ខេត្តស្វាយរៀង៖ រាជរដ្ឋាភិបាលបាននិងកំពុងស្ថាបនាផ្លូវថ្នល់ ស្ពាន ជាច្រើនខ្សែនៅតាមបណ្តាលខេត្តនានា ដើម្បីឲ្យមានភាពងាយស្រួលដល់បងប្អូនប្រជាពលរដ្ឋក្នុងការដឹកជញ្ជូនដំណាំកសិផល និងធ្វើដំណើរទៅប្រកបរបរកស៊ីចិញ្ចឹមជីវិត ហើយក៏ជាផ្នែកមួយដើម្បីជម្រុញឲ្យវិស័យសេដ្ឋកិច្ចមានការរីកចំរើនផងដែរ។
បើក្រឡេកមើលនៅស្រុកកំពង់រោទិ៍វិញ ពលរដ្ឋជាច្រើនគ្រួសារសំណូមពរឲ្យលោកសុច ពិសី អភិបាលស្រុកកំពង់រោទិ៍ ចុះពិនិត្យមើលផ្លូវក្រវាត់ស្រុកស្ថិតនៅក្នុងភូមិស្វាយអាណាត ឃុំញរស្រុកកំពង់រោទិ៍ ខេត្ដស្វាយរៀង ផងទាន ព្រោះបច្ចុប្បន្នរងការខូចខាតពិបាកក្នុងការធ្វើដំណើររបស់បងប្អូនប្រជាពលរដ្ឋ។
ប្រភពពីប្រជាពលរដ្ឋបានឲ្យដឹងថា ផ្លូវក្រវ៉ាត់ស្រុកមួយនេះមានប្រវែងប្រហែល ៣០០ ម៉ែត្របានរងការខូចខាតយ៉ាងដំណំ ជាយូរណាស់មកហើយគ្មានដែលឃើញខាងអាជ្ញាធរឃុំ ស្រុក ចុះពិនិត្យមើលឬជួសជុលម្ដងណាឡើយ ផ្លូវនេះជាង៤០ឆ្នាំទៅហើយតាំងពីសម័យរដ្ឋកម្ពុជារហូតដល់សម័យនេះ។
ប្រភពបានបន្តថាសូម្បីតែចៅហ្វាយស្រុកកំពង់រោទិ៍ក៏ដូរផ្លាស់អស់ ៤ នាក់ហើយដែរ តែការអភិវឌ្ឍផ្លូវក្រវ៉ាត់ស្រុកនេះដូចជាមិនឃើញមានចៅហ្វាយស្រុកណាលុះមុខមកជួសជុលឬធ្វើឲ្យប្រជាពលរដ្ឋមានសេចក្តីសង្ឃឹមជឿជាក់ទៅលើអាជ្ញាធរនោះទេ។
បើតាមលោកឆូយ យ៉ន ជាមេឃុំញរបានប្រាប់អ្នកសារព័ត៌មានយើងឲ្យដឹងថា ផ្លូវក្រវ៉ាត់ស្រុកនេះមិនពាក់ព័ន្ធខាងឃុំទេព្រោះជារបស់ស្រុកជាអ្នកគ្រប់គ្រង លោកមានតួនាទីគ្រប់គ្រងតែផ្លូវនៅតាមភូមិនានាឆ្ងាយពីក្រវ៉ាត់ស្រុកកំពុងរស់នេះ។
បើតាម លោក តឹក ពិសិដ្ឋអភិបាលរងស្រុកកំពង់រោទិ៍បានប្រាប់អ្នកសារព័ត៌មានយើងឱ្យដឹងថា សម្រាប់ផ្លូវជុំវិញក្រវ៉ាត់ស្រុកកំពង់រោទិ៍ឆ្នាំ ២០២២ និង ២០២៣ នេះគ្មានគម្រោងធ្វើផ្លូវក្រវ៉ាត់ស្រុកនេះទេមានតែគម្រោងធ្វើប្រព័ន្ធលូមុនទើបធ្វើផ្លូវក្រោយនៅឆ្នាំ ២០២៤។
លោកបានបន្តទៀតថា ករណីធ្វើផ្លូវជុំវិញក្រវ៉ាត់ស្រុកធ្វើទៅតាមទីប្រជុំជនដែលមានមនុស្សរស់នៅច្រើនសិនហើយនៅក្រវ៉ាត់ស្រុកពុំមានមនុស្សរស់នៅច្រើនគេពុំទាន់មានគម្រោងធ្វើបន្តទៀតទេលុះធ្វើប្រព័ន្ធលូរហើយទើបមានគម្រោងនៅឆ្នាំ ២០២៤ បន្តទៀត។
ពាក់ព័ន្ធករណីខាងលើនេះពលរដ្ឋររស់នៅតាមក្រវ៉ាត់ស្រុករោទិ៍រងការលំបាកបន្តទៀតហើយ ហើយហើយពួកគាត់ថាអស់សង្ឃឹមទៅលើអាជ្ញាធរបើបែបនេះ
អាជ្ញាធរជាម៉ែជាឪ របស់ពលរដ្ឋ៕
