ស្វាយរៀង ៖ នៅនៅថ្ងៃអាទិត្យ ១៣ រោច ខែអស្សុជ ឆ្នាំខាលចត្វាស័ក ពុទ្ធសករាជ ២៥៦៦ត្រូវនឹងថ្ងៃទី២៣ ខែតុលា ឆ្នាំ២០២២នេះ ក្រុមការងារអង្គភាព BPNC NEWS ចូលរួមជាមួយលោកស្រី ពៅ បណ្តាំ មេឃុំតាសួស និងលោក សុខ ម៉ានិត បាននាំយកអំណោយរបស់សប្បុរសជនទៅចែកជួនលោកយាយដែលមានជីវភាពទីទាល់ក្រមួយគ្រួសារស្ថិតនៅភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង ។
អំណោយទាំងនេះគឺបានមកពីការឧបត្ថម្ភរបស់ព្រះគ្រូយសសិរីមុនីទេព គង់ សំប៊ុនឈឿន ព្រះវិន័យធរអនុគណស្រុកស្វាយជ្រំ និងជាចៅអធិការវត្តតាសួស លោក ស្រី វី ; លោកស្រី ពៅ បណ្តាំ មេឃុំតាសួស លោក សុខ ម៉ានិត និងបងប្អូនសប្បុរសជនដែលមានចិត្តសប្បុរសធម៌បានជួយឧបត្ថម្ភតាមរយៈអង្គភាពសារពត៌មាន BPNC NEWS ដើម្បីជួយសម្រួលដល់ជីវភាពរបស់លោកយាយបានមួយគ្រាផងដែរ។
សម្ភារៈដែលនាំយកទៅចែកជួនរួមមាន ៖ អង្គរ៥០គីឡូក្រាម; ទឹកត្រី១យួរ ;ទឹកសុីអ៊ាវ១យួរ ; ត្រីខកំប៉ុង១យួរ ; និងថវិកា ២០មុឺនរៀល។
ឆ្លៀតនៅក្នុងឪកាសនោះលោកយាយគ្មានអ្វីក្រៅពីម្រាមដៃដប់លើកឡើងសំពះថ្លែងអំណរគុណចំពោះ ព្រះសង្ឃ អស់លោក លោកស្រីដែលមានចិត្តសប្បុរសធម៌បានចំណាយនូវទ្រព្យសម្បត្តិផ្ទាល់ខ្លួនជួយឧបត្ថម្ភដល់លោកយាយសូមអស់លោក លោកស្រីទទួលបាននៅសុខភាពល្អ សំណាងល្អ ជោគជ័យគ្រប់ភារៈកិច្ចការងារ និងសមប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈពលៈ កុំបីឃ្លៀងឃ្លាតឡើយ ៕
