កំពត ៖ យោងគណនីហ្វេកប៊ុកផ្លូវការរបស់ ស្នងការដ្ឋាននគរបាលខេត្តកំពត នៅរសៀលថ្ងៃទី១៥ ខែមិថុនា ឆ្នាំ២០១៩ នេះបានបញ្ជាក់ថា ស្នងការដ្ឋាននគរបាលខេត្តកំពត សូមជម្រាបជូនដល់សាធារណៈជនទាំងអស់មេត្តាជ្រាបថា ស្នងការដ្ឋានមានសេចក្ដីត្រេកអរ ដែលបានទទួលព័ត៌មានក្នុងបណ្តាញសង្គម អំពីមានក្រុមក្មេងស្ទាវ នាំគ្នាបង្ហោះម៉ូតូពេញផ្លូវ នៅចំណុចរូបសំណាកលោកយាយម៉ៅ (ចំណុចនេះប្រព័ន្ធទូរស័ព្ទគ្មានសេវា ដើម្បីទំនាក់ទំនង) ក្នុងរមណីយដ្ឋានបូកគោ។
ប្រភពដដែលបានបញ្ជាក់ទៀតថា ជុំវិញបញ្ហាទាំងអស់នេះ យើងខ្ញុំសូមបញ្ជាក់ថា តំបន់រមណីយដ្ឋាននេះ គឺស្ថិតនៅក្រោមការគ្រប់គ្រងរបស់ក្រុមហ៊ុនឋានសួគ៌បូកគោ ដោយប្រើប្រាស់កម្លាំងសន្តិសុខឯកជន សហការជាមួយកម្លាំងនគរបាលយើងខ្ញុំ នៅចំណុចសំខាន់ៗ មួយចំនួន ។ ដោយលក្ខណៈភូមិសាស្ត្រក្នុងរមណីយដ្ឋានធំទូលាយ ទើបបណ្តាលឲ្យក្រុមក្មេងទំនើងឆក់ឱកាសធ្វើសកម្មភាពបង្ហោះម៉ូតូប៉ះពាល់ដល់សណ្ដាប់ធ្នាប់នេះតែម្តង ។ ករណីនេះសមត្ថកិច្ចយើងនឹងបង្កើនវិធានការទប់ស្កាត់ ដើម្បីរក្សាសណ្តាប់ធ្នាប់ និងសុវត្ថិភាពជូនបងប្អូនភ្ញៀវទេសចរណ៍មកលេងកម្សាន្តសប្បាយ ។ សូមអរគុណ!
