ខេត្ដស្វាយរៀង៖ អភិបាលស្រុករំដួលលោកហែម ស៊ីណា បានថ្លែងថា អ្វីៗដែលយើងមានដូចសព្វថ្ងៃនេះ គឺបានមកពីសុខសន្តិភាព ដែលសម្តេចតេជោ ហ៊ុន សែន ប្រឹងប្រែងរកបានដោយលំបាកយើងត្រូវដឹងគុណពីវីរភាពរបស់បងប្អូនអតីតយុទ្ធជន ក្នុងការចូលរួមរំដោះប្រទេសជាតិ និងទប់ស្កាត់របបប្រល័យពូជសាសន៍ ប៉ុល ពត មិនឱ្យវិលត្រទ្បប់មកវិញ ហើយយើងទាំងអស់គ្នាត្រូវចងចាំថា «សន្តិភាពជាមូលដ្ឋានគ្រឹះនៃការអភិវឌ្ឍ» គ្មានសន្តិភាពពិតជាគ្មានការអភិវឌ្ឍ។ យើងទាំងអស់គ្នាត្រូវរួមគ្នាថែរក្សា ការពារមរតកសន្តិភាពសម្តេចតេជោ ឱ្យស្ថិតស្ថេររឹងមាំជាអង្វែងតទៅ ដើម្បីបង្កឱកាសឱ្យរាជរដ្ឋាភិបាលបន្តអភិវឌ្ឍន៍ប្រទេសជាតិ។
ការថ្លែងបែបនេះធ្វើឡើងនៅពិធីសំណេះសំណាលជាមួយបងប្អូនប្រជាពលរដ្ឋនិងបើកការដ្ឋានគម្រោងកែលម្អផ្លូវដីក្រាលថ្មបំបែក ប្រវែង៩,៥០០ម៉ែត្រជាគម្រោងមូលនិធិឃុំឆ្នាំ២០២៣ ឆ្លងកាត់ភូមិចក ភូមិស្វាយរូង ភូមិឆ្អឹងពស់ ភូមិលក្ខរាជា និងភូមិចំបក់កោង ក្នុងឃុំកំពង់ចក ស្រុករំដួល ខេត្តស្វាយរៀង នៅព្រឹកថ្ងៃពុធ ១១កើត ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៨ ខែមិថុនា ឆ្នាំ២០២៣នេះ។
ពិធីនេះមានការអញ្ជើញចូលរួមពី៖មន្ដ្រីបច្ចេកទេសខេត្ដប្រចាំស្រុករំដួល,មន្ត្រីលិទ្ធកម្មគាំទ្រឃុំ,មន្ត្រីសាលាស្រុក,លោក ប្រធានក្រុមហ៑ុន ,លោក មេឃុំ ,លោកនាយប៉ុស្តិ៍រដ្ឋបាល,លោក មេភូមិ, នឹងបងប្អូនប្រជាពលរដ្ឋជាច្រើននាក់ទៀតផងដែរ ។
លោក បានបញ្ជាក់ឲ្យដឹងថា អាជ្ញាធរខេត្តស្រុកក៏ដូចជាអាជ្ញាធរឃុំ អាជ្ញាធរភូមិ តែងតែយកចិត្តទុកដាក់ជាប់ជានិច្ចចំពោះទុក្ខកង្វល់របស់បងប្អូនប្រជាពលរដ្ឋនៅក្នុងមូលដ្ឋានជានិច្ចដូចជាបញ្ហា ផ្លូវ ទឹក ភ្លើង នឹងបញ្ហាការធ្វើដំណើរនៅលើដងផ្លូវឆ្លងកាត់ទៅវិញទៅមកជាពិសេសនោះទៅទៀត ក្រោមការដឹកនាំ របស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែនជានាយករដ្ឋមន្ត្រីនៃព្រះរាជាណាចក្រកម្ពុជានឹង ជាប្រមុខដឹកនាំដ៏ឈ្លាសវៃ ដោយសម្ដេច តែងតែយកចិត្តទុកដាក់ចំពោះបងប្អូនប្រជាពលរដ្ឋគ្រប់មូលដ្ឋានទាំងអស់ គ្រប់កាលៈទេសៈ ។
លោកអភិបាលក៏បានបន្តទៀតថាសូមឱ្យបងប្អូនប្រជាពលរដ្ឋទាំងអស់គ្នា ពេលបានផ្លូវល្អហើយងាយស្រួលក្នុងការធ្វើដំណើរ សូមបងប្អូនជួយចូលរួមថែរក្សាឲ្យបានគង់វង្សទាំងអស់គ្នា ព្រោះផ្លូវទាំងនេះជាផ្លូវរបស់យើងទាំងអស់គ្នា មិនមែនជាផ្លូវរបស់បុគ្គលណាម្នាក់ឡើយ និងត្រូវចូលរួមគោរពច្បាប់ចរាចរណ៍ ទាំងអស់គ្នាដើម្បីកាត់បន្ថយនូវការគ្រោះថ្នាក់ចរាចរណ៍ នឹងត្រូវអនុវត្តគោលនយោបាយភូមិឃុំមានសុវត្ថិភាពទាំង៧ចំណុចរបស់រាជរដ្ឋាភិបាលដែលបានដាក់ចេញ នឹង ជាពិសេសទៀតនោះគឺនៅថ្ងៃទី២៣ខែកក្កដាឆ្នាំ២០២៣ខាងមុខនេះសូមបងប្អូនអញ្ជើញទៅបោះឆ្នោតឱ្យបានគ្រប់ៗគ្នាកុំបីខាន ។
លោកហែម ស៊ីណា បានផ្ដាំផ្ញើដល់ម្ចាស់ក្រុមហ៊ុនក្រោយទទួលបានពីការសម្ពោធបើកការដ្ឋានហើយដំណើរការចាប់ពីថ្ងៃនេះតទៅគឺធ្វើយ៉ាងណាតាមលក្ខណៈបច្ចេកទេសឲ្យបានត្រឹមត្រូវ។
លោកហែម ស៊ីណា ក៏បានភ្ជាប់ចំណងដៃ ជាអនុស្សាវរីយ៍ជូនដល់បងប្អូនប្រជាពលរដ្ឋដែលបានអញ្ជើញចូលរួមក្នុងពិធីបើកការដ្ឋានសាងសង់ផ្លូវនេះផងដែរ។
ជាចុងបញ្ចប់នៅកម្មវិធីបងស្រីជាជនពិការបានច្រៀងចម្រៀងមួយបទជូនលោកអភិបាលស្រុករំដួលក៏ដូចជាបងប្អូនទាំងអស់ដែលអញ្ជើញចូលរួមក្នុងកម្មវិធីនេះដោយមានចំណងជើងថា៖(ឱភ្នំពេញអើយ ) ក្នុងនោះដែរបងស្រីជាជនពិការក៏ទទួលបានប្រាក់ឧបត្ថម្ភថវិកាពីលោកអភិបាលស្រុក,លោកមេឃុំ,លោកមេប៉ុស្តិ៍និងម្ចាស់ក្រុមហ៊ុនផងដែរ៕
