ស្វាយរៀង ៖ យ៉ាងហោចណាស់មនុស្សប្រុសស្រី៥នាក់បានស្លាប់និងរងរបួសនៅក្នុងករណីគ្រោះថ្នាក់ចរាចរណ៍មួយរវាងរថយន្តម៉ាកព្រូសនិងរថយន្តមិនស្គាល់ម៉ាកដែលហេតុការណ៍នៃគ្រោះថ្នាក់ចរាចរណ៍ដ៍ឱ្យរន្ធត់នេះបានកើតឡើងកាលពីវេលាម៉ោង២៣និង៣០នាទីយប់ថ្ងៃទី០៣ខែកក្កដា ឆ្នាំ២០១៩នេះ។
សមត្ថកិច្ចបានឱ្យដឹងថា មានគ្រោះថ្នាក់ចរាចរណ៍ រវាងរថយន្តម៉ាកព្រួស និងរថយន្តមិនស្គាល់អត្តសញ្ញាណបើកបរ ក្នុងទិសដៅស្របគ្នា ពីលិចទៅកើត លើផ្លូវជាតិលេខ១ចន្លោះគីឡូម៉ែត្តលេខ១៥៩-១៦០ ស្ថិតក្នុងភូមិត្រពាំងផ្លុង សង្កាត់បាទី ក្រុងបាវិត បណ្តាលឲ្យស្លាប់នៅកន្លែងកើតហេតុ ចំនួន ០៣ នាក់ អ្នកបើកបររថយន្ត ១ នាក់ ជនជាតិខ្មែរ ជនជាតិចិន២ នាក់ ជាស្ត្រីនិងរបួសធ្ងន់០២ នាក់ ប្រុស ជនជាតិចិន ។
ប្រភពខាងលើបានបន្តថា រីឯរថយន្តម្ខាងទៀតក្រោយពេលកើតហេតុបានបើករត់គេចខ្លួនបាត់ មូលហេតុអ្នកបើកបររថយន្តម៉ាកព្រួសប្រើប្រាស់ល្បឿនលឿន។
បច្ចុប្បន្នអ្នករបួសធ្ងន់ទាំង០២នាក់ បានបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង និងសាកសព០៣នាក់បានយកទៅតម្កល់ទុកនៅវត្តពោធិថ្មី(ហៅវត្តបាវិត) ដើម្បីរងចាំប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
មធ្យោបាយសមត្ថកិច្ចបានយកមករក្សាទុកនៅអធិការដ្ឋាននគរបាលក្រុងបាវិត ដើម្បីបង្កសំណុំរឿងចាត់ការតាមនីតិវិធីច្បាប៕
