ព្រះសីហនុ ៖ ឯកឧត្តម គួច ចំរើន អភិបាលនៃ គណៈអភិបាលខេត្តព្រះសីហនុ និងលោកជំទាវ ព្រមទាំងប្រតិភូថ្នាក់ដឹកនាំខេត្តព្រះសីហនុ ចូលជួបសម្តែងការគួរសម ឯកឧត្តម Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំប្រទេសកម្ពុជា កាលពីថ្ងៃពុធ ៩កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវថ្ងៃទី១០ ខែកក្កដា ឆ្នាំ២០១៩។
នៅក្នុងពិធីនេះដែរ ឯកឧត្តមអភិបាលខេត្តបង្ហាញប្រាប់ ឯកអគ្គរដ្ឋទូតចិន ពីការអភិវឌ្ឍន៍នៅខេត្តព្រះសីហនុ មានសន្ទុះយ៉ាងខ្លាំងក្នុងរយៈពេល២ឆ្នាំចុងក្រោយ ដែលធ្វើអោយខេត្តដែលធ្លាប់ជាតំបន់ទេសចរណ៍តែមួយមុខគត់ ប្រែក្លាយជាតំបន់ភូមិសាស្ត្រ ប្រជាសាស្ត្រ និងការអភិវឌ្ឍន៍កើនឡើងលើគ្រប់វិស័យ ប៉ុន្តែទន្ទឹមនឹងនោះ ក៏មានបញ្ហាប្រឈមកើតឡើងស្របពេលសំណង់អាគារខ្ពស់ៗជាច្រើនបានកើនឡើងមិនធ្លាប់មាននៅក្នុងខេត្ត ផ្លូវថ្នល់ជាច្រើនកន្លែងបានខូចខាត ប្រលាយ លូ ប្រព័ន្ធទឹកស្អាតបម្រើមិនបានគ្រប់គ្រាន់ទាន់សភាពការណ៍អភិវឌ្ឍន៍យ៉ាងគំហុគនេះ។
ឯកឧត្តមបន្តថា រដ្ឋបាលខេត្តព្រះសីហនុមានយន្តការ អនុវត្តវិធានការអប់រំ ផ្សព្វផ្សាយ ចែករំលែកការអនុវត្តនីតិវិធីច្បាប់ចំពោះវិនិយោគិនអោយយល់ដឹងពី វប្បធម៌ ច្បាប់ សង្គម និងការផ្សព្វផ្សាយអប់រំនៅកម្ពុជា។
ឯកឧត្តមស្នើឲ្យ ឯកឧត្តម ឯកអគ្គរដ្ឋទូតចិន ជួយគាំទ្រការបើកទីតាំងសមាគមសារព័ត៌មានចិន និងបើកស្ថានកុងស៊ុល នៅខេត្តព្រះសីហនុ ដើម្បីធ្វើការផ្សព្វផ្សាយ និងសហការជាមួយរដ្ឋបាលខេត្ត ដល់ប្រជាជនចិន ដែលនឹងមកវិនិយោគ និងកំពុងវិនិយោគនៅខេត្តព្រះសីហនុ។
តបតាមការស្នើរបស់អភិបាលខេត្ត ឯកឧត្តមអគ្គរដ្ឋទូតចិនគាំទ្រជួយដោះស្រាយបញ្ហាប្រឈមកើតមាននៅខេត្តព្រះសីហនុ។
ឯកឧត្តមលើកឡើង ស្ថានទូតចិននឹងមានជា គំរោង “កម្មវិធីខេត្តព្រះសីហនុ មានសុវត្ថិភាព” ដោយមានបញ្ជូលទាំងការ បណ្តុះបណ្តាល ការប្រើប្រាស់សំភារៈ បច្ចេកទេស និងសណ្តាប់ធ្នាប់ជាដើម៕
