ខេត្ដព្រះវិហារ៖ នៅវេលាម៉ោង ២១និង០០នាទី ថ្ងៃទី ២០ខែមេសាឆ្នាំ ២០២៣ សមត្ថកិច្ចក្រោយពីទទួលព័ត៌មានពីម្ចាស់ផ្ទះសំណាក់កុលាបបីទង ឈ្មោះ ស៉ឹម វ៉ន ភេទប្រុស អាយុ៦៣ឆ្នាំ នៅភូមិកំពង់ស្រឡៅ ឃុំកំពង់ស្រឡៅមួយ ស្រុកឆែប ខេត្តព្រះវិហារ ថាមាន”ករណីមនុស្សពុលថ្នាំ”នៅបន្ទប់ផ្ទះសំណាក់របស់ខ្លួន។
ភ្លាមនោះក្រោយទទួលបានព័ត៌មាន កម្លាំងសមត្ថកិច្ចបានសហការជាមួយគ្រូពេទ្យ ចុះទៅកន្លែងកើតហេតុ ពេលទៅដល់ឃើញថា ជនរងគ្រោះពុលថ្នាំ ។
ដោយជនរងគ្រោះមានឈ្មោះ ឡោ គង់ហួរ ភេទ ប្រុស អាយុ ៤១ឆ្នាំ រស់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដែលជាមុខសញ្ញាដែលសមត្ថកិច្ចកំពុងស្វែងរកឃាត់ខ្លួន ពាក់ព័ន្ធ”ករណីឃាតកម្ម”កាលពីព្រឹកថ្ងៃទី២០ ខែមេសាឆ្នាំ២០២៣ នៅខេត្តស្វាយរៀង ។
ក្នុងនោះសមត្ថកិច្ចបានបញ្ជូនមកជួយសង្គ្រោះនៅមន្ទីរពេទ្យបង្អែកខេត្តព្រះវិហារ និងបានរាយការណ៍ជូន ឯកឧត្តម ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ។ ដោយមានការសម្របសម្រួលពីឯកឧត្តម ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារផងនោះ សមត្ថកិច្ចបានធ្វើការឃាត់ខ្លួនមុខសញ្ញាខាងលើនៅមន្ទីរពេទ្យបង្អែកខេត្ត រងចាំបន្តនីតិវិធី ។
សូមរម្លឹកផងដែរថា ឃាតកម្មដ៏សាហាវព្រៃផ្សៃ! ស្ត្រីម្នាក់ជាបុគ្គលបម្រើការងារនៅកាស៊ីណូ DYNASTY ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ត្រូវបានជនដៃដល់សម្លាប់ដោយកាត់ក្បាលចេញពីខ្លួន។
ករណីឃាតកម្មនេះបានកើតឡើងនៅថ្ងៃទី២០ ខែមេសា ឆ្នាំ២០២៣នេះ ស្ថ្ថិតចំណុចបន្ទប់ជួលផ្លូវកំពង់ស្ពាន ក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
សាកសពជនរងគ្រោះមានឈ្មោះ ម៉ន ស្រីម៉ី អាយុ២៤ឆ្នាំ មុខរបរបុគ្គលិកកាស៊ីណូ DYNASTY មានស្រុកកំណើតនៅភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល ទីលំនៅបច្ចុប្បន្ន ស្នាក់នៅបន្ទប់ជួលភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
បច្ចុប្បន្នសាកសពស្រ្ដីជនរងគ្រោះត្រូវបានក្រុមគ្រួសារសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត៕
