ព្រះសីហនុ៖ យោងតាមរបាយការណ៏ ពីកងរាជអាវុធហត្ថខេត្តព្រះសីហនុ ឲ្យដឹងថា កម្លាំងអាវុធហត្ថខេត្តព្រះសីហនុ បាននាំខ្លួនជនជាតិឥណ្ឌូនេស៊ី និងមន្ត្រីយោធា ម្នាក់ទៀត ដែលបើកបររថយន្ត ពាក់ស្លាកលេខ ខេមរភូមិន្ទ (ខ.ម) ក្លែងបន្លំ មកណែនាំអប់រំ និងធ្វើការកិច្ចសន្យា កាលពីថ្ងៃត្រង់ថ្ងៃទី១៤ ខែមិថុនា ឆ្នាំ២០១៩ម្សិលមិញនេះ។
ប្រតិបត្តិការនេះ ដឹកនាំដោយលោក គីវ ប៊ុណ្ណារិទ្ធ នាយការិយាល័យបទល្មើសយោធា ដោយបានចុះឆែកត្រួតពិនិត្យ និងនាំខ្លួនអ្នកបើកបររថយន្ តពាក់ស្លាកលេខ ខេមរភូមិន្ទ (ខ.ម) ក្លែងបន្លំ គ្មានឯកសារ បញ្ជាក់ត្រឹមត្រូវ កំពុងចរាចរណ៍តាមដងផ្លូវ ក្នុងក្រុងព្រះសីហនុ ដោយឃាត់ខ្លួនជនសង្ស័យ ចំនួន២នាក់ ទី១ឈ្មោះ កើត សុផល អត្តលេខ ២៣២៨៣១ ឋានន្តរសក្តិថ្នាក់ “អនុសេនីយ៍ឯក” មុខងារ ជំនួយការការិយាល័យបុគ្គលិក អង្គភាពបញ្ជូនសារ អគ្គបញ្ជាការដ្ឋាន (បើកបររថយន្តស្លាកលេខខ-ម គ្មានឯកសារ)។
ទី២ឈ្មោះ KUANIA WAN WIJAYA ភេទប្រុស អាយុ៣៤ឆ្នាំ ជនជាតិឥណ្ឌូនេស៊ី ស្នាក់នៅក្នុងកាស៊ីណូ SV ខេត្តព្រះសីហនុ ជាអ្នកហៅរថយន្តមកពីភ្នំពេញ តាមរយមិត្តភ័ក្រ ឈ្មោះ ដេវីត មុខរបរ លក់ឡាន នៅភ្នំពេញ សម្រាប់យកមកដឹកភ្ញៀវចិន ពីអាកាសយានដ្ឋានអន្តរជាតិ ខេត្តព្រះសីហនុចូលមកក្នុងក្រុង។
ប្រតិបត្តការខាងលើ កម្លាំងបានដកហូតវត្ថុតាង រថយន្ត១គ្រឿង ម៉ាក Escalade សេរីផលិតឆ្នាំ២០០៤ បិទស្កុតពណ៌ត្រេអ៉ី ពាក់ស្លាកលេខ (ខ-ម០២ ២-៣១៧១)។
កម្លាំងកងរាជអាវុធហត្ថ អះអាងថា ដោយយោងតាមការណែនាំ របស់លោកព្រះរាជអាជ្ញាអមសាលាដំបូងខេត្តព្រះសីហនុ ចំពោះជនជាតិឥណ្ឌូនេស៊ី បានណែនាំឲ្យធ្វើកិច្ចសន្យា អប់រំ ត្រឡប់ទៅវិញ។ ចំពោះមន្ត្រីយោធា ត្រូវរង់ចាំឲ្យមេញ្ជាការអង្គភាពមកធានា និងធ្វើកិច្ចសន្យា យកត្រឡប់ទៅអង្គភាពដើមវិញ។
ចំណែករថយន្ត ត្រូវដកហូត យកមករក្សាទុក ក្នុងទីបញ្ជាការអាវុធហត្ថខេត្ត ដើម្បីបន្តនីតិវិធី៕
