ភ្នំពេញ៖ សិប្បកម្មផលិតដាវសាំម៉ូរ៉ៃ កាំបិតគ្រប់ប្រភេទ មួយកន្លែង សង្ស័យអត់ច្បាប់ ត្រូវបានអជ្ញាធរខណ្ឌពោធិ៍សែនជ័យ ដឹកនាំដោយលោក ហែម ដារឺទ្ធ អភិបាលខណ្ឌ ចុះឆែកឆេរត្រួតពិនិត្យ នឹងឃាត់ខ្លួនមនុស្ស៥នាក់ រួមទាំងម្ចាស់សិប្បកម្ម ដកហូតដាវ កាំបិតរាប់រយដើម និងផ្អាកសកម្មភាពជាបណ្តោះអាសន្ន។
ប្រតិបត្តិការចុះផ្អាកទីតាំងសម្បកម្មខាងលើ ត្រូវបានធ្វើឡើង កាលពីវេលាម៉ោង១០ព្រឹក ថ្ងៃទី១៥ មិថុនា ឆ្នាំ២០១៩ នៅចំការឪឡឹក២ សង្កាត់កាកាពទី២ ខណ្ឌពោធិ៍សែនជ័យ រាជធានីភ្នំពេញ។
បើតាមលោក ភា ប្រុស នាយប៉ុស្តិ៍កាកាប២ បានឲ្យដឹងថា គាត់ក៏មិនដឹងថា ទីតាំងខាងលើ បើកកន្លែងផលិតដាវ កាំបិត សុទ្ធសឹងតែអាចចាត់ទុកថាជាអាវុធមួយប្រភេទបែបនេះទេ តែក្រោយពីបែកធ្លាយក្រុមបងតូចបងធំ ដែលកម្លាំងប៉ុស្តិ៍របស់លោក បង្ក្រាបបានកន្លងមក និងប្រជាពលរដ្ឋក្នុងមូលដ្ឋាន រាយការណ៍ពីទីតាំងខាងលើ ផលិតដាវសម្រាប់លក់ ទើបកម្លាំងប៉ុស្តិ៍ចុះទៅស៊ើបអង្កេត ស្រាវជ្រាវ ដឹងថាពិតជាមានការផលិតសម្ភារះអស់ទាំងនេះមែន មិនដឹងថាមានច្បាប់ ឬអត់ច្បាប់នោះទេ រួចលោកក៏រាយការណ៍ទៅផ្នែកជំនាញ អាជ្ញាធរខណ្ឌ ទើបនៅព្រឹកថ្ងៃទី១៥ ខែមិថុនានេះ គណៈបញ្ជាការឯកភាពខណ្ឌពោធិសែនជ័យ ដឹកនាំដោយ លោក ហែម ដារិទ្ធ អភិបាលខណ្ឌ ចុះទៅធ្វើការត្រួតពិនិត្យជាក់ស្តែង រកឃើញដាគ្រប់ប្រភេទ រាប់រយដើមតែម្តង។
ម្ចាស់ទីតាំងខាងលើឈ្មោះ សង សុគន្ធា ភេទស្រី អាយុ២៦ឆ្នាំ ជាម្ចាស់សិប្បកម្ម មានស្រុកកំណើត ភូមិចុងកោះ ឃុំកោះអន្លង់ចិន ស្រុកស្អាង ខេត្តកណ្តាល ត្រូវសមត្ថកិច្ចឃាត់ខ្លួន។
បើតាមអ្នកបម្រើការងារ នៅសិប្បកម្មផលិតដាវខាងលើ មិនបាននិយាយរឿងច្បាប់ផលិតឡើយ គ្រាន់តែប្រាប់ឲ្យដឹងថា ដាវ កាំបិត ទាំងនេះផលិតបានហើយ នាំចេញទៅលក់នៅក្រៅប្រទេស។ តែបើតាមអាជ្ញាធរ បានឲ្យដឹងថា ទីតាំងសិប្បកម្មផលិតដាវ កាំបិតខាងលើ គ្មានច្បាប់ ហើយអាជ្ញាធរ មិនបានដឹងឡើយ។
ប្រតិបត្តិការខាងលើ សមត្ថកិច្ច បានដកហូត និងរឹបអូសដាវ កាំបិត បានរាប់រយដើម យកទៅរក្សាទុក ជាបណ្តោះអាសន្ន និងនាំខ្លួនមនុស្ស៥ នាក់ ប្រុស៣នាក់ ស្ត្រីម្ចាស់ទីតាំង ទៅសាកសួរនៅផ្នែកជំនាញ អធិការដ្ឋាននគរបាលខណ្ឌពោធិ៍សែនជ័យ៕
