ខេត្ដបន្ទាយមានជ័យ៖ សំណង់តូបផ្សារអត់ច្បាប់ ប្រមាណជាង ១០តូប ដែលសាងសង់រំលោភលើផ្លូវសាធារណៈ នឹងគ្មានការអនុញ្ញាតពីអាជ្ញាធរ ស្ថិតនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត កំពុងតែនៅបន្តសាងសង់យ៉ាងគឃ្លើន ដោយមិនគោរពតាមសេចក្តីជូនដំណឹងរបស់សាលាក្រុងប៉ោយប៉ែតនោះឡើយ។
មហាជន លើកឡើង ថា៖ ហេតុអ្វីបានជាម្ចាស់ការដ្ឋានសំណង់ស្តងលក់ទំនិញ (តូប) ដែលមានទីតាំងចំណុចខាងលើ នៅតែបន្តការសាងសង់ ដោយមិនគោរពតាមសេចក្តីជូនដំណឹង ថែមទាំងមិនខ្លាចសិទ្ធិអំណាចរបស់អាជ្ញាធរ បន្តិចសោះ (ពោលគឺ៖ បន្តការសាងសង់បានយ៉ាងរលូន ដោយគ្មានការរំខានដល់មន្ត្រីពាក់ព័ន្ធនោះឡើយ)។
មហាជនដាក់ការសង្ស័យថា ៖ «ប្រហែលជាម្ចាស់ការដ្ឋាន ហើយនិងអាជ្ញាធរមូលដ្ឋាន មានការត្រូវរ៉ូវគ្នាអ្វីមួយហើយមើលទៅ ទើបអាចបន្តការសាងសង់បានដោយធម្មតា នឹងគ្មានការរំខានដ៏មន្ត្រីពាក់ព័ន្ធ ក្នុងមូលដ្ឋាន»។
ជុំវិញករណីខាងលើនេះសារព័ត៌មានយើងព្យាមយាមសុំការបំភ្លឺពីលោក លោក គាត ហ៊ុល អភិបាលក្រុងប៉ោយប៉ែត តាមរយៈទូរសព្ទ តែទូរសព្ទ មិនអាចទំនាក់ទំនងបាន។
សូមរម្លឹកដែរថា៖ កាលពីថ្ងៃទី១៤ ខែមករា ឆ្នាំ២០២២ កន្លងទៅថ្មីៗនេះ រដ្ឋបាលក្រុងប៉ោយប៉ែត បានចេញសេចក្តីជូនដំណឹង ដោយតម្រូវឱ្យម្ចាស់សំណង់ផ្អាក ការសាងសង់ និងធ្វើការ រុះរើ។
ពាក់ព័ន្ធទៅនឹងករណីខាងលើនេះ ដែរអង្គភាពសារព័ត៌មានយើង នឹងរង់ចាំធ្វើការផ្សាយជាបន្តបន្ទាប់ទៀត ប្រសិនជាមានការពន្យល់ឬបំភ្លឺ ពីអាជ្ញាធរពាក់ព័ន្ធក្នុងមូលដ្ឋានដើម្បីកុំអោយមហាជនយល់ច្រឡំ៕
