ខេត្ដស្វាយរៀង ៖ លោកហែម សុីណា អភិបាលស្រុករំដួល បានថ្លែងថា សូមអគុណសន្តិភាព បើមិនមានសុខសន្តិភាព ក៏មិនមានការអភិវឌ្ឍន៍រហូតដល់សព្វថ្ងៃនេះដែរ ។
ការថ្លែងបែបនេះធ្វើឡើងនាព្រឹកថ្ងៃទី២៦ ខែមិថុនា ឆ្នាំ២០២៣ ក្នុងពិធីសំណេះសំណាលជាមួយបងប្អូនប្រជាពលរដ្ឋនិងបើកកាដ្ឋានជួសជុលផ្លូវដីសក្រាលថ្មបំបែកប្រវែង៦,៩០០ម៉ែត្រ គម្រោងមូលនិធិឃុំឆ្នាំ២០២៣ ឆ្លងកាត់ភូមិត្រពាំងដំរី ភូមិតាសក់ ភូមិកំពង់អំពិល ភូមិតាតែ និងភូមិបឹង ក្នុងឃុំកំពង់អំពិល ស្រុករំដួល ខេត្តស្វាយរៀង ដែលជាតម្រូវការ ចាំបាច់របស់ប្រជាពលរដ្ឋ សិស្សានុសិស្សក្នុងការធ្វើដំណើរឆ្លងកាត់ក៏ដូចជា ដឹកជញ្ជូន កសិកផល ផ្សេងៗផងដែរ។
លោក ហែម សុីណា អភិបាលស្រុករំដួល បានបន្តថា ក្រោមការដឹកនាំរបស់រាជរដ្ឋាភិបាលដែលមានសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានធ្វើឲ្យប្រទេសជាតិមានការរីកចម្រើនទាំងហេដ្ឋារចនាសម្ព័ន្ធលើគ្រប់វិស័យពិសេសជានិច្ចកាល សម្ដេចតែងតែយកចិត្តទុកដាក់ចំពោះជីវភាពរស់នៅរបស់ប្អូនប្រជាពលរដ្ឋ ទូទាំងប្រទេសក៏ដូចជាក្នុងខេត្តស្វាយរៀងផងដែរ។
លោកហែម សុីណា បានបន្ដទៀតថាលោកគាំទ្រការបញ្ចុះតម្លៃសេវាហិរញ្ញប្បទានរបស់មន្ទីរពេទ្យបង្អែកសាមគ្គីរំដួល ១០-២០% ដើម្បីចូលរួមអនុវត្តគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្រជូនប្រជាពលរដ្ឋនិងបានចូលរួមលើកកម្ពស់សុខមាលភាពពលរដ្ឋឲ្យកាន់តែល្អប្រសើរថែមទៀត ដែលរាជរដ្ឋាភិបាលបានចាត់ទុកវិស័យសុខាភិបាលជាវិស័យអទិភាពមួយក្នុងការអភិវឌ្ឍន៍សេដ្ឋកិច្ចនិងសង្គមជាតិផងដែរ។
លោកអភិបាលក៏បានបន្តទៀតថាសូមឱ្យបងប្អូនប្រជាពលរដ្ឋទាំងអស់គ្នា ពេលបានផ្លូវល្អហើយងាយស្រួលក្នុងការធ្វើដំណើរ សូមបងប្អូនជួយចូលរួមថែរក្សាឲ្យបានគង់វង្សទាំងអស់គ្នា ព្រោះផ្លូវទាំងនេះជាផ្លូវរបស់យើងទាំងអស់គ្នា មិនមែនជាផ្លូវរបស់បុគ្គលណាម្នាក់ឡើយ និងត្រូវចូលរួមគោរពច្បាប់ចរាចរណ៍ ទាំងអស់គ្នាដើម្បីកាត់បន្ថយនូវការគ្រោះថ្នាក់ចរាចរណ៍ នឹងត្រូវអនុវត្តគោលនយោបាយភូមិឃុំមានសុវត្ថិភាពទាំង៧ចំណុចរបស់រាជរដ្ឋាភិបាលដែលបានដាក់ចេញ នឹង ជាពិសេសទៀតនោះគឺនៅថ្ងៃទី២៣ខែកក្កដាឆ្នាំ២០២៣ខាងមុខនេះសូមបងប្អូនអញ្ជើញទៅបោះឆ្នោតឱ្យបានគ្រប់ៗគ្នាកុំបីខាន ។
លោកហែម ស៊ីណា បានផ្ដាំផ្ញើដល់ម្ចាស់ក្រុមហ៊ុនក្រោយទទួលបានពីការសម្ពោធបើកការដ្ឋានហើយដំណើរការចាប់ពីថ្ងៃនេះតទៅគឺធ្វើយ៉ាងណាតាមលក្ខណៈបច្ចេកទេសឲ្យបានត្រឹមត្រូវ។
ឆ្លៀតក្នុងឱកាសនោះដែរ លោកហែម ស៊ីណា ក៏បានភ្ជាប់ចំណងដៃ ជាអនុស្សាវរីយ៍ជូនដល់បងប្អូនប្រជាពលរដ្ឋដែលបានអញ្ជើញចូលរួមក្នុងពិធីបើកការដ្ឋានសាងសង់ផ្លូវនេះគឺក្នុងម្នាក់ទទួលបានក្រមា១និងសារ៉ុង១ផងដែរ៕
