ខេត្ដស្វាយរៀង៖ កម្មករកម្មការិនីរោងចក្រជាច្រើននាក់ បានរងរបួសធ្ងន់ នស្រាល ករណីក្រឡាប់ឡាន នៅលើផ្លូវលេខ៣៣៤ ស្ថិតក្នុងភូមិត្រពាំងកំពិស ឃុំខ្សែត្រ ស្រុកកំពង់រោទិ៍ កាលពីវេលាម៉ោង ០៦ និង៣០នាទីល្ងាច ថ្ងៃទី៣០ ខែមីនា ឆ្នាំ២០២២។
សមត្ថកិច្ចបានឲ្យដឹងថា មុនពេលកើតហេតុមានរថយន្តបង្កម៉ាក Hyundai ចំណុះ ៥តោន ពណ៌ស ពាក់ស្លាកលេខ ស្វាយរៀង 3A-2458 មានដឹកកម្មករ កម្មការិនីរោងចក្រ ចំនួន ៦៨នាក់ ចេញពីរោងចក្រ ដើម្បីដាក់ក្រុមកម្មករកម្មការិនីតាមផ្ទះ។ លុះមកដលចំណុចកើតហេតុ រថយន្តខាងលើបានវ៉ាជែងរថយន្តមួយគ្រឿងទៀត ក្នុងស្ថានភាពគ្រោះថ្នាក់ ទើបបណ្ដាលឲ្យរថយន្តផ្អៀងធ្លាក់ចិញ្ចើមថ្នល់ បណ្តាលឲ្យបងប្អូនកម្មករ ចំនួន ១៨នាក់ បានរបួសធ្ងន់ស្រាល ហើយត្រូវបានសមត្ថកិច្ចហៅរថយន្តសង្គ្រោះដឹកជញ្ជូនអ្នករងរបួសទៅកាន់មន្ទីរពេទ្យស្រុកស្វាយទាបដើម្បីសង្គ្រោះ។
សមត្ថកិច្ចបានបញ្ចាក់ថា រថយន្តក្រឡាបខាងលើបើកបរដោយឈ្មោះ ម៉ឹក រតនា ភេទប្រុស អាយុ ២៤ឆ្នាំ មានទីលំនៅភូមិបន្ទាយក្រាំង ឃុំបន្ទាយក្រាំង ស្រុកកំពង់រោទិ៍ ខេត្តស្វាយរៀង ក្រោយកើតហេតុបានរត់គេចខ្លួនបាត់ពីកន្លែងកើតហេតុ។
បច្ចុប្បន្ន រថយន្តបង្កត្រូវបានជំនាញយកមករក្សាទុកនៅប៉ុស្តិ៍នគរបាលរដ្ឋបាលខ្សែត្រ ដើម្បីរងចាំម្ចាស់រថយន្តចូលខ្លួនដោះស្រាយ ចំណែកអ្នករបួសត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកស្វាយទាប៕
