ខេត្ដកំពង់ឆ្នាំង៖ ទំនប់ចាក់ទឹម ស្ថិតនៅក្នុងភូមិកោះខ្ទុម ឃុំជៀប ស្រុកទឹកផុស ត្រូវបានបាក់ស្រុតហូរច្រោះ ព្រោះជំនន់ទឹកភ្លៀង អស់ប្រវែង៥០ម៉ែត្រ កាលពីយប់ម៉ោង ២៖០០នាទី រំលងអាធ្រាត្រឈានចូលថ្ងៃទី២០ ខែកក្កដា ឆ្នាំ២០២២ ដែលករណីបាក់ទំនប់នេះបានកាត់ផ្ដាច់ផ្លូវធ្វើដំណើរទៅលេងតំបន់ទេសចរណ៍ទឹកធ្លាក់ថ្មក្រាល។
លោក ខែម វិបុល អធិការនគរបាលស្រុកទឹកផុស នៅព្រឹកថ្ងៃទី២០ ខែកក្កដានេះ បានឲ្យដឹងថា៖ ដោយសារកាលពីថ្ងៃទី១៩ ម្សិលមិញនេះភ្លៀងបានធ្លាក់ពេញមួយថ្ងៃមួយយប់ បង្កឲ្យទំនប់ចាក់ទឹម ត្រូវជន់បាក់អស់ប្រវែង ប្រមាណ៥០ម៉ែត្រនៅ វេលាម៉ោង២រំលងអាធ្រាត្រ ឈានចូលថ្ងៃទី២០ ខែកក្កដានេះ។
ករណីបាក់ទំនប់នេះបានធ្វើឱ្យបាត់បង់ទ្រព្យសម្បត្តិប្រជាពលរដ្ឋមួយខ្នងផ្ទះនៅខាងក្រោមទំនប់ផងដែរ ប៉ុន្តែមិនបណ្ដាលឱ្យមានគ្រោះថ្នាក់ដល់ជីវិតមនុស្សឡើយ។
ទាក់ទងនឹងករណីនេះ លោក ដោក ប៊ុនថុន ប្រធានមន្ទីរធនធានទឹកខេត្តកំពង់ឆ្នាំង នៅព្រឹកថ្ងៃទី២០ ខែកក្កដានេះ បានបញ្ជាក់ថា៖ ទំនប់ចាក់ទឹមពិតជាត្រូវជំនន់ទឹកភ្លៀងជន់បាក់ប្រវែង៥០ម៉ែត្រ ពិតមែនកាលយប់មិញនេះដោយសារតែធ្លាក់ភ្លៀងពេញមួយថ្ងៃមួយយប់។
ជាមួយគ្នានេះ ខាងមន្ទីរធនធានទឹកកន្លងមក កំពុងកសាងទំនប់ទ្វារទឹកដែរ ដូច្នេះពីទំនប់នេះនឹងបន្តទប់ឲ្យបានរឹងមាំជាងមុន ព្រោះទំនប់នេះជំនាន់ប៉ុលពតពុំបានធ្វើគ្រឹះរឹងមាំតាមលក្ខណៈបច្ចេកទេសនោះទេ។
អាជ្ញាធរខេត្តកំពង់ឆ្នាំង និងមន្ទីរទេសចរណ៍ខេត្តកំពង់ឆ្នាំង បានជូនដំណឹងដល់បងប្អូនប្រជាពលរដ្ឋ និងអ្នកទេសចរណ៍។
ចំពោះការធ្វើដំណើរទៅលេងតំបន់ទឹកធ្លាក់ថ្មក្រាល ក្នុងភូមិកោះខ្ទុម និងភូមិចំការម៉ុច ត្រូវផ្អាកមួយរយៈសិន។
ដើម្បីឱ្យមន្ត្រីជំនាញ ជួសជុលផ្លូវទំនប់ដែលដាច់ខាងលើនេះ ពេលធ្វើរួចរាល់ទើបបងប្អូន អាចទៅលេងតំបន់ទឹកធ្លាក់ថ្មក្រាលបាន៕
