ភ្នំពេញ ៖ លោក កង វង ចៅសង្កាត់ចោមចៅទី១ បានអញ្ជើញចូលរួមហូបនំបញ្ចុកសាមគ្គីភាព និងឯកភាពជាតិខ្មែរ ជាមួយ បងប្អូនប្រជាពលរដ្ឋក្នុងមូលដ្ឋាន សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ
នៅព្រឹកថ្ងៃអាទិត្យ ៧កើត ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៩ ខែមិថុនា ឆ្នាំ២០១៩នេះ។
ដោយស្របតាមអនុសាសន៍សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ប្រកាសអោយមន្ត្រីគ្រប់ជាន់ថ្នាក់ និងប្រជាពលរដ្ឋ ហូបនំបញ្ចុកសាមគ្គី ឯកភាពជាតិ នាថ្ងៃទី០៩ ខែមិថុនា ឆ្នាំ២០១៩ នេះឲ្យគ្រប់ៗគ្នា សូមអោយកម្ពុជាមានសុខសន្តិភាពជារៀងរហូត សូមឲ្យពលរដ្ឋខ្មែរស្រលាញ់គ្នាស្អិតរមួត ដូចម្សៅនំបញ្ចុក និងរួមសាមគ្គីគ្នាជាសសៃដូចនំបញ្ចុក ដើម្បីជាតិខ្មែរ។
យោងតាមរបាយការណ៍សង្កាត់បានបញ្ជាក់ថា នៅក្នុងពិធីហូបនំបញ្ចុកសាមគ្គីភាព និងឯកភាពជាតិ នាព្រឹកថ្ងៃទី៩នេះ មានបងប្អូនប្រជាពលរដ្ឋចូលរួមយ៉ាងច្រើនកុំករ មិនថា ចាស់ក្មេង កម្មករកម្មការីនីជាង២ពាន់ នាក់ទូទាំងសង្កាត់ ហើយចំណាយថវិកាអស់ជាង៦លានរៀលផងដែរ។
លោក កង វង ចៅសង្កាត់ចោមចៅទី១ បានឲ្យដឹងថា ពិធីហូបនំបញ្ចុកសាមគ្គីភាព និងឯកភាពជាតិខ្មែរ នេះគឺបានសបញ្ជាក់ឲ្យឃើញគឺភាពសាមគ្គីរបស់បងប្អូនប្រជាពលរដ្ឋ នៅក្នុងការកសាងជាតិ ឯកភាពជាតិ និងរក្សាសន្តិភាព ដែលបានមកដោយលំបាក ពីប្រមុខរាជរដ្ឋាភិបាល នៃព្រះរាជាណាចក្រកម្ពុជាយើង៕
