ស្រុកម៉ាឡៃ៖ នៅយប់ថ្ងៃព្រហស្បតិ៍ ១៥កើត ខែផល្គុន ឆ្នាំឆ្លូវ ត្រីស័ក ព.ស២៥៦៥ ត្រូវនិងថ្ងៃទី១៧ ខែមីនាឆ្នាំ២០២២នេះ នៅវេលាម៉ោង ០០នឹង០១នាទីរំលងអាធ្រាតក្រោមការចង្អុលបង្ហាញ ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ លោកវរសេនីយ៍ឯក សួង សៅ មេបញ្ជាការ វរសេនាតូចនគរបាលការពារព្រំដែនគោកលេខ៨១៥ បានចាត់ឲ្យលោកវរសេនីយ៍ទោ មាស ម៉េងហួង មេបញ្ជាការរង ទទួលទិសប៉ុស្តិ៍ចំបក់ បានដឹកនាំកម្លាំងនគរបាលប៉ុស្ដិ៍ចំបក់ចំនួន ០៤នាក់ សហការជាមួយកម្លាំងកងរាជអាវុធហត្ថស្រុកម៉ាឡៃ បានទប់ស្កាត់ប្រជាពលរដ្ឋបម្រុងលួចឆ្លងដែនខុសច្បាប់ចំនួន ១៤នាក់ ក្នុងនោះមានស្ត្រី០៥នាក់ និងកុមារម្នាក់ នៅចំណុចផ្លូវលំ ស្ថិតនៅក្នុងភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ (ចម្ងាយពីផ្លូវជាតិលេខ៥៩ប្រហែល ១០០ម៉ែត្រ) និងរថយន្ដ ០១គ្រឿង ម៉ាកនីសាន់ ពណ៌ទឹកប្រាក់ ស្លាកកលេខប.មានជ័យ ២B -3443 ។
ប្រភពបានបញ្ជាក់បន្ថែមថា ក្នុងចំណោមប្រជាពលរដ្ឋទាំង ១៤នាក់ មានម្នាក់ឈ្មោះ លឿម បូរី ភេទប្រុស អាយុ ៤០ឆ្នាំ មានទីលំនៅភូមិចំបក់ ឃុំបឹងបេង ស្រុកម៉ាឡៃ ខេត្ដបន្ទាយមានជ័យ ជាអ្នកបើកបររថយន្ត។
ប្រភពដដែលបានបន្តទៀតថា លោកវរសេនីយ៍ទោ មាស ម៉េងហួង មេបញ្ជាការរង វរសេនាតូចនគរបាលការពារព្រំដែនគោកលេខ៨១៥ បានធ្វើការណែនាំស្ដីពីការឆ្លងរាលដាលរបស់ Virus Covid-19 រួចបានប្រគល់ពួកគាត់ឱ្យទៅកម្លាំងកងរាជអាវុធហត្ថ បានបញ្ជូនពួកគាត់ចំនួន ១៣នាក់ ទៅមណ្ឌលចត្ដាឡីស័ក ចំណែកតៃកុងរថយន្ដ បានបញ្ជូនទៅបញ្ជាការដ្ឋានកងរាជអាវុធហត្ថខេត្ដបន្ទាយមានជ័យ ដើម្បីចាត់វិធានការបន្តតាមនីតិវិធីច្បាប់ ៕
