ភ្នំពេញ៖ គ្រោះអគ្គីភ័យដ៏ខ្លាំងក្លាមួយ ផ្តើមចេញពីការឆេះឃ្លាំងស្តុបខោអាវជជុះ រាលដាលឆេះដល់ផ្ទះ បងប្អូនប្រជាពលរដ្ឋជាច្រើនខ្នង ជាបន្តបន្ទាប់ យ៉ាងសន្ធោសន្ធៅ ដែលនៅជាប់នឹងសាលារៀន ទួនហ្វា តាមបណ្ដោយផ្លូវលេខ១៧៣ ស្ថិតនៅក្នុងសង្កាត់អូឡាំពិក ខណ្ឌបឹងកេងកង រាជធានីភ្នំពេញ បង្កឲ្យមានការភ្ញាក់ផ្អើលកាលពីវេលាម៉ោង១១និង៥០នាទីយប់ ថ្ងៃទី១ ខែកក្កដា ឆ្នាំ២០១៩ រហូតដល់ម៉ោង៦និង៤០នាទីព្រឹក ថ្ងៃទី២ ខែកក្ដដានេះ នៅមិនទាន់រលត់នៅឡើយទេ ។
យោងតាមប្រភពព័ត៌មាន ពីប្រជាពលរដ្ឋបានឲ្យដឹងថា មុនពេលកើតហេតុ ពួកគាត់បានលឺសម្លេងផ្ទុះ (ដូចជាផ្ទុះហ្គាស់) មួយសន្ទុះក្រោយមក ស្រាប់តែឃើញមានអណ្ដាតភ្លើង ចេញពីក្នុងផ្ទះប្រជាពលរដ្ឋ ដែលស្តុបខោអាវជជុះយ៉ាងខ្លាំង និងរាលដាលដល់ផ្ទះពួកគាត់ ជាប់ៗគ្នាជាបន្តបន្ទាប់ យ៉ាងសន្ធោសន្ធៅតែម្ដង ។
ក្នុងហេតុការណ៍អគ្គីភ័យនេះ កម្លាំងសមត្ថកិច្ច និងជំនាញផ្នែកអន្តរាគមន៍ពន្លត់អគ្គីភ័យ មានការពិបាកក្នុងការជួយពន្លត់យ៉ាងខ្លាំង ព្រោះទីតាំងកើតហេតុ មានចន្លះតូចចង្អៀត និងផ្ទះកើតហេតុ ងាយស្រួលក្នុងឆាបឆេះផងដែរ ទើបភ្លើងកាន់តែឆេះខ្លាំងឡើងៗ រហូតអស់ផ្ទះប្រជាពលរដ្ឋជាខ្នងបែបនេះ ក៏ប៉ុន្តែពុំមានអ្នករងរបួសអ្វីនោះឡើយ ។
សន្ឋិដ្ឋានជំហ៊ានដំបូងរបស់សមត្ថកិច្ច បានឲ្យដឹងថា អគ្គីភ័យនេះ បណ្ដាលមកពីឆ្លងចរន្តអគ្គិសនី និងបានប្រើប្រាស់រថយន្តពន្លត់អគ្គីភ័យ ចំនួន៥០គ្រឿង ហើយឆេះផ្ទះប្រជាពលរដ្ឋ អស់ជាច្រើនខ្នង ខណៈមកដល់វេលាម៉ោង៦និង៤០នាទីព្រឹក ថ្ងៃទី២ កក្កដានេះ អគ្គីភ័យនៅមិនទាន់រលត់នោះទេ ៕
