(ឧត្តរមានជ័យ) ក្រោមការចង្អុលបង្ហាញពីលោកឧត្តមសេនីយ៏ទោហួតសុធីស្នងខេត្ត បញ្ជាផ្ទាល់ទៅលោកវរសេនីយ៏ឯកហមភិរម្យអធិការនគរបាលក្រុងសំរោង ចាត់កម្លាំងនគរបាលប៉ុស្តិ៏សង្កាត់កូនក្រៀលធ្វើស្រាវជ្រាវឃាត់មុខសញ្ញាចោរលួចម៉ូតូបានម្នាក់ខណ:ពេលដែលចុះល្បាតនៅតាមមូលដ្ធាន ជាក់ស្តែង នៅយប់ថ្ងៃទី២៥ ខែកញ្ញា ឆ្នាំ២០២៣ វេលាម៉ោងប្រហែល ១៩និង០០នាទី កម្លាំងប្រជាការពារភូមិអូរឫស្សី សង្កាត់កូនគ្រៀល ក្រុងសំរោង បានចេញល្បាត ហើយបានប្រទះឃើញមុខសញ្ញាលួចម៉ូតូ ១នាក់ ឈ្មោះ យឿត ប៊ុនណេត ភេទប្រុស អាយុ ១៦ឆ្នាំ រស់នៅភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ (ជាមុខសញ្ញាសកម្មក្នុងអំពើលួច) រួមជាមួយវត្ថុតាងម៉ូតូ ១គ្រឿង ម៉ាកហុងដាទ្រីម ពណ៌ខ្មៅ ស៊េរីឆ្នាំ២០១១ មានលេខតួ+លេខម៉ាសុីន 8524996 ពាក់ផ្លាក់លេខ ឧត្តរមានជ័យ 1B-0237 ជាកម្មសិទ្ធិរបស់ឈ្មោះ ផាន សាអែម ភេទស្រី អាយុ ៣៤ឆ្នាំ មានទីលំនៅភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ ដែលបានបាត់ កាលថ្ងៃទី២៣ ខែកញ្ញា ឆ្នាំ២០២៣ វេលាម៉ោង ១៤៖០០នាទី ខណៈដែលបានចតទុកនៅរោងបាយខាងក្រោយផ្ទះ។
ករណីខាងលើនេះបន្ទាប់មកកម្លាំងប្រជាការពារភូមិ បានរាយការណ៍ជូនកម្លាំងនគរបាលប៉ុស្តិ៍រដ្ឋបាលកូនគ្រៀល ឲ្យចុះជួយអន្តរាគមន៍ភា្លមៗ និងធ្វើការឃាត់ខ្លួនជនសង្ស័យខាងលើ នាំមកកាន់អធិការដ្ឋាននគរបាលក្រុងសំរោង ដើម្បីសាកសួរតាមនីតិវិធី។
លោកវរសេនីយ៏ត្រីប៉ាតគីមនាយប៉ុស្តិ៏សង្កាត់កូនក្រៀលបានបញ្ជាក់ប្រាប់ឲ្យដឹងនៅល្ងាចថ្ងៃទី២៦ខែកញ្ញ្ញាឆ្នាំ២០២៣ថា ឆ្លងតាមកំណត់ហេតុស្តាប់ចម្លើយ ជនសង្ស័យខាងលើបានបានសារភាពថា៖ រូបគេពិតជាបានធ្វើសកម្មភាពលួចម៉ូតូរបស់ឈ្មោះ ផាន សាអែម ប្រាកដមែន។
នៅពេលធ្វើសកម្មភាពបានសម្រចហើយ រូបគេបានជិះម៉ូតូខាងលើ ទៅផ្ទះរបស់ឈ្មោះ ពេជ្រ ឈើន ភេទប្រុស រស់នៅភូមិអូរឬស្សី សង្កាត់កូនក្រៀល ក្រុងសំរោង ត្រូវជាបងប្អូនជីដូនមួយ បន្ទាប់មកខ្លួនក៏បានសម្រាកដេកលេងនៅទីនោះ ។ លុះដល់ថ្ងៃទី២៥ ខែកញ្ញា ឆ្នាំ២០២៣ វេលាម៉ោង ១១:០០នាទី រូបខ្លួន និងឈ្មោះ ពេជ្រ ឈើន បាននាំគ្នាជិះម៉ូតូដែលខ្លួនទើបលួចបាន ទៅទិញគ្រឿងញៀននៅភូមិអូរខ្លាឃ្មុំ សង្កាត់អូរស្មាច់ ក្រុងសំរោង យកត្រឡប់មកជក់នៅផ្ទះវិញ និងនៅពេលជក់រួច ខ្លួនជាមួយឈ្មោះ ពេជ្រ ឈើន បាននាំគ្នាឡើងទៅអូស្មាច់ ចូលកន្លែងម៉ាស្សា មិនត្រឹមតែប៉ុណ្ណោះ ជនសង្ស័យខាងលើ បានសារភាពថា៖ កន្លងមករូបគេធ្លាប់បានធ្វើសកម្មភាពលួចលុយ និងទ្រព្យសម្បត្តិរបស់ប្រជាពលរដ្ឋក្នុងភូមិសាស្ត្រក្រុងសំរោង បានសរុបចំនួន ១៤លើក (ដែលក្នុងនោះ លួចបានសម្រេច ចំនួន ៧ លើក និង លួចមិនបានសម្រេច ចំនួន ៧ លើក)។
បច្ចុប្បន្នជនសង្ស័យ និងវត្ថុតាងខាងលើ ត្រូវបានឃាត់នៅអធិការដ្ឋាននគរបាលក្រុងសំរោង ដើម្បីកសាងសំណុំរឿងតាមនីតិវិធី៕
