(ខេត្តឧត្តរមានជ័យ) នៅរសៀលថ្ងៃពុធទី១៨ខែតុលាឆ្នាំ២០២៣នេះ ឯកឧត្តម គីម ប៊ុនថាន រដ្ឋមន្ត្រី ប្រតិភូអមនាយករដ្ឋមន្ត្រី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអញ្ជើញសំណេះសំណាល និងប្រគល់ទទួលសម្ភារ: គ្រឿងឧបភោគ បរិភោគ មានអង្ករចំនួន ២តោន មីចំនួន៥០កេស ត្រីខចំនួន១០កេស នឹងថវិកាចំនួនដែលជាអំណោយដ៏ថ្លៃថ្លា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី ហ៊ុន ម៉ាណែត ឧបត្ថម្ភដល់ អង្គភាពកងពលតូចថ្មើរជើងលេខ៤២ចំណុះយោធភូមិភាគទី៤។
នៅក្នុងរបាយការណ៍ស្វាគមន៍ របស់ លោកឧត្តមសេនីយ៍ត្រី សុឹមសុខា មេបញ្ជាការ រងកងពលតូចថ្មើរជើងលេខ៤២តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៏ទោ ប៉ែនប៉ូយ មេបញ្ជាការកងពលតូចថ្មើរជើងលេខ៤២ បានគូសបញ្ជាក់ថា សម្ដេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា ជានិច្ចជាកាលបានឧបត្ថម្ភគ្រឿងឧបភោគបរិភោគ សម្ភារប្រើប្រាស់ ស័ង្កសី គ្រឿងសំណង់ជាច្រើនជូនដល់អង្គភាព ដើម្បីបម្រើការងារមនុស្សធម៌ ចែកជូន ប្រជាពលរដ្ឋក្រីក្រ និងជួបគ្រោះមហន្តរាយផ្សេងៗ ចាប់តាំងពីសម្ដេច នៅជាអគ្គមេបញ្ជាការរង និងជាមេបញ្ជាការ កងទ័ពជើងគោក ហើយអង្គភាពក៏បាននាំយកអំណោយទាំងនោះទៅចែកជូនប្រជាពលរដ្ឋ និងគ្រួសារយោធិនជួបការលំបាកដល់គោលដៅជាបន្តបន្ទាប់ផងដែរ។
មានមតិសំណេះសំណាល ក្នុងឱកាសនេះដែរ ឯកឧត្តម គីម ប៊ុនថាន រដ្ឋមន្ត្រី ប្រតិភូអមនាយករដ្ឋមន្ត្រី បានពាំនាំនូវការសួរសុខទុក្ខ ពីសំណាក់សម្តេចធិបតីនាយករដ្ឋមន្ត្រី និងលោកជំទាវ ជូនចំពោះ នាយ-ពលទាហាន ទាំងអស់ ដោយក្តីនឹករលឹក ការគិតគូរជានិច្ចពីសុខទុក្ខរបស់បងប្អូនកងទ័ពគ្រប់រូប ក្នុងន័យជួយកសាងពង្រឹងកងកម្លាំងប្រដាប់អាវុធ ជាពិសេស កងទ័ពជួរមុខឲ្យមានគុណភាពនិងប្រសិទ្ធភាពខ្ពស់ដើម្បីធានាការពារ បូរណភាពទឹកដី ពិសេសការពារខ្សែបន្ទាត់ព្រំដែន កម្ពុជា ថៃ។
គួររំលឹកថា ជំនួសមុខឲ្យ ថ្នាក់ដឹកនាំ នាយទាហាន នាយទាហានរង និងពលទាហាន ទាំងអស់ទូទាំង កងពលតូចថ្មើរជើងលេខ៤២ សូមគោរពថ្លែងអំណរគុណ យ៉ាងជ្រាលជ្រៅបំផុតចំពោះ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុនី ដែលតែងតែឧបត្ថម្ភ គ្រឿងឧបភោគបរិភោគ ឧបករណ៍ សម្ភារប្រើប្រាស់ ដល់អង្គភាព កងពលតូចថ្មើរជើងលេខ៤២និងសូមប្តេជ្ញាថែរក្សា និងប្រើប្រាស់សម្ភារទាំងអស់ឲ្យចំគោលដៅ ដើម្បីបុព្វហេតុជាតិមាតុភូមិ និងប្រជាជន។
