ខេត្តពោធិ៍សាត់ ៖ ក្មេងស្រីម្នាក់ ជិះកង់ចេញពីសាលារៀនលើផ្លូវជាតិដល់ផ្ទះបត់ឆ្លងផ្លូវមិនប្រយ័ត្ន ត្រូវរថយន្តបើកលឿនមកពីក្រោយ បុកស្លាប់ ពេលដឹកដល់មន្ទីរពេទ្យ។
ករណីគ្រោះថ្នាក់ចរាចរណ៍នេះ កើតឡើងកាលពីវេលាម៉ោង១១និង១០នាទី ព្រឹក ថ្ងៃទី២៦ ខែមិថុនា ឆ្នាំ២០១៩ ស្ថិតក្នុង ភូមិស្វាយស ឃុំស្នាអន្សា ស្រុកក្រគរ ខេត្តពោធិ៍សាត់។
នគរបាលមូលដ្ឋានប្រាប់ថា ក្មេងស្រីរងគ្រោះឈ្មោះថន ចន្ត្រា អាយុ១១ឆ្នាំ ជនជាតិខ្មែររ ស់នៅភូមិស្វាយស ឃុំស្នាអន្សា ស្រុកក្រគរ ខេត្តពោធិ៍សាត់មុខរបជាសិស្ស។
មន្ត្រីដដែលបន្តថា មុនពេលកើតហេតុក្មេងស្រីរងគ្រោះជាសិស្សសាលាបឋមសិក្សាស្នាអន្សា បានជិះកង់ឆ្ពោះទៅផ្ទះរបស់គេតាមបណ្ដោយផ្លូវជាតិលេខ៥ ក្នុងទិសដៅពីកើតទៅលិច លុះមកដល់ចំណុចចន្លោះគីឡូម៉ែត្រលេខ១៦២ -១៦៣ (ចំណុចផ្ទះរបស់ខ្លួន) ក្មេងរងគ្រោះ ក៏បានបត់កង់ឆ្លងថ្នល់ពីជើងទៅត្បូង ក្នុងគោលបំណងចូលផ្ទះ ខណៈពេលក្មេងស្រីរងគ្រោះបត់កង់ឆ្លងផ្លូវមិនបានប្រយ័ត្ន គាប់ជួន ស្រាប់តែមានរថយន្តម៉ាកអ៊ីស៊ុយស៊ុយ១គ្រឿងពណ៌ទឹកប្រាក់ពាក់ស្លាកលេខភ្នំពេញ2P-4634 បើកបោះពួយយ៉ាងលឿន ធ្វើចរាចរណ៍ ក្នុងទិសដៅស្របគ្នាមកពីក្រោយ ក៏បានបុកក្មេងស្រីរងគ្រោះ បណ្តាលឲ្យរងរបួសធ្ងន់ នៅលើដងផ្លូវ។
ភ្លាមនោះ អ្នកបើករថយន្តបង្កឃើញហេតុការណ៍ដូចនេះ ក៏ឈប់រថយន្ត ទុកចោលក្បែរកន្លែងកើតហេតុ រួចចុះរត់គេចខ្លួនបាត់។
ក្រោយពេលកើតហេតុភ្លាម ធ្វើឲ្យមានការភ្ញាក់ផ្អើលក្រុមគ្រួសារ និងដល់សមត្ថកិច្ចចុះដល់កន្លែងកើតហេតុបញ្ជូនក្មេងស្រីរងគ្រោះមកសង្គ្រោះបន្ទាន់នៅមន្ទីរពេទ្យបង្អែកក្រគរ ពេលទៅដល់មន្ទីរពេទ្យក្មេងស្រីរងគ្រោះរបួសធ្ងន់ធ្ងរពេកក៏បានដាច់ខ្យល់ស្លាប់តែម្ដង។
លោក នួន សុភាព ផ្នែកចរាចរណ៍ទី នោះប្រាប់ថា ដោយឡែកវត្កវត្ថុតាងកង់និងរថយន្តត្រូវបាននគរបាល ចរាចរណ៍ ស្រុកក្រគរ ធ្វើការវាស់វែង រួចយកទៅរក្សាទុកបណ្ដោះអាសន្នដើម្បីដោះស្រាយផ្លូវច្បាប់ពេលក្រោយ៕
