ភ្នំពេញ៖ បេីទោះជា ឯកឧត្តម ឃួង ស្រេង អភិបាលរាជធានីភ្នំពេញ ប្រឹងស្រែក ឲ្យមន្ត្រីក្រោមឱវាទខ្លួនបង្ក្រាបជាដាច់ខាតនូវល្បែងស៊ីសង និងបញ្ហាគ្រឿងញៀន ក្នុងមូលដ្ឋានរាជធានីភ្នំពេញអស់ក៏ដោយ ក៏គេសង្កេតឃើញថាទីតាំងឆ្នោតវៀតណាមរបស់ ចែលី និង ឆ្នោតវៀតណាមយីហោ LH34 នៅតែបន្តបេីកដំណើរការស្វាគមន៍អតិថិជនមកពីគ្រប់មជ្ឈដ្ឋានបាននៅឡើយទេ នៅភូមិសាស្ត្រខណ្ឌ ៧មករា ដេីម្បីកេីបលុយរាប់លានក្នុងមួយថ្ងៃៗពីក្រុមអ្នកញៀនល្បែងផ្សងសំណាងប្រភេទនេះ។
នៅក្នុងមូលដ្ឋានខណ្ឌ៧មករា ប្រជាពលរដ្ឋបានឲ្យដឹងថា ទីតាំងកត់ឆ្នោវៀតណាមរបស់ ចែលី ជាច្រេីនទីតាំងក្នុងនោះរួមមានទី១ស្ថិតនៅផ្លូវលេង១៦៤ ក្នុងសង្កាត់អូរឫស្សីទី៣ ទីតាំងទី២ ស្ថិតនៅផ្លូវឌឿងហែមក្រោយភោជនីដ្ឋានថ្មដា ប្រមាណជាង១០០ម៉ែត្រ ក្នុងសង្កាត់មនោរម្យ ទីតាំងទី៣ស្ថិតនៅផ្លូវលេខ១៦៦ ក្នុងសង្កាត់អូរឫស្សីទី២ ទីតាំងទី៤ស្ថិតនៅច្រកឌឿងហែមខាងក្រោយហាងគុយទាវអូរឬស្សី ស្ថិតនៅក្នុងសង្កាត់អូរឬស្សីទី៤និងមានទីតាំងជាច្រើនទៀតនៅក្នុងមូលដ្ឋានខណ្ឌ៧មករា។
ក្នុងនោះដែរក៏មាន ឆ្នោតវៀតណាមខុសច្បាប់ មានស្លាកសម្គាល់ LH34 មានចំនួន៣ទីតាំងដែរ ដោយទីតាំងទី១- ស្ថិតនៅជាប់ខាងក្រោយសាលាបើកបររថយន្តអាស៊ាន នៅតាមបណ្ដោយផ្លូវ១៦១ ក្នុងសង្កាត់អូរឫស្សីទី២ ខណ្ឌ៧មករា ។
ទីតាំងទី២- ស្ថិតនៅតាមបណ្ដោយផ្លូវ១៦៤ សង្កាត់អូរឫស្សីទី៣ ខណ្ឌ៧មករា និងទីតាំងទី៣-ស្ថិតនៅផ្ទះលេខ១៤៦Eoz តាមបណ្ដោយផ្លូវឌឿងហែមមួយខែ្ស ដែលគេហៅផ្លូវលេខ១២៨ ស្ថិតនៅក្នុងសង្កាត់មនោរម្យ ខណ្ឌ៧មករា ។
ប្រជាពលរដ្ឋរង់ចាំមើលថា តើប្រសាសន៍របស់ឯកឧត្តម ឃួង ស្រេង អភិបាលរាជធានីភ្នំពេញ សាបដូចទឹកទន្លេ ឬក៏ប្រៃ អាស្រ័យលេី លោក លីម សុភា អភិបាលខណ្ឌ៧មករា និងលោក នេត ស៊ីថុន អធិការខណ្ឌ ៧មករាហើយពេលនេះ បេីទីតាំងឆ្នោតវៀតណាមរបស់ចែលី និងឆ្នោតវៀតណាមយីហោ LH 34 នៅតែបន្តដេីររាល់ថ្ងៃបែបនេះ៕
