ខេត្ដស្វាយរៀង៖ ពលរដ្ឋរស់នៅក្នុងភូមិធ្លក សង្កាត់សង្ឃ័រ ក្រុងស្វាយរៀង ខេត្ដស្វាយរៀង ថា ផ្លូវបេតុងអាមេដែលកំពុងសាងសង់ដោយក្រុមហ៊ុនមានឈ្មោះ សូ សាវឿន គ្មានគុណភាព និងមិនត្រឹមត្រូវតាមស្តង់ដា តាមបច្ចេកទេស ដោយពួកគាត់សង្ស័យថាដែកមិនគ្រប់លី ហើយទំហំវិញសង្ស័យមិនគ្រប់ម៉ែត្រទៀតផង ។
ពួកគាត់បានលើកឡើងថាការសាងសង់ផ្លូវបេតុងអាមេនេះពួកគាត់ឃើញក្រុមជាងដាក់ដែកផ្ទាល់ដីហើយលាយស៊ីម៉ង់ចាក់យកតែម្ដង ទាំងនេះហើយធ្វើឲ្យផ្លូវប្រើប្រាស់មិនបានយូរ ។
មហាជនធ្លាប់បានរិះគន់ថា គម្រោងសាងសង់ផ្លូវមេតុងអាមេកន្លងមកគឺឃើញប្រើប្រាស់មិនបានយួរអង្វែងទេកន្លែងខ្លះបែកបាក់ប្រេះស្រាំទៅហើយ និងកែលម្អរដោយដាក់ដេញថ្លៃ ក៏ប៉ុន្តែផ្លូវប្រើប្រាស់គ្មានគុណភាព បានន័យថា គម្រោងជួសជុលរួច ផ្លូវស្រុតខូចវិញតាមក្រោយ ហើយក្រុមប្រឹក្សាឃុំ សង្កាត់ ដាក់សំណើរគម្រោងជួសជុលកែលម្អរផ្លូវនេះថ្មីម្តងទៀត ។
សូមរម្លឹកផងដែរថាគម្រោងដាក់ដេញថ្លៃកែរលម្អផ្លូវដីក្រាលមេតុងអាមេប្រវែង៤១០ម៉ែត្រ ទទឹងផ្លូវ៤ម៉ែត្រ កម្រាស់០,១៥ម៉ែត្រ និងស្លាកសញ្ញាគម្រោង ដេញបានតម្លៃក្រោម ៥០% នៅសាលាសង្កាត់សង្ឃ័រ ក្រុងស្វាយរៀង ខេត្តស្វាយរៀង ។
ក្នុងការដាក់ដេញថ្លៃ មានក្រុមហ៊ុនចំនួន៦ក្រុមហ៊ុន បានចូលដាក់ដេញថ្លៃ ហើយការចូលដាក់ដេញថ្លៃនោះ គឺបានដេញបញ្ចុះតម្លៃទាប ដោយគម្រោងប៉ាន់ស្មាន ២០០,០៤១,៨០០ រៀល ហើយតម្លៃដែលដេញថ្លៃបាន ក្នុងតម្លៃទាបជាងគេ អាចទទួលយកបានគឺ៖ ៧៥,១១២,០០០ រៀល របស់ក្រុមហ៊ុន សូ សាវឿន ជាអ្នកទទួលការសាងសង់ ។
ពលរដ្ឋស្នើរសុំអោយមន្ត្រីជំនាញចុះត្រួតពិនិត្យ និងតាមដានអោយបានជាប់ជាប្រចាំផង ដើម្បីកុំអោយក្រុមហ៊ុនដែលទទួលបានគម្រោងធ្វើមិនបាន និងធ្វើមិនត្រូវតាមស្តង់ដាបច្ចេកទេស និងមិនមានគុណភាព តាមកិច្ចសន្យានៃគម្រោង។
ពលដ្ឋរស្នើរដល់ម្ចាស់គម្រោងនិងមន្ត្រីបច្ចេកទេស មន្ត្រីលទ្ធកម្មមេត្តាបង្កើតគណកម្មការវាយតម្លៃគុណភាពផ្លូវឲ្យបានម៉ត់ចត់ត្រូវតាមស្តង់ដានៃគម្រោង ជៀសវាងផ្លូវគ្មានគុណភាព ធ្វើហើយធ្វើទៀត ជួសជុលហើយផ្លូវខូចដដែលៗ ៕
