ស្វាយរៀង ៖ ជនសង្ស័យ២នាក់ត្រូវបាន កំលាំងប៉ុស្តិ៍នគរបាលរដ្ឋបាល ឃុំសំឡី ស្រុកកំពង់រោទិ៍ ឃាត់ខ្លួន
បន្ទាប់ពីពួកគេលួចគោហើយវះសាច់យកធ្វើម្ហូប ដែលមើលទៅគួរឲ្យអាសូរជាពន់ពេក។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីយប់ថ្ងៃទី១៩ ខែមិថុនា ឆ្នាំ២០១៩ ម៉ោង១៨ នៅចំណុចខាងលិចទួលព្រៃពោន ចម្ងាយ ៥០០ម៉ែត្រ ស្ថិតក្នុងភូមិសំឡីខាងត្បូង ឃុំសំឡី ស្រុកកំពង់រោទិ៍ ខេត្តស្វាយរៀង។
សមត្ថកិច្ចបានបញ្ជាក់ថា ជនសង្ស័យមានឈ្មោះ ៖ ទី១.ញឹម ចន្នា ភេទប្រុស អាយុ៣៩ឆ្នាំ មុខរបរធ្វើស្រែ មានទីលំនៅភូមិ ឃុំខាងលើ និងទី២. អឿន ឈើកា ភេទប្រុស អាយុ ២៥ឆ្នាំ មុខរបរកម្មករ មានទីលំនៅ ភូមិសំឡីខាងជើង ឃុំសំឡី ។
សមត្ថកិច្ចបន្តថា មុនកើតហេតុកម្លាំងនគរបាលប៉ុស្តិ៍រដ្ឋបាលឃុំសំឡី ស្រុកកំពង់រោទិ៍ បានចេញល្បាតក្នុងភូមិសាស្ត្ររបស់ខ្លួនពេលយប់ ក៏បានប្រទះឃើញជនសង្ស័យចំនួន២នាក់ កំពុងធ្វើសកម្មភាពប្រលះគោ ឈ្មោលមួយក្បាល ពណ៌ត្នោត ដែលរុំជាប់នឹង ដើមអាកាស្យា លើភ្លឺប្រឡាយ រួចក៏ឃាត់ខ្លួនតែម្ដង។
សមត្ថកិច្ចបានសួរចំលើយជនសង្ស័យទាំង២នាក់ ពួកគេបានឆ្លើយសារភាពថា ខ្លួនពិតជាបានលួចវះគោរបស់ប្រជាពលរដ្ឋពិតមែនប្រាកដមែន។
បច្ចុប្បន្នជនសង្ស័យទាំង២នាក់ខាងលើ ត្រូវបានកម្លាំងនគរបាលបំពេញសំណុំរឿង បញ្ជួនទៅតុលាការចាត់ការតាមច្បាប់៕
