០០ហិចតា ។
ក្រោយបទបញ្ជាសម្តេចតេជោ ក្រុមចម្រុះខេត្តបានចុះពិនិត្យ ហើយរបាយការណ៍របស់កងរាជអាវុធហត្ថខេត្ត បានរកឃើញនៅចំណុច៣ខាងលើ ថាមានការរំលោភចូលអាស្រ័យផលពីពលរដ្ឋចំនួន ៤៣៩នាក់(ពលរដ្ឋក្នុងមូលដ្ឋាន៤១៩នាក់) អស់ផ្ទៃដីប្រមាណ៧.៨៣៤,២៤ហិចតា ។
ខេត្តក៏លើកឡើងពីទិសដៅបន្ត ការស្នើសុំគោលការណ៍ណែនាំអនុវត្តបន្តចំនួន៨ចំណុច ។
សូមបញ្ជាក់ដែរថា អនុវត្តតាមបទបញ្ជារបស់សម្ដេចតេជោហ៊ុនសែននាយករដ្ឋមន្ត្រីនៃកម្ពុជាបានឲ្យ លោក ជា សុផារ៉ា ឧបនាយករដ្ឋមន្ត្រី និងរដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ ដឹកនាំប្រតិភូក្រុមការងារអន្តរក្រសួងចុះទៅខេត្តទាំង៦ ជុំវិញបឹងទន្លេសាប ពីថ្ងៃទី២៩ខែធ្នូឆ្នាំ២០២១ ។
ហើយ នៅខេត្តបន្ទាយមានជ័យកាលពីថ្ងៃទី០៦ខែធ្នូឆ្នាំ២០២១ ប្រតិភូនេះ បានបើកកិច្ចប្រជុំបន្ទាន់មួយស្តីពីក្រុមការងារថ្នាក់ជាតិចុះពិនិត្យព្រៃលិចទឹកតំបន់បឹងទន្លេសាបក្នុងតំបន់៣ ក្នុងភូមិសាស្ត្រខេ
ត្តបន្ទាយមានជ័យ ក៏មានចុះពិនិត្យទីតាំងនៅឃុំភ្នំលៀបនិងឃុំប្រាសាទស្រុកព្រះនេត្រព្រះផងដែរ ។
ជារួម លោកឧបនាយករដ្ឋមន្រ្តី ជា សុផារ៉ា ក៏បានដាក់ចេញផែនការ និងវិធានការ ចំនួន៧ចំណុចដូចខាងក្រោម៖
១៖ ជូនរដ្ឋបាលខេត្តបន្ទាយមានជ័យចេញលិខិតណែនាំដល់អាជ្ញាធរស្រុក ឃុំ បញ្ចប់ការពិនិត្យបញ្ជាក់ លើលិខិតសុំកាន់កាប់ដី និងលិខិតផ្ទេរសិទ្ធិកាន់កាប់ដី ក្នុងដែនព្រៃលិចទឹក ព្រមទាំងចេញលិខិតបដិសេធ លើរាល់លិខិតដែលបានចេញរួចពីពេលមុន៕
