ខេត្ដស្វាយរៀង៖ នាព្រឹកថ្ងៃព្រហស្បតិ៍ ១៤កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែសីហា ឆ្នាំ២០២២ រដ្ឋបាលក្រុងស្វាយរៀង បានរៀបចំកិច្ចប្រជុំបូកសរុបលទ្ធផលការងារប្រចាំខែសីហា ឆ្នាំ២០២២ និងទិសដៅអនុវត្តបន្ត របស់រដ្ឋបាលក្រុងស្វាយរៀង ក្រោមអធិបតីភាពលោក ណុប ចំរើន អភិបាល នៃគណៈអភិបាលក្រុងស្វាយរៀង។
ក្នុងកិច្ចប្រជុំនោះដែរ មានការអញ្ជើញចូលរួមពីលោក លោកស្រីអភិបាលរងក្រុង លោកនាយក នាយករងរដ្ឋបាលសាលាក្រុង កងកម្លាំងទាំង៣ចំណុះរដ្ឋបាលក្រុង លោក លោកស្រីប្រធានការិយាល័យ អង្គភាពទាំង១៣ ចំណុះសាលាក្រុង លោក លោកស្រីចៅសង្កាត់ ស្មៀនសង្កាត់ និងនាយប៉ុស្តិ៍រដ្ឋបាលសង្កាត់ ទាំង ៧ក្នុងក្រុង។
ថ្លែងក្នុងឱកាសនោះដែរ លោកអភិបាលក្រុង បានមានប្រសាសន៍ថ្លែងអំណរគុណ និងកោតសរសើរ ដល់លោក លោកស្រី ជាមន្ត្រីរាជការ កងកម្លាំង និងអាជ្ញារធរមូលដ្ឋានគ្រប់លំដាប់ថ្នាក់ក្នុងក្រុងស្វាយរៀង ដែលតែងតែចូលរួមសហការ និងអនុវត្តតាមតួនាទីភារកិច្ចរបស់ខ្លួនប្រកបដោយឆន្ទៈ និងស្មារតីទទួលខុសត្រូវខ្ពស់ ដែលបានបង្ហាញ នូវលទ្ធផលការងារល្អទាំងការផ្តល់សេវាសាធារណៈ និងការថែរក្សាសន្ដិសុខ សុវត្ថិភាពជូនដល់ប្រជាពលរដ្ឋ។
លោក បានបន្ថែមថា ទោះបីទទួលបានលទ្ធផលការងារល្អ គួរកត់សម្គាល់ក្តី ក៏នៅមានបញ្ហាមួយចំនួនទៀត ដែលទាមទារឱ្យលោក លោកស្រីបន្តខិតខំបន្ថែមដើម្បីបំពេញជូនប្រជាពលរដ្ឋ។
លោកអភិបាលក្រុងស្វាយរៀង បានដាក់ចេញនូវទិសដៅអនុវត្តបន្តចំនួន៩ចំណុចដូចខាងក្រោម៖
– បន្តយកចិត្តទុកដាក់ខ្ពស់លើការផ្តល់សេវាសាធារណៈជូនប្រជាពលរដ្ឋ។
– សង្កាត់ទាំង ៧ ត្រូវពិនិត្យរៀបចំកែសម្រួលគណៈកម្មាធិការ គណៈកម្មការ ក្រុមការងារ ក្នុងអាណត្តិថ្មីនេះ ទៅតាមការណែនាំ និងភាពចាំបាច់របស់សង្កាត់។
– សង្កាត់ទាំង៧ ត្រូវពិនិត្យ នីតិវិធី និងទម្រង់ផ្សេងៗ សម្រាប់អនុវត្តការងារយន្តការច្រកចេញចូលតែមួយសង្កាត់ ពិសេសការកំណត់តម្លៃសេវា ត្រូវពិនិត្យឱ្យបានច្បាស់លាស់ និងត្រឹមត្រូវ។
– ក្រុមការងាររដ្ឋបាលក្រុង និងសង្កាត់ត្រូវបន្តពង្រឹងយន្តការដោះស្រាយវិវាទក្រៅប្រព័ន្ធតុលាការ។
– សង្កាត់ទាំង៧ ត្រូវជំរុញការធ្វើបច្ចុប្បន្នភាពចាក់វ៉ាក់សាំងបង្ការជំងឺកូវីដ-១៩។
– រដ្ឋបាលសង្កាត់ត្រូវរៀបចំសេចក្ដីជូនដំណឹង ស្តីពីការចូលរួមថែរក្សាអនាម័យបរិស្ថាន ពិសេសហាមឃាត់ការចាក់បេតុង រៀបការ៉ឺឡា លុបលើផ្លូវបង្ហូរទឹក និងលុបមាត់រ៉ឺហ្គែរ។
– បន្តអនុវត្តគោលនយោបាយភូមិ ឃុំ សង្កាត់ មានសុវត្ថិភាព ឱ្យមានប្រសិទ្ធភាពខ្ពស់។
– ពង្រឹងយន្តការគ្រប់គ្រងសំណង់អនាធិបតេយ្យគ្មានច្បាប់អនុញ្ញាត។
– រដ្ឋបាលសង្កាត់ត្រូវធ្វើការរៀបចំសណ្តាប់ធ្នាប់លើការតាំងលក់ តសំយាបលើផ្លូវសាធារណៈ៕
