(ឧត្តរមានជ័យ)ពិធីសំណេះសំណាលនិងប្រជុំបូកសរុបលទ្ធផលការងារឆ្នាំ២០២២លើកទិសដៅអនុវត្តបន្តសម្រាប់ឆ្នាំ២០២៣របស់សាខាសមាគមសិស្សនិស្សិត បញ្ញាវន្តក្មេងវត្តខេត្តឧត្តរមានជ័យ។ពិធីនេះផងដែរប្រព្រឹត្តធ្វើឡើងក្នុងបរិវេណសាលាប្រជុំរបស់រដ្ធបាលខេត្តកាលពីអំឡុងចុងសប្តាហ៏កន្លងទៅនាថ្ងៃទី១៥ខែកក្កដាឆ្នាំ២០២៣ក្នុងនោះក៏មានការអញ្ជើញចូលរួមពី លោកប្រធានសាខាសមាគម សិស្សនិស្សិតក្មេងវត្ត អនុប្រធានសាខា សមាជិក សមាជិការ សិស្សនិស្សិតមកពីតាមបណ្តាក្រុងស្រុកទាំង៥នៃខេត្តឧត្តរមានជ័យជាច្រើននាក់ផងដែរ។
ក្នុងពិធីនោះដែរលោករិនសាគរ ប្រធានសាខាសមាគម សិស្សនិស្សិតបញ្ញាវន្តក្មេងវត្តខេត្តឧត្តរមានជ័យ បានឡើងអានអំពីសាវតាសាខាសមាគម សិស្សនិស្សិតបញ្ញាវន្តក្មេងវត្តខេត្តឧត្តរមានជ័យ ដែលបានបង្កើតឡើងក្នុងអំឡុងឆ្នាំ២០១៨កន្លងមកនេះ។ហើយការបង្កើតក្រុមការងាររបស់សាខាសមាគម សិស្ស និស្សិតបញ្ញាវន្តក្មេងវត្តប្រចាំខេត្តឧត្តរមានជ័យ ដែលមានទីស្នាក់ការស្ថិតនៅក្នុងភូមិដូនកែនសែនជ័យ សង្កាត់សំរោង ក្រុងសំរោង ខេត្តឧត្តរមានជ័យ។
ថ្លែងនៅក្នុងពិធីនេះ ឯកឧត្តម រុនតូ អនុប្រធានសមាគមថ្នាក់កណ្តាលតំណាងដ៏ខ្ពង់ខ្ពស់ឯកឧត្តមហ៊ុនម៉ានិត ជាប្រធានសមាគមសិស្សនិស្សិតបញ្ញាវន្តក្មេងវត្ត បានមានប្រសាសន៏ថា នេះជាលើកទី១ដែលសាខាសមាគមសិស្សនិស្សិតបញ្ញាវន្តក្មេងវត្ត ខេត្តឧត្តរមានជ័យ បានរៀបចំកម្មពិធីធំបែបនេះ គឺសំដៅទៅលើអំពីចក្ខុវិស័យ បេសកម្មគោលបំណង និងគោលដៅ សមាគមសិស្សនិស្សិតបញ្ញាវន្តក្មេងវត្តបានកំណត់នូវចក្ខុវិស័យក្នុងការអភិវឌ្ឍសមត្ថភាពរបស់សមាជិក សមាជិការឲ្យក្លាយទៅជាធនធានមនុស្ស ដែលប្រកបទៅដោយសមត្ថភាព គុណភាព គុណធម៌ និងពោពេញទៅដោយថាមពល និងសក្តានុពលដើម្បីរួមចំណែកក្នុងការអភិវឌ្ឍសង្គមសេដ្ធកិច្ចក៏ដូចជារួមចំណែកក្នុងការថែរក្សាសន្តិភាព ស្ថិរភាពនិងការអភិវឌ្ឍរបស់ប្រទេសជាតិ។
ឆ្លៀតក្នុងឪកាសនោះដែរ ឯកឧត្តម ប៉ែនកុសល្យ ប្រធានកិត្តិយសសាខាសមាគមខេត្តនិងជាថ្នាក់ដឹកនាំសមាគមថ្នាក់កណ្តាល ក៏បានមានប្រសាសន៏ថ្លែងថា ស្ថិតក្នុងថ្ងៃនេះក្នុងនាមខ្ញុំផ្ទាល់ក៏ដូចជាសមាជិក សមាជិការទាំងអស់ សូមជំរុញនិងលើកទឹកចិត្តដល់សិស្សនិស្សិតបញ្ញាវន្តក្មេងវត្តឲ្យចូលរួមសកម្មភាពសិទ្ធមនុស្ស ប្រជាធិបតេយ្យ ការ ការពារនិងរក្សាសុខសន្តិភាព ស្ថិរភាពសង្គម សុខុមាលភាព សមភាពយេនឌ័រនិងការបណ្តុះបណ្តាលវិជ្ជាជីវ: កសាងនិងអភិវឌ្ឍសមត្ថភាព គុណភាព គុណធម៌ ចរិយាធម៌ សីលធម៌ គុណតម្លៃ សាមគ្គីភាពឲ្យបានល្អប្រសើរជាប់ជាប្រចាំ។
ឯកឧត្តមប៉ែនកុសល្យ បានមានប្រសាសន៏លើកឡើងបន្តថា លក្ខណ:សម្បត្តិរបស់សិស្សនិស្សិតបញ្ញាវន្តក្មេង ត្រូវបង្កើតបន្ថែមនូវថ្នាលប្រាស្រ័យទាក់ទងប្រកបដោយសង្គភាព មិត្តភាព សម្ព័ន្ធភាព ជំរុញការអប់រំនិងបណ្តុះបណ្តាលវិជ្ជាជីវ: ដល់សមាជិក បង្កើនការទំនាក់ទំនងល្អជាមួយអង្គការជាតិ អន្តរជាតិនិងស្ថាប័ននានា ។ជាពិសេសបង្កើនការទំនាក់ទំនងល្អជាមួយអាជ្ញាធរគ្រប់លំដាប់ថ្នាក់និងគណ:សង្ឃព្រមទាំងព្រះចៅអធិការវត្ត ផ្តល់ប្រឹក្សាយោបល់និងស្វះស្វែងរកការងារដល់សមាជិក ពង្រឹងនិងពង្រីកសាខាសគមតាមការចាំបាច់ផងដែរ។
