សាខា កក្រក ខេត្តកោះកុង៖ នៅព្រឹកថ្ងៃអង្គារ ទី២៨ ខែមីនា ឆ្នាំ២០២៣ នៅទីស្នាក់ការអនុសាខាស្រុកកោះកុង បានរៀបចំពិធីប្រកាសកែសម្រួល និងតែងតាំង ប្រធាន អនុប្រធានគណៈកិត្តិយស ប្រធាន អនុប្រធាន សមាជិក សមាជិកាគណៈកម្មាធិការ ក្រុមការងារកាកបាទក្រហមកម្ពុជា ឃុំ និងអ្នកស្ម័គ្រចិត្ត នៃអនុសាខាកាកបាទ ក្រហមកម្ពុជា ស្រុកកោះកុង ក្រោមអធិបតីភាព លោកជំទាវ មិថុនា ភូថង ប្រធានគណៈកម្មាធិការសាខាកាកបាទក្រហមកម្ពុជា ខេត្តកោះកុង និងមានការចូលរួមពីប្រធាន អនុប្រធានកិត្តិយស លោក ជា សូវី ប្រធានគណៈកម្មាធិការអនុសាខា និងលោក លោកស្រីសមាជិក សមាជិកាគណៈកម្មាធិការអនុសាខា ស្រុក អ្នកស្ម័គ្រចិត្ត ឯកឧត្តម លោកជំទាវ លោក លោកស្រី អាជីវករ បណ្តាក្រុមហ៊ុន កងកម្លាំងប្រដាប់អាវុធទាំងបីប្រភេទ ព្រមទាំងសប្បុរសជនជាច្រើននាក់ ក្នុងមូលដ្ឋានស្រុកកោះកុង ខេត្តកោះកុង បានចូលរួមយ៉ាងច្រើនកុះករ។
នៅក្នុងកម្មវិធីនោះ លោក ជា សូវី ប្រធានគណៈកម្មាធិការអនុសាខាស្រុក បានឡើងអាន របាយការណ៍សង្ខេបស្តីពីសកម្មភាពការងាររអនុសាខាស្រុក បានអនុវត្ត ឆ្នាំ២០២២ និងទិសដៅភារកិច្ចបន្តឆ្នាំ២០២៣ ជូនអង្គពិធីបានជ្រាបជារបាយការណ៍។
បន្ទាប់មកលោក លោក ឡុច ភិរ័ក្ស នាយករងសាខា បានធ្វើបទបង្ហាញដល់អង្គពិធីទាំងមូលបានយល់ដឹងពីប្រវត្តិចលនាកាកបាទក្រម អឌ្ឍចន្ទក្រហម គោលការណ៍គ្រឹះទាំង៧ ។
តមកលោក ឈួន យ៉ាដា នាយកប្រតិបត្តិសាខា បានឡើងអានសេចក្តីសម្រេច ស្តីពីការកែសម្រួល សមាសភាពគណៈកិត្តិយស គណៈកម្មាធិការ ក្រុមការងារកាកបាទក្រហមឃុំ អ្នកស្ម័គ្រចិត្តប្រចាំអនុសាខាកាកបាទក្រហមកម្ពុជា ស្រុកគិរីសាគរ ដែលចេញសេក្តីសម្រេចដោយ សម្តេចកិត្តិព្រឺទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។
បន្ទាប់ពីទទួលបានសេចក្តីសម្រេចតែងតាំងរួចហើយ ឯកឧត្តម ឯក ម៉ឹង ប្រធានកិត្តិយសអនុសាខា តំណាង គណៈកិត្តិយស គណៈកម្មាធិការអនុសាខា មានមតិ ប្តេជ្ញាចិត្តក្នុងអង្គពិធី ព្រមទាំងសប្បាយរីករាយគោរពជូនចំពោះ សម្តេចកិត្តិព្រឺទ្ធបណ្ឌិត ប៊ុន រ៉ានី ហ៊ុនសែន តាមរយៈសាខាបានទុកចិត្ត និងប្រគល់ការងារ ព្រមទាំងបានរៀបចំពិធីប្រកាស ទទួលស្គាល់ដើម្បីឲ្យចូលបម្រើក្នុងវិស័យ មនុស្សធម៌ក្នុង មូលដ្ឋានស្រុករបស់ពួកគាត់។
មានប្រសាសន៍សំណេះសំណាលក្នុងពិធីនោះ លោកជំទាវ មិថុនា ភូថង ប្រធានគណៈកម្មាធិការសាខា បានសម្តែងនូវមនោសញ្ចេតនាដ៏កក់ក្តៅចំពោះ លោក លោកស្រី គណៈកម្មាធិការអនុសាខា មន្រ្តីប្រចាំការ ក្រុមកាកបាទក្រហមឃុំដែល មានឆន្ទៈចូលរួមចែករំលែកពេលវេលាបំរើក្នុងបុព្វហេតុមនុស្សធម៌ដោយស្ម័គ្រចិត្ត នេះជាកម្លាំងមនុស្សធម៌នៅថ្នាក់មូលដ្ឋានដើម្បីជាសេនាធិការឱ្យសាខាកាកបាទក្រហមកម្ពុជាខេត្ត និងអាជ្ញាធរគ្រប់លំដាប់ថ្នាក់នៅមូល ដ្ឋាន អោយទាន់ពេលវេលានិងទទួលបានលទ្ធផលជោគជ័យស្រប តាម ទិស ស្លោក “ ទីណា មាន ការលំបាក ទីនោះ មាន កាកបាទ ក្រហម កម្ពុជា និង កាកបាទក្រហម កម្ពុជា មានគ្រប់ទីកន្លែងសម្រាប់គ្រប់ៗ គ្នា “។
លោកជំទាវប្រធាន បានផ្ដាំផ្ញើដល់ គណៈកម្មាធិការអនុសាខាស្រុកកោះកុង និង អ្នកពាក់ព័ន្ធទាំងអស់នូវការងារសំខាន់ៗ មួយចំនួនដូចខាងក្រោម ៖
១-សូមខិតខំបំពេញភារកិច្ច ស្របតាមគោលការណ៍គ្រឹះទាំង៧ របស់ចលនា កាកបាទក្រហមអឌ្ឍចន្ទក្រហម អន្តរជាតិ រួមមាន៖ ភាពមនុស្សធម៌, ភាពមិនលំអៀង, អព្យាក្រិត្យភាព, ឯករាជ្យភាព, សេវាកម្មស្ម័គ្រចិត្ត, ឯកភាព, និងសកលភាព
២-សូមធ្វើយ៉ាងណាខិតខំប្រឹងប្រែង បំពេញភារកិច្ចជួយសង្រ្គោះជនរងគ្រោះ អោយបានទាន់ពេលវេលា និងដល់ទីកន្លែង
៣-ខិតខំរកមូលនិធិ និងបង្កើតអោយមាន សមាជិកភាពពីសំណាក់ មន្ត្រីរាជការ ក្រោមឱវាទ សំដៅធានានិរន្តរភាពមូលនិធិ សម្រាប់ជួយជនរងគ្រោះ
៤-គ្រប់គ្រង និង ប្រើប្រាស់ថវិកាមូលនិធិ អោយមានប្រសិទ្ធភាព និងតម្លាភាពខ្ពស់
៥-ត្រូវចុះអប់រំផ្សព្វផ្សាយអំពីការត្រៀមបង្ការ គ្រោះមហន្តរាយនានា និងជម្ងឺឆ្លងផ្សេងៗ
ដល់ប្រជាពលរដ្ឋក្នុងសហគមន៍ អោយបានទាន់ពេលវេលា
៦-ខិតខំប្រមូលទិន្នន័យ ជនចាស់ជរាទីទាល់ក្រ ជនពិការ កុមារកំព្រា ស្ត្រីម៉េម៉ាយក្រីក្រ អ្នកផ្ទុកមេរោគអេដស៍ ស្រី្តក្រីក្រក្រោយសំរាលកូន ដើម្បីជួយសង្គ្រោះដោយមិនត្រូវទុក នណាម្នាក់ចោលឡើយ។
ចុងបញ្ចប់នៃកម្មវិធី លោកជំទាវ មិថុនា ភូថង ប្រធានគណៈកម្មាធិការសាខាបានផ្តល់អំណោយមនុស្សធម៌ដល់គ្រួសារចាស់ជរា និងគ្រួសារងាយរងគ្រោះសរុប២០គ្រួសារ ក្នុងមួយគ្រួសារៗទទួលបាន៖ អង្ករ ២៥គក្រ មី១កេះ ត្រីខ១ឡូ ទឹកសុទ្ធ១កេះ ព្រមទាំងថវិកា៨ម៉ឺនរៀលដូចៗគ្នា ។
ក្នុងកម្មវិធីនេះដែរអនុសាខាកាកបាទក្រហមកម្ពុជា ស្រុកកោះកុង បានទទួលចំណូលពីសប្បុរសជនជាបឋមចំនួនជាប្រាក់រៀល ចំនួន៧,៣៣៣,០០០រៀល និងប្រាក់ដុល្លារចំនួន ១៤២០ ដុល្លារផងដែរ។
