ខេត្តស្វាយរៀង ៖ លោកស្រី ហុឹម ម៉ាលី សមាជិកក្រុមការងារថ្នាក់កណ្តាលចុះជួយឃុំសង្កែ បានជួបសំណេះសំណាលជាមួយបងប្អូនប្រជាពលរដ្ឋចំនួនពីរភូមិនៅឃុំសង្កែ ស្រុករំដួល ខេត្តស្វាយរៀង នាព្រឹកថ្ងៃសៅរ៍ ១៣ កើត ខែបុស្ស ឆ្នាំឆ្លូវ ត្រីស័ក ពុទ្ធសករាជ ២៥៦៥ត្រូវនឹងថ្ងៃទី១៥ ខែមករា ឆ្នាំ២០២២។
លោកស្រី ហុឹម ម៉ាលី សមាជិកក្រុមការងារថ្នាក់កណ្តាលចុះជួយឃុំសង្កែ ត្រូវជាម្តាយបង្កើតរបស់លោកឧត្តមសេនីយ៍ទោ ហេង ឡាលី និងកូនៗ បាននាំយកអំណោយមកចែកជូនដល់ប្រជាពលរដ្ឋចំនួន២៤៩ គ្រួសារនៅក្នុងមូលដ្ឋានឃុំសង្កែ ហើយលោកស្រីបានជួបសំណេះសំណាល និងបានពាំនាំនូវពាក្យផ្តាំផ្ញើរបស់ថ្នាក់ដឹកនាំគណៈបក្សប្រជាជនកម្ពុជា ដែលតែងតែនឹករលឹកដល់បងប្អូនប្រជាពលរដ្ឋទាំងអស់គ្នាពីចម្ងាយផងដែរ ។
នៅក្នុងពិធីនោះមានការអញ្ជើញចូលរួមពី លោកអនុប្រធានគណៈបក្សប្រជាជនកម្ពុជាស្រុករំដួល លោកប្រធានគណៈបក្សប្រជាជនកម្ពុជាឃុំសង្កែ និងសមាជិកសមាជិការគណបក្សប្រជាជនកម្ពុជាចំនួនពីរភូមិនៅក្នុងឃុំសង្កែ ។
លោក ពៅ សាមឿន ប្រធានគណបក្សប្រជាជនកម្ពុជាឃុំសង្កែបានថ្លែងនៅក្នុងពិធីនោះថា លោកស្រី ហុឹម ម៉ាលី និងកូនៗរបស់គាត់រួមមាន ៖ លោកស្រី ឈាង ម៉ាឡៃ និងស្វាមុី ព្រមទាំងបុត្រ លោក ឈាង ម៉ាឡា និងលោកស្រី ព្រមទាំងបុត្រ លោក ហេង ឌី និងលោកស្រី ព្រមទាំងបុត្រក លោកឧត្តមសេនីយ៍ទោ ហេង ឡាលីន និងលោកជំទាវ ព្រមទាំងបុត្រ។ ដោយលោកស្រី និងកូនៗតែងតែចំណាយទ្រព្យសម្បត្តិផ្ទាល់ខ្លួនជួយឧត្ថម្ភកសាងនូវសមមិទ្ធផលផ្សេងៗនៅក្នុងមូលដ្ឋានឃុំសង្កែយ៉ាងច្រើនគួរឲ្យកត់សម្គាល់ជាបន្តបន្ទាប់ ។
នៅក្នុងពិធីជួបសំណេះសំណាលនោះក៏មានការចែកអំណោយជូនដល់សមាជិកបក្ស និងបងប្អូនប្រជាពលរដ្ឋទាំងអស់ចំនួន ២៤៩គ្រួសារមកពីភូមិទួលចំបក់ និងភូមិតាប៉ោ ។
អំណោយដែលទទួលបានក្នុងម្នាក់ៗរួមមានគ្រឿងឧបភោគបរិភោគ និង ថវិកាម្នាក់ៗ ចំនួន២មុឺនរៀល ។ ចំពោះចាស់ជរា និង ជនពិការក្នុងម្នាក់ៗទទួលបានថវិកាចំនួន ៥មុឺរៀលបន្ថែមទៀត។
ឆ្លៀតនៅក្នុងឱកាសនោះផងដែរលោកស្រី ហុឹម ម៉ាលីសមាជិកក្រុមការងារថ្នាក់កណ្តាលចុះជួយឃុំសង្កែបានមានប្រសាសន៍ណែនាំពន្យល់ដល់បងប្អូនប្រជាពលរដ្ឋដែលមកទទួលអំណោយទាំងអស់ សូមកុំចាញ់បោកលើគណបក្សនយោបាយផ្សេង ត្រូវជឿជាក់លើកគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រីដឹកនាំអស់រយៈ ពេល៤៣ឆ្នាំហើយក្រោមម្លប់សន្តិភាព និងការរីកចំរើននៅគ្រប់វិស័យ។
លោកស្រីបានលើកឡើងថា មានតែគណបក្សប្រជាជនកម្ពុជាតែមួយគត់ដែលរំដោះបងប្អូនប្រជាពលរដ្ឋឲ្យរួចផុតពីរបបប្រល័យពូជសាសន៍ នាំមកនូវសន្តិភាព សុខដុមរម្យនា រួមសុខរួមទុក្ខជាមួយប្រជាពលរដ្ឋ ខិតខំកសាងប្រទេសពីបាតដៃទទេ រហូតមានអ្វីៗគ្រប់សព្វបែបយ៉ាងដល់បច្ចុប្បន្ននេះ ។ ជាពិសេស ថ្នាក់ដឹកនាំគណបក្សប្រជា ជនតែងតែនៅជាប់ជាមួយបងប្អូនប្រជាពលរដ្ឋ ទីណាប្រជាពលរដ្ឋមានទុក្ខ ទីនោះមានមុខថ្នាក់ដឹកនាំគណបក្សប្រជាជនជួយជានិច្ច ហើយចំណុចពិសេសទៀតនោះគឺថ្នាក់ដឹកនាំគណបក្សប្រជាជនកម្ពុជាមិនដែលរត់ចោលបងប្អូនប្រជាពលរដ្ឋដូចមេបក្សផ្សេងៗនោះទេ ពោលគឺនៅជាប់ជាមួយបងប្អូនប្រជាពលរដ្ឋគ្រប់កាល:ទេស:ទាំងអស់ ។
លោស្រី ហុឹម ម៉ាលី បានបញ្ជាក់ថាអំណោយ និងថវិកាដែលយកមកកសាងគឺបានមកពីការជួយឧបត្ថម្ភពីកូនៗរបស់លោកស្រី ជាពិសេសកូនពៅលោកស្រី គឺឯកឧត្តម ហេង ឡាលីន ដែលតែងតែផ្តល់ថវិកាផ្ទាល់ខ្លួនឲ្យលោកស្រីធ្វើបុណ្យធ្វើទានចែកអំណោយជូនបងប្អូនដែលមានជីវភាពខ្វះខាត ចាស់ជរា និងជនពិការជាបន្តបន្ទាប់។
លោកស្រីក៏បានក្រើនរំលឹកដល់បងប្អូនប្រជាពលរដ្ឋទាំងអស់គ្នាត្រូវបន្តចូលរួមប្រុងប្រយ័ត្នឲ្យបានខ្ពស់បន្តទៀតនូវជំងឺកូវីដ១៩ ដោយត្រូវធ្វើអនាម័យជាប់ជាប្រចាំ ដោយអនុវត្តន៍វិធានការតាមការណែនាំរបស់ក្រសួងសុខាភិបាលអោយបានត្រឹមត្រូវ និងអនុវត្តអោយបានម៉ឺងម៉ាត់នូវវិធានការបង្ការ ការពារ និងទប់ស្កាត់ ការរីករាលដាលនៃជំងឺកូវីដ-១៩ កុំអោយកើតក្នុងគ្រួសារ និងនៅក្នុងសហគមន៍របស់យើង ពិសេសត្រូវបន្តអនុវត្តន៍ឲ្យបានខ្ជាប់ខ្ជួននូវវិធានការ ៣ការពារ ៣កុំ ដែលបានដាក់ចេញដោយប្រមុខរាជរដ្ឋាភិបាល ៕
