កំពង់ធំ៖ នៅថ្ងៃទី៩ ខែកក្កដា ឆ្នាំ ២០១៩ វេលាម៉ោង៨:១៥នាទី សមត្ថកិច្ចបានទទួលព័ត៌មានថា៖ នៅតំបន់ទួលម្រិញភូមិប៉ប្រក ឃុំស្វាយភ្លើង ស្រុកតាំងគោក ខេត្តកំពង់ធំ មានមនុស្សដេកស្លាប់ នៅទីវាល។
ទទួលបានព័ត៌មានភ្លាម កម្លាំងជំនាញស្រុក,ប៉ុស្តិ៍រដ្ឋបាល,អាជ្ញាធរមូលដ្ឋាន និងសាច់ញាតិនៃសព បានទៅដល់កន្លែងកើតហេតុ និងពិនិត្យសាកសពមានសភាពហើមប៉ោង ក្លិនស្អុយ ប្រេះស្បែក ប្រែពណ៌ខ្មៅ ដោយត្រូវកំដៅថ្ងៃ ក្រៅពីនោះមិនមានស្លាកស្នាមអ្វី ដែលពាក់ព័ន្ធនឹងអំពើឃាតកម្មឡើយ។
សមត្ថកិច្ចបានឲ្យដឹងថា សពមានឈ្មោះ រៀម រួន ហៅ វល្ល៍ ភេទប្រុស អាយុ ៥២ឆ្នាំ នៅភូមិបប៉្រក ឃុំស្វាយ ភ្លើង ស្រុកតាំគោក ខេត្តកំពង់ធំ។
ប្រភពពីសមត្ថកិច្ចបានបន្ដថា មុនកើតហេតុ ជនរងគ្រោះបានហូបស្រាថ្នាំជាមួយ ឈ្មោះ ភី សុដា ហៅ ញ៉េប ភេទ ប្រុស អាយុ ៣៦ឆ្នាំ នៅភូមិ-ឃុំ កើតហេតុ តាំងពីព្រឹករហូត ដល់ម៉ោងប្រហែល៨យប់ទើបឈប់ បន្ទាប់មកឈ្មោះ ញ៉េប បានយកភួយអោយជន រងគ្រោះទៅដេកផ្ទះប្អូនគាត់នៅក្បែរនោះដែរ(ផ្ទះគ្មានមនុស្សនៅ) ចំណែកឈ្មោះ ញ៉េប ក៏ឡើងលើផ្ទះដេក រហូតដល់ម៉ោង៣ទៀបភ្លឺទើបគាត់ភ្ញាក់ចុះមកក្រោមផ្ទះ ឃើញតែភួយទុកនៅក្រោមផ្ទះ មិនឃើញមនុស្សហើយ ដើរទៅមើលនៅផ្ទះប្អូននៃសពមិនឃើញក៏ត្រឡប់មកសួរម្ដាយសពក៏ប្រាប់ថា៖ មិនឃើញដែរ នាំគ្នាដើរកតែរកមិនឃើញសោះស្មានថា វាទៅផ្ទះប្រពន្ធវាហើយ។
លុះដល់ថ្ងៃទី០៩ខែកក្កដាឆ្នាំ២០១៩ វេលាម៉ោងប្រហែល ៧ព្រឹកម្ដាយរបស់ឈ្មោះ ញ៉េប នៅភូមិស្វាយភ្លើង ទូរស័ព្ទមកប្រាប់ថា ឈ្មោះ វល្លិ៍ ដេកស្លាប់នៅវាលស្រែ តំបន់ទួលម្រិញ ទើបឈ្មោះ ញ៉េប ទៅមើល ឃើញស្គាល់ថា៖ ជាសពឈ្មោះ វល្លិ៍ ពិតមែន។
បេីតាមប្រភពព័ត៌មានពីឈ្មោះ ភី សុដា ហៅ ញ៉េប, ឈ្មោះ រៀម រ៉េម,រីន រួន,រៀម ចិន្តា បានបញ្ជាក់ថា ឈ្មោះ រៀម វល្លិ៍ តែងផឹកស្រាជាមួយគាត់ជា ប្រចាំ(ប្រមឹក) ហើយនៅថ្ងៃទី៤ខែកក្កដាឆ្នាំ២០១៩ ជនរងគ្រោះផឹកជាមួយ ឈ្មោះ ញ៉េប តាំងពីព្រឹក រហូតដល់ម៉ោង៨យប់ទើបឈប់ផឹកចប់ឲ្យភួយ១ទៅដេកនៅផ្ទះប្អូនគាត់នៅក្បែរនោះដែរហើយបាត់ខ្លួនរហូតដល់ថ្ងៃទី៩ខែកក្កដាឆ្នាំ ២០១៩ ម៉ោង៧ ព្រឹកទើបដឹងថា ជនរង គ្រោះស្លាប់នៅវាលស្រែតំបន់ទួលម្រិញ។
សមត្ថកិច្ចបានសន្និដ្ឋានថា ការស្លាប់នេះ ដោយសារស្រវឹងជោកជាំ វង្វេងស្មារតី អត់បាយអត់ទឹកកើតខ្យល់គ គាំងបេះដូងស្លាប់តែម្តងហេីយ ជនរងគ្រោះជាជនញៀនស្រា មិនមានអាហារក្នុងខ្លួន ទើបបណ្តាលឱ្យកើតខ្យល់គ ។ ក្រោយពីបានពិនិត្យចប់សព្វគ្រប់រួចហើយសពត្រូវបានប្រគល់ជូនក្រុមគ្រួសារយកធ្វើបុណ្យតាមប្រពៃណីយ៍៕
