(ភ្នំពេញ)៖ ក្រោយពីបើកការស៊ើបអង្កេតយ៉ាងស៊ីជម្រៅអស់រយៈពេលជាច្រើនថ្ងៃសមត្ថកិច្ចជំនាញ និងស្ថាប័នតុលាការខេត្តកោះកុង បានរកឃើញថា ករណីនិស្សិតពេទ្យពីរនាក់ដែលបានស្លាប់នៅតំបន់ទេសចរណ៍ជីផាតកាលពីអំឡុងចុងខែកញ្ញា ឆ្នាំ២០២៣កន្លងទៅ ពុំមែនដោយសារការលង់ទឹកនោះទេ។
បន្ទាប់ពីចុះទៅស្រាវជ្រាវដល់កន្លែងកើតហេតុ សមត្ថកិច្ច ជំនាញបានសម្រេចឃាត់ខ្លួនស្ត្រីម្នាក់ឈ្មោះ ឌុក វណ្ណី ជាម្ចាស់ទីតាំងឈ្មោះជំរុំសត្វភេ ដែលក្រុមជនរងគ្រោះទាំងពីរនាក់ស្នាក់នៅបោះតង់ នៅមុនពេលពួកគេស្លាប់ នៅក្នុងតំបន់ទេសចរណ៍ជីផាត ស្ថិតនៅក្នុងភូមិកំលត ឃុំជីផាត ស្រុកថ្មបាំង ខេត្តកោះកុង។
ជនត្រូវចោទឈ្មោះ ឌុក វណ្ណី ត្រូវបានតុលាការខេត្តកោះកុងសម្រេចចោទប្រកាន់ និងឃុំខ្លួនជាបណ្ដោះអាសន្ន ក្រោមបទចោទ មនុស្សឃាតដោយអចេតនា យោងតាមមាត្រា ២០៧ នៃក្រមព្រហ្មទណ្ឌ។
យោងតាមរបាយការណ៍របស់មន្ត្រីសុខាភិបាលផ្នែកពិនិត្យសព បានសន្និដ្ឋានថា ជនរងគ្រោះឈ្មោះ ខាត់ ប៊ុនណារ៉េត បានស្លាប់ដោយសារការឆក់ចរន្តអគ្គិសនីហើយធ្លាក់ចូលក្នុងទឹក ដែលផ្ដើមចេញពីការតបណ្ដាញអគ្គិសនីធ្វេសប្រហែសរបស់ជនត្រូវចោទជាម្ចាស់ទីតាំងឈ្មោះ ឌុក វណ្ណី។
ចំណែកសមត្ថកិច្ចនគរបាលជំនាញកោសលវិច័យ បានសន្និដ្ឋានថាជនរងគ្រោះឈ្មោះ ហេង សុវណ្ណច័ន្ទពេជ្រ និងជនរងគ្រោះឈ្មោះ ខាត់ ប៊ុនណារ៉េត បានស្លាប់ដោយសារការឆក់ចរន្តអគ្គិសនីហើយធ្លាក់ចូលក្នុងទឹក ដែលផ្ដើមចេញពីការតបណ្ដាញអគ្គិសនីធ្វេសប្រហែសរបស់ជនត្រូវចោទជាម្ចាស់ទីតាំងឈ្មោះ ឌុក វណ្ណី។
គួររម្លឹកថា កាលពីថ្ងៃទី២៣ ខែកញ្ញា ឆ្នាំ២០២៣ ជនរងគ្រោះឈ្មោះ ខាត់ ប៊ុនណារ៉េត ភេទប្រុស ជានិស្សិតឆ្នាំទី៤ផ្នែកវិជ្ជសាស្ត្រ និងឈ្មោះ ហេង សុវណ្ណច័ន្ទពេជ្រ ភេទប្រុស ជានិស្សិតឆ្នាំទី៤ផ្នែកឱសថសាស្ត្រ នៃសាកលវិទ្យាល័យពុទ្ធិសាស្ត្រភ្នំពេញ បានចាកចេញពីផ្ទះទៅកម្សាន្តនៅតំបន់ទេសចរណ៍ជីផាត។
នៅពេលទៅដល់កន្លែងស្នាក់នៅឈ្មោះតំនប់ជំរុំសត្វភេ ដែលមានម្ចាស់ឈ្មោះ ឌុក វណ្ណី ជនរងគ្រោះទាំងពីរនាក់ក៏បានទំនាក់ទំនងទៅក្រុមគ្រួសារធម្មតា។
លុះដល់ព្រឹកថ្ងៃទី២៤ ខែកញ្ញា ឆ្នាំ២០២៣ នៅពេលគ្រួសារជនរងគ្រោះទាក់ទងទៅជនរងគ្រោះ ស្រាប់តែមានអ្នកលើកទូរស័ព្ទប្រាប់ថា ជនរងគ្រោះទាំងពីរនាក់បានស្លាប់ហើយ។
ជុំវិញការស្លាប់របស់ជនរងគ្រោះទាំងពីរនាក់ខាងលើនេះ គ្រួសារជនរងគ្រោះបានដាក់ពាក្យបណ្ដឹងទៅកាន់សាលាដំបូងខេត្តកោះកុង ដើម្បីស្នើសុំឱ្យមានការបើកការស៊ើបអង្កេតពាក់ព័ន្ធនឹងបទល្មើសមនុស្សឃាតដោយចេតនា។
ការដាក់បណ្ដឹងនេះ ដោយសារតែគ្រួសាររបស់ជនរងគ្រោះទាំងពីរនាក់ មិនអាចទទួលយកនូវសេចក្ដីសន្និដ្ឋានរបស់មន្ត្រីសុខាភិបាលផ្នែកពិនិត្យសព និងសមត្ថកិច្ចនគរបាលជំនាញកោសលវិច័យ ដែលអះអាងថាជនរងគ្រោះឆក់ចរន្តអគ្គិសនី រួចធ្លាក់ចូលទៅក្នុងទឹកលង់ស្លាប់។
គ្រួសាររបស់ជនរងគ្រោះ បានបញ្ជាក់នៅក្នុងពាក្យបណ្ដឹងចុះថ្ងៃទី០២ ខែតុលា ឆ្នាំ២០២៣ថា នៅលើដងខ្លួនរបស់ជនរងគ្រោះឈ្មោះ ហេង សុវណ្ណច័ន្ទពេជ្រ មានឈាមហូរតាមច្រមុះ តាមមាត់ និងតាមត្រជៀក។
ចំណែកជនរងគ្រោះឈ្មោះ ខាត់ ប៊ុនណារ៉េត មានឈាមហូរលើផ្ទៃមុខ តាមច្រមុះ តាមភ្នែក មានស្នាមរបួសលើបបូមាត់ មានស្នាមរបួសធ្លុះទៅក្នុងនៅចំណុចគល់ភ្នែកខាងឆ្វេងដូចជាមានមុតរបស់រឹង មានស្នាមសន្លាកជាំត្រង់កផ្នែកខាងមុខ និងមានស្នាមរលាត់ស្បែកប្រអប់ដៃឆ្វេង។
ដោយផ្អែកលើស្នាកស្នាមខាងលើនេះ គ្រួសាររបស់ជនរងគ្រោះដែលជាសុទ្ធតែជាគ្រូពេទ្យ បានចាត់ទុកថា ករណីនេះ គឺជាអំពើមនុស្សឃាតដោយចេតនា យ៉ាងពិតប្រាកដ មិនមែនជារឿងលង់ទឹកស្លាប់ ដូចការសន្និដ្ឋាន និងការផ្សព្វផ្សាយជាសាធារណៈដំបូងរបស់សមត្ថកិច្ចខេត្តកោះកុងនោះទេ៕
