បាត់ដំបង ៖ ជនសង្ស័យម្នាក់ដែលបានធ្វើសកម្មភាពឆក់កាបូបមន្រ្តីកងរាជអាវុធហ្ថម្នាក់កាលពីថ្ងៃទី២១ ខែមិថុនា ឆ្នាំ២០១៩ ពេលនេះត្រូវបាន សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយ កម្លាំងនគរបាលព្រហ្មទណ្ឌកម្រិតស្រាលខេត្តបាត់ដំបង ឃាត់ខ្លួនបានហើយ បន្ទាប់ពីរូបគេរត់មកលាក់ខ្លួននៅចំណុចក្រុមទី០៨ ភូមិមាណោក ឃុំតាលាស់ ស្រុកមោងឬស្សី ខេត្តបាត់ដំបង។
សមត្ថកិច្ចបញ្ជាក់ថា ជនសង្ស័យខាងលើមានឈ្មោះ អោក ធារ៉ូ ភេទប្រុស អាយុ២៤ឆ្នាំ មានទីលំនៅ សង្កាត់គីឡូលេខ៦ ខណ្ឌឬស្សីកែវ រាជធានីភ្នំពេញ។
គួររំលឹកផងដែរថា ជនសង្ស័យ និងបក្សពួកមួយក្រុម បានធ្វើសកម្មភាពឆក់កាបូប កាលពីថ្ងៃទី១២ មិថុនា ឆ្នាំ២០១៩ វេលាម៉ោង១៣ និង១៥នាទី នៅចំណុចមុខហាងលក់រថយន្តយីហោ លេង បូភក្ត្រ ស្ថិតនៅតាមបណ្ដោយផ្លូវលេខ៥៩៨ ភូមិកោះអណ្តែត សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ របស់ជនរងគ្រោះឈ្មោះ តុល គឹមឈុន ភេទប្រុស អាយុ៣៤ឆ្នាំ មុខរបរជាមន្ត្រីកងរាជអាវុធហត្ថ។
បច្ចុប្បន្នជនសង្ស័យបានប្រគល់ឲ្យកម្លាំងនគរបាលព្រហ្មទណ្ឌកម្រិតស្រាលរាធានីភ្នំពេញដើម្បីចាត់ការបន្តតាមនីតិវិធី៕
