(ឧត្តរមានជ័យ)ដោយមានការណែនាំ និងចង្អុលបង្ហាញពីសំណាក់ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តឧត្តរមានជ័យ។ក្រោយទទួលពត៌មានពីប្រជាពលរដ្ធមកថា មានករណីលួចម៉ូតូនិងបាត់ទូរស័ពក្នុងស្តង់ដំឡូងមីមួយកន្លែង នៅព្រឹកថ្ងៃទី២៦ ខែកក្កដា ឆ្នាំ២០២៣ម្សិលមិញនេះ លោកវរសេនីយ៍ឯក ហម ភិរម្យ អធិការ នៃអធិការដ្ឋាននគរបាលក្រុងសំរោង បានចាត់លោកវរសេនីយ៍ទោ សត្យា រ៉ូម៉េអ៊ូ អធិការរងទទួលផែនការងារនគរបាលយុត្តិធម៌ ដឹកនាំកម្លាំងជំនាញផែន និងកម្លាំងនគរបាលប៉ុស្តិ៍រដ្ឋបាលកូនក្រៀល ចុះធ្វើការពិនិត្យកន្លែងកើតហេតុ និងស្រាវជ្រាវក្នុងករណី លួច (ម៉ូតូ និងទូរស័ព្ទដៃ) ដែលបានកើតឡើងកាលពីថ្ងៃទី២៦ ខែកក្កដា ឆ្នាំ២០២៣ វេលាម៉ោង ១២និង៣០នាទី នៅចំណុចក្នុងបរិវេណស្តង់ទិញ-លក់ដំឡូង ស្ថិតនៅភូមិត្រពាំងទូង សង្កាត់កូនក្រៀល ក្រុងសំរោង ខេត្តឧត្តរមានជ័យ ក្រោយពីបើកការស្រាវជ្រាវយ៉ាងយកចិត្តទុកដាក់ យើងកំណត់បានអត្តសញ្ញាណជនប្រព្រឹត្តិបទល្មើស និងឈានដល់ការឃាត់ខ្លួនជនសង្ស័យម្នាក់ឈ្មោះ ប្រុស លី ភេទប្រុស អាយុ ១៨ឆ្នាំ មានទីលំនៅភូមិគោកចាន់រ៉ី សង្កាត់កូនក្រៀល ក្រុងសំរោង ខេត្តឧត្តរមានជ័យ (ជាមុខសញ្ញាសកម្មលួចឆ្លងខេត្ត) រួមទាំងវត្ថុតាង ដែលបានធ្វើសកម្មភាពលួចម៉ូតូ ០១គ្រឿង ម៉ាកវ៉េវ ពណ៌ទឹកប្រាក់ ផលិតឆ្នាំ២០១៤ គ្មានផ្លាលេខ មានលេខតួ និងលេខម៉ាស៊ីន: ៩១៩០៥៥ របសជនរងគ្រោះឈ្មោះ លឿយ នេត ភេទប្រុស អាយុ ១៧ឆ្នាំ មានទីលំនៅភូមិត្រពាំងទូង សង្កាត់កូនក្រៀល ក្រុងសំរោង ខេត្តឧត្តរមានជ័យ និងទូរស័ព្ទដៃ ០២គ្រឿង ម៉ាកសាំស៊ុង ពណ៌ខ្មៅ ០១គ្រឿង របស់ឈ្មោះ សល់ សៀល ភេទប្រុស អាយុ ១៩ឆ្នាំ មានទីលំនៅភូមិត្រពាំងទូង សង្កាត់កូនក្រៀល ក្រុងសំរោង ខេត្តឧត្តរមានជ័យ និងម៉ាកអាយហ្វូន ៧ផ្លាស់ ពណ៌ខ្មៅ ០១គ្រឿង របស់ឈ្មោះ ដែន ចន្តា ភេទប្រុស អាយុ ១៦ឆ្នាំ មានទីលំនៅភូមិត្រពាំងទូង សង្កាត់កូនក្រៀល ក្រុងសំរោង ខេត្តឧត្តរមានជ័យ។
លោកវរសេនីយ៏ឯក ហមភិរម្យ អធិការនគរបាលក្រុងសំរោងបានបញ្ជាក់បន្ថែមថា នៅចំពោះមុខក្នុងពេលសួរនាំជនសង្ស័យខាងលើបានឆ្លើយសារភាពប្រាប់សមត្ថកិចថា កន្លងមករូបខ្លួន និងប្រពន្ធធ្លាប់បានធ្វើសកម្មភាពលួចទូរសព្ទដៃ លួចកង់ និងលួចម៉ូតូនៅខេត្តសៀមរាបបានចំនួន ០៤លើក យកទៅលក់ឲ្យគេនៅខេត្តសៀមរាប បានប្រាក់យកទៅស៊ីចាយ និងទិញសារធាតុញៀនប្រើប្រាស់ លុះនៅដើមខែកក្កដា ឆ្នាំ២០២៣ រូបខ្លួនបានលួចទូរស័ព្ទដៃរបស់គេបានចំនួន ០២គ្រឿង នៅចំណុចស្តង់ដំឡូងមុខផ្ទះរបស់ម្តាយក្មេកខ្លួន ក្នុងភូមិគោកចានរ៉ី សង្កាត់កូនក្រៀល ក្រុងសំរោង ហើយយកទៅលក់នៅខេត្តសៀមរាបជាមួយប្រពន្ធបានប្រាក់ចំនួន ៦០ដុល្លាអាមេរិក រហូតដល់ថ្ងៃទី២៦ ខែកក្កដា ឆ្នាំ២០២៣ វេលាម៉ោងប្រហែល ១២និង៣០នាទី រូបខ្លួនបានជិះម៉ូតូ ០១គ្រឿង ម៉ាកទ្រីម សេរីឆ្នាំ២០០២ ពណ៌ខ្មៅ ពាក់ផ្លាកលេខ: សៀមរាប 1A-8820 តែម្នាក់ឯងចេញពីផ្ទះក្នុងគោលបំណងទៅសំរោងដើម្បីលួចទ្រព្យសម្បត្តិអ្នកដទៃ ចៃដន្យពេលជិះចូលភូមិត្រពាំងទូង ស្រាប់តែឃើញមានម៉ូតូ ចតទុកនៅខាងមុខបន្ទប់ដេកក្នុងស្តង់ដំឡូង ពេលនោះរូបខ្លួនក៏បានចូលទៅក្នុងបន្ទប់ដេកលួចទូរសព្ទដៃ ០២គ្រឿង (ទូរស័ព្ទម៉ាកសាំស៊ុង ពណ៌ខ្មៅ ០១គ្រឿង និងម៉ាកអាយហ្វូន ០១គ្រឿង) និងលួចម៉ូតូ ០១គ្រឿង ម៉ាកវ៉េវ បន្ទាប់មករូបខ្លួនក៏យកទូរសព្ទ និងម៉ូតូដែលលួចបាន ជិះត្រឡប់ទៅផ្ទះក្នុងគោលបំណងដឹកប្រពន្ធទៅខេត្តសៀមរាបដើម្បីលក់ម៉ូតូ និងទូរសព្ទដែលលួចបាន ចៃដន្យពេលជិះមកដល់មុខបឋមសិក្សាគោកចាន់រ៉ីនម៉ូតូរលត់ រូបខ្លួនក៏ដើរដឹកយកទៅទុកនៅមុខផ្ទះជាងម៉ូតូដែលនៅជិតនោះ រហូតដល់ភ្លឺពេលជាងម៉ូតូបើកទ្វារតូប រូបខ្លួនក៏យកម៉ូតូនោះទៅជួសជុល លុះនៅវេលាម៉ោងប្រហែល ០៨:០០នាទី ស្រាប់តែមានសមត្ថកិច្ចនគរបាលមកឃាត់រូបខ្លួនយកមកកាន់ប៉ុស្តិ៍នគរបាលរដ្ឋបាលកូនក្រៀលតែម្តង ។
បច្ចុប្បន្នជនសង្ស័យខាងលើត្រូវបានឃាត់ខ្លួននៅអធិការដ្ឋាននគរបាលក្រុងសំរោង ដើម្បីកសាងសំណុំរឿងបញ្ជូនទៅកាន់សាលាដំបូងខេត្តឧត្តរមានជ័យ ចាត់ការតាមនីតិវិធីច្បាប់ ចំណែកវត្ថុតាងមានម៉ូតូ និងទូរស័ព្ទដៃ ត្រូវបានសមត្ថកិច្ចធ្វើកំណត់ហេតុប្រគល់ជូនម្ចាស់ដើមវិញ។
