ខេត្តបន្ទាយមានជ័យ៖ រសៀលថ្ងៃទី០៥ ខែកញ្ញា ឆ្នាំ២០២២ នៅវេលាម៉ោង០១និង១៥នាទី គ្រោះថ្នាក់ចរាចរណ៍ កើតឡើងនៅចំណុចផ្លូវជាតិលេខ៥៦Aប្រសព្វបំបែកជាបី ក្នុងភូមិស្ទឹង ឃុំរលួស ស្រុកស្វាយចេក ខេត្តបន្ទាយមានជ័យរវាងម៉ូតូបុកគោយន្តកន្ត្រៃ បណ្ដាលឲ្យបុរសម្នាក់បាក់ភ្លៅរបួសធ្ងន់ ។
ប្រភពព័ត៌មានពីនគរបាល ស្រុកស្វាយចេក បានឲ្យដឹងថា៖បុរសរងគ្រោះឈ្មោះ ប៉ិន ច័ន្ទប៊ីលី ភេទប្រុស អាយុ ១៩ ឆ្នាំ រសនៅភូមិ២ សង្កាត់កំពងស្វាយ ក្រុងសិរីសោភ័ណ ខេត្តបន្ទាយមានជ័យ បើកបរម៉ូតូម៉ាកហុងដាឌ្រីមc125សេរីឆ្នាំ២០១៣ ពណ៌ខ្មៅពាក់ស្លាកលេខ បន្ទាយមានជ័យ 1I-1660 ។
ចំណែកអ្នកបើកគោយន្ត ឈ្មោះ សូត្រ សម្បត្តិ ភេទប្រុស អាយុ ៣៨ ឆ្នាំ រស់នៅភូមិ ខ្វាវកើត ឃុំ រលួស ស្រុក ស្វាយចេក ខេត្ត បន្ទាយមានជ័យ ។
ប្រភពពីកន្លែងកើតហេតុបានឲ្យដឹងថា៖នៅមុនពេលកើតហេតុ គេឃើញ មានម៉ូតូ និងគោយន្តបានធ្វើដំណើរស្របទិសគ្នាក្នុងទិសដៅពីត្បូងទៅជើង ពេលបើកបរមកដល់ចំណុចកើតហេតុគោយន្តកន្ត្រៃបានប្តូរគន្លងផ្លូវ បត់ស្ដាំពីផ្លូវជាតិចុះទៅផ្លូវលំដោយពុំមានសញ្ញាប្រាប់ ស្របពេលនោះម៉ូតូបើកក្នុងល្បឿនលឿន ជាន់ហ្វ្រាំមិនទាន់បានបុលគោយន្តពេញទំហឹងបណ្តាលឲ្យ អ្នកបើកម៉ូតូបាក់ភ្លៅខាងឆ្វេងរងរបួសធ្ងន់ ត្រូវដឹកទៅព្យាបាលនៅមន្ទីរពេទ្យ ។
បច្ចុប្បន្នគោយន្តនិងម៉ូតូ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាល ស្រុកស្វាយចេក រង់ចាំធ្វើការដោះស្រាយនៅពេលក្រោយ ៕
